بنفس الوقت ، كنت بأراقب تصرفاته معانا ..

هل بعد ما فقد الأمل مني ؟
بتتغير معاملته لنا مثلا ؟
هل بيحط حرته بالأولاد ؟
و زي كذا ..

لقيته مو مقصر معانا و الحمد لله ،، و مثل ماهو ، بيحاول يثبت تغيره للأفضل ..
( بس شي بنفسي مازال مكسور .. و ما بغى أتراجع عن قراري بعدم دفع ريال واحد بالإيجار .. إيش ما صار )

.
.

و الألف اللي خلاها بجيبه ، صار يصرفها علينا قد استطاعته ..
و يمشي بها حاله عشان لا يطلب مني .. ( بدون اسراف مثل ما كان زمان )
هو اخد 5000 من الشغل سلفة ،، و ألف خلاها معاها ..

ما قال لي ، بس عرفت ..

لخبطت معليه ..
يوم الخميس .. صاحب البيت ترك ورقة عند البيت إنه بيروح الأمارة .. مو الجمعة ..
زوجي سألني لو أعرف أحد من بيت فلان ، سألته ليش ؟؟؟

قال ( عشان صاحب البيت من عيلة فلان ، أبغى أحد يعرفه يكلمه و يقنعه )
لإنه صاحب البيت ، رافض يجدد العقد حتى لو زوجي جاب له المبلغ ..
طلعت وحدة من صحباتي ، تصير قريبة صاحب البيت و من نفس العيلة ..
بس بعدين قال لي زوجي ( و لا أقول .. خلاص ، ما أبغى الحريم يتدخلوا بالموضوع و تكبر الحكاية )

و أنا ما أظن إني كنت راح أكلمها ..
( كافي الإحراجات اللي سببها لي زمان في بريطانيا و هنا و مع عيلتي .. و بأتحمل نتايجها للآن )

مثال :
كان لما يعرف مني ، إني متجملة على أي أحد مثلا و أكون خدمت الشخص - لله - ..
يروح زوجي من ورايا ، و يطلب منه دين أو أي استغلال - كأنه رد دين و جميلي عالشخص لزوجي - ..
فيبان كأني أرسلت زوجي ، عشاني خدمت الإنسان هذا مو لله ،، عشان يخدم زوجي

فكانوا مثلا أقاربي ، يتجملوا لزوجي .. عشاني ، و لا لحماتي .. عشاني ، و أنا مادري عن شي ..
و ما أعرف غير بعديييييين .. و ما يقصر زوجي كان ، يلف على كل اللي كنت أعرفهم و يقربوا لي ..

بس تعلمت خلاص ، و هو كمان تعلم خلاص .. و تااااااااااااااااااااب يقرب من أي بيني و بينه صلة ..

.
.

زوجي قال لصاحب البيت ( أعطيك حقة 6 أشهر ،، بس أعطيك دحين 4000 و الباقي أدبره لك خلال أسبوع )
صاحب البيت رافض يجدد له العقد حتى لو جاب له المبلغ كامل ..
و قال له .. كمان نص الإيجار ناقص ؟
و قال له .. عندي مستأجر جاهز دحين ..

جلس زوجي يومين ، يسأل كل اللي يعرفهم و يدق عليهم ,, لو يعرفوا صاحب البيت ، لإنه صاحب البيت
عنده شركة هنا معروفة .. يعني شخص شبه معروف .. بس ما لقي أحد يتوسط له عند صاحب البيت ..

.
.

# طبعا ،، عادي هذه الأشياء عند زوجي و أهله .. و عادي جدااااااااا عندهم .. و متعودين كذا ..
ما عندهم أي احساس ، لإنه هذه الأحداث بتتكرر تقريبا كل ست أشهر .. كل ما تورط زوجي ،
يرمي كل شي علي و أحل له مشاكله .. ثم يتنكر لي و يطنشني و يصرف فلوسه هنا و هنا ..
و ما يحسب حساب لأي شي .. و لما أفكره و أقول له ( ترى بعد كم شهر لازم ندفع كذا و كذا لفلان )
يقول ( لا تشيلي هم ، و لا تفكري .. أنا أحلها وقتها ) .. و أتفاجأ ، إنها تجي على راسي بعدين ..

و زمان كنت أبكي و أزعل ، و الموضوع مسألة كرااااااااااااامة و كيف إنت كذا ؟ و أحرجتنا مع الناس ؟
و فشلتني ، كيف بأقابل الناس بالعمل ؟ ما عمري انحطيت بمواقف زي كذا ؟ لا أنا و لا أهلي ... إلخ

فتعلمت خلاص ، إني أحط أعصابي بثلاجة .. و ما يهمني باللي يصير ..

و المرة هذه ، الفرق ..
إني تغيرت و هو مستغرب .. و بالفعل تغييييرت تماما .. لإني ما سامحته و لا راح أسامحه ،.
و ما عاد هو الشخص اللي كنت اعتبره أقرب صديق .. هو مجرد زوج و أب للأولاد .. فقط ..

خليه يدخل هنا ، و يقرا .. ما همّني ..

***************************************

الجمعة ، زوجي رجع من الدوام ، و كان خلاص مررررررررررة متضايق و مخنوق و مكتم و بجد خلاص ..
و أنا أصلا كنت شوي طفشانة ،. و كانت نازلة على زوجي سكييييييييييييييينة و هدوء غريبين جدا ..
كان زوجي خلاص وقتها ( بذل كل الطرق و كل الأسباب و دق كل الأبواب عشان أحد يساعده .. بس مالقي )

# أدري من زمان ، إنه أول ناس بيتخلوا عنه .. هما أهله و أصحابه ،. من بداية الزواج ، كانت تصير
مواقف ، مثلا يمسكوه المرور و كذا .. ماحد يوقف معاه .. و دايما أوقات الشدة يتخلوا عنه ..
و الأمثلة و المواقف السابقة ، أكبر دليل و شاهد .. بس المرة هذه هو بعيونه شاف و تأكد إنه ماله أحد ..

كنا بالسيارة .. عشان جبنا الشغالة من بيتها ( كانت عندها إجازة يومين ) ..
و أنا خارجة من السيارة ..
قال لي ( خلي الأولاد بالبيت و تعالي )

استغربت ؟

قلت له ( طيب )

ركبت السيارة .. شافني مستغربة ..
قلت له ( من زمان ، ما طلبت مني نخرج سوا ) <--- أنا اللي كنت أطلب منه و اقترح عليه مرات ..

قال لي ( شفت حالي رجعت بدري اليوم ، و كنت متضايق ، و قلت بدل ما أجلس بالبيت متضايق ..
نخرج شوي ، و فكرت أخد الأولاد ،، بس قلت من زمان ما عزمتك برة )

قلت له ( أنا كمان كنت شوي طفشانة ، و نفسي اخرج شوي )

سألني أكل ماكدونالدز و لا كودو ؟
قلت له ( كودو )

طبعا بداخلي ،، شايلة همه و ما أبغى أكلف عليه ..

.
.

المهم ، تعشينا و رجعنا البيت ..
حسيت إنه نفسه يطلب مني أساعده و نحن بنتعشى ،.
لإنه السبت خلاص صاحب البيت قال بأجيب الشرطة ..

فما أعرف ، هل عزيمته لي ..
عشان بالفعل محتاج إنه يخرج و يغير جو .. و لا كان فيه شي بيطلبه مني ، بس انحرج و ما أعطيته
المجال و لا عرضت له أي مساعدة و لا حسسته بوجود أمل ، إني راح أساعده .. فقال احتفظ بكرامتي أفضل ؟

# أنا قلت .. الثقة معدومة ..
أنا ما أثق فيه ، و سبب انكساري داخليا .. مو إنه بلحظة ، لعب الشيطان بمخه .. لإني واثقة من حالي ..
بس لإنه كذا كان يمثل علي و كنت أحسن الظن .. و اكتشف بعدين إنه وراه أهداف ..
فما تخيلته إنه اللي أنا عايشة معاه ، كان بدرجة الحقارة تلك من مستوى الأخلاق الدنيئ ..

إنه كان يستغل مشاعري و تعاطفي معاه ، عشان يكذب علي ..
بس أبغاه يشوف ( نتيجة خيانته للثقة ) ..
و يعرف إنه ( خسر قلب انسانة كانت تحن عليه بصدق و اخلاص )


ملاحظة /
البرود ترى ظاهريا فقط ..
و لا بداخلي فعلياً ، ما بأقدر أنام لا ليل و لا نهار .. و أنا أفكر فيه و شايلة همه ..

بس أنا حاسة به ، الدليل إنه ما عمره كان بالشكل هذا مهموم جدا ..
لدرجة تاني يوم ، راح المستشفى و أخذ إبرة .. ضغطه ارتفع مرة من كثرة التفكير ..

.
.

المهم ..

( لا أحد يعلق رجاءً .. لإني بأكتب خلاص اخر شي صار السبت و الأحد .. و بعدين أبغى أقفل عالموضوع نهائي )

لإنه قلبي رجع يوجعني .. و حاسة بألم ..
ما أعرف إيش السبب ؟؟؟

بس تجيني صورة أمي قدام عيوني ، و أتمنى أكون عندها ..

.
.

لو بأساعد زوجي ، مو علشان تعاطفت معاه ..
لو بأساعد أو أوقف مع زوجي .. عشان ( ثقتي بربنا و بس ) ..

يوم السبت ، رحت الدوام .. و خفت إني أضعف ..
و كل مرة ، أقول يا بنتي اجمدي و مالك دخل ..


و لقيت له بالصدفة ،، رسايل بجوالي القديم ، تاريخها من قبل سنة ، كان نفس الشي مزنوق عشان الإيجار ..
و ما كانت عنده وظيفة ، و صاحب البيت تبع الشقة القديمة كان طالب الإيجار ..
فقمت حفظت كرامة زوجي ، و دفعتها عنه .. بشرط إنه مالي دخل بعد كذا و هو يدفع أي ايجار ..

و تذكرت اللي صار منه ،. هذيك الفترة ..

و إني قررت ، ما أتحمل أي هموم بعد هذاك اليوم و مالي أي دخل و لا شغل و هذه مسئوليته ..
و بعدين افتكر ، كلام أبو حكيم ( أعطي لزوجك فرصة )
و بعدين أقرر ، إني بأساعده بس بالشرط اللي شرطته عليه ( يكتب لي ورقة موثقة بالمحكمة ..
إنه استلم مبلغ مني ، استخدم الورقة في حالة إنه لا سمح الله فكر يطعنني )
و بعدين أجلس أقول ، حتى لو أخدتي الورقة ، بتضحكي على عمرك ، ما راح تستخدمي الورق أصلا ..
طيب ، صحيح ما راح استخدم الورقة ، بس أبغى أشوف أي تصرف - فعلي - يدل على إنه صادق ..
طيب ، إيش فايدة الورق ؟ إذا بيوم باعني .. فمع ألف سلامة .. و الباب اللي ما يرد .. إلخ
تساؤلات كثيرة وقتها جلست تلف براسي ..

طيب لا سمح الله ، لو مرض و دخل المستشفى من كثر التفكير و الهم ؟
طيب لا سمح الله ، لو صار فيه شي .. بتندمي ؟

أرجع أقول بداخلي ، لا ما راح أندم لإني بذلت كل شي ..
و يستاهل ، هو اللي باع ، و هو اللي خسرني .. إلخ من أفكار تروح و تجي ..


المهم ..
رجعت و طنششششت .. و ارسلت له رسالة على جواله :
" أتمنى أشيل همومك كلها ، بس بداخلي شي انكسر من هذاك اليوم "

رد علي :
" تسلمي حبيبي ، أنا أحل همومي حتى لو وقفت عند المساجد "

رديت عليه :
" ما أرضاها عليك "

و ارسلت
" ريح قلبي ، و اعطيني ضمان .. بلحظة حياتي معاك كانت بتصير سراب .. و تكون غريب عني "

رد :
" ايش تبغي أحسن من ضمان الكعبة ، و ربنا شاهد على إني أحافظ على حبنا و بيتنا "

رديت :
" وعدتني بيوم ملكتنا و اقسمت لي و صدقتك ، و رحت الحرم و عاهدت ربنا إنك ما تبكيني ؟ "

و رديت :
" الكعبة عشان أحاول أنسى و أرجعلك ، بس أبغى أضمن عمري و حياتي معاك ..
أحتاج الورقة الي وعدتني بها من المحكمة بخمسة مليون .. إنت مو واثق من نفسك ؟؟؟ "

رد :
" و الله واثق من نفسي ، زي ما أكلمك دحين ، بس ينتهي الموسم و أفضى و أجبلك الورق "

و أرسل بعد 10 دقايق :
" و الله وعد ، بس أفضى من الموسم و أسويلك هيا عشان خاطرك "

و لا عاد رديت عليه .. و طنشت و قفلت عالموضوع .،
لإني ما أثق بوعوده .. و ما أبغاه يحسبني غبية مثل قبل ، تمشي علي وعوده ..
و لا أبغى أصلا الورقة ، بس كنت بأتأكد من شي بنفسي ..

.
.

في المغرب و زوجي بالعمل ،، دقيت اتطمن عليه و كان صوته متغير..
سألته ، إيش به ؟ قال ولا شي ..
بعد شوي دق علي ، و قال كنت عند المستوصف التابع للعمل .. ارتفعت حرارتي و رحت أخد ابرة خافض
و كنت عند الدكتور .. بس قلتله طبعا سلامات وو إلخ

رجع البيت في الليل ، ليلة الأحد كانت ( وقت ما كتبت هنا ردي بإني محتارة بتصرفي )

.
.

كانت شهيته مسدودة عن الأكل ، باله مشغووووووووول و يفكر و هو يتفرج عالتلفزيون ..
قلت له ، أنا ما أكلت شي لحد دحين ، تتعشى معاي ؟ قال لي طيب .. و تعشينا ..

راسه مرة مصدع كان ، و شكله ( ضغطه كان مرتفع مرة ) ، لإنه زوجي عنده الضغط و السكر ..
مع إنه أنا المفترض ، يجيني .. بس الحمد لله و الشكر ..

و ما كان تمثيل ، كان بالفعل تعبان و مهموم مررررررة ..
حسيت بصدقه ، و أعرفه لما يكون صادق ..

طبعا ، تكلم مع صاحب البيت قبل لا يجي .. و جلس زوجي يحاول يقنع فيه و يكلمه و كذا ..
قام قاله صاحب البيت ، بكرة ماخد موعد عند الأمارة .. و ما راح أقبل بتجديد العقد إلا بشرطين ..
1. تجيب كفيل لك ..
2. الإيجار يرتفع ، لإنه المستأجر جاهز و بيدفع دحين .. و بيصير 20 بدل 18 ..
يعني تعطيني 10 مو 9

و رفض أي محاولة للإقناع أو التفاهم ..
و قال لزوجي ، بأعطيك فرصة لحد بكرة الظهر ، إيش قررت ..

.
.

المهم ..

حكى لي زوجي ، و سمعت له ..

.
.

المهم ..

كنت جالسة بالصالة .. و نيمت ولدي الصغير خلاص ..
و زوجي قام بشويش من غير ما ألاحظه ، و راح الغرفة التانية و تأخر ..

الغرفة كانت مظلمة .. لإني منيمة فيها ولدي الصغير
رحت بعد شوي ، أحسبه نايم .. !؟ أو يمكن صحي الصغير و زوجي بينيمه ؟

.
.

دخلت الغرفة بشويش ، بس من عند الباب عديت و بدون ما أطلع أي صوت .. و ماني شايفة شي ..
لقيت زوجي فارش سجادته ، و ساااااااااااجد لربنا يدعييييييييييييي ..

خرجت من غير ما يحس علي ..

.
.

أول مرة ، أشوف زوجي يقوم الليل و يصلي و يدعي .. و يطلب من ربنا ..
هذه عندي ، تسوى كل شي ..

صورته كانت روعة ، و هو سااااااااااااااجد .. و أنا أطالع بكل نواحي الغرفة و ماني شايفته ؟
و ما طالعت بمكان السجادة ، لإني ما توقعت أبدا يكون هناك ..

الصورة مرة فاجئتني و فرحت قلبي .. و زادت مقداره بداخلي ..
ما توقعت إنه زوجي بيوم من الأيام ، يقوم من حاله يصلي بالليل و يطلب من ربنا ..

كان شي شبه مستحيل ..
.
.

حسيت بفرحة بداخلي ..
بجد ، إنك لا تهدي من أحببت ..

.
.

و مو إنه كان متقصّد أشوفه ،.

و قلت بداخلي ، ربي راح يفرج همه ( بس ما أعرف كيف ؟ )
لإني أنا كنت خلاص ، مقررة و بشكل نهائي .. مالي دخل لو إيش ما صار ..

قمت الصبح يوم الأحد ..

قلت خليني استخير ربنا ، و اللي ربي يشوفه خير لي ( أنا راضية به ) ..
هو اللي يعلم الغيب ، و يعلم باللي داخل الصدور و بنياتنا ..

كنت رايحة الدوام ، و أنا بالطريق و قربت أوصل ..
قلت لزوجي ( توقفني قدام صراف ؟ )

سحبت 5000 و أعطيته بالسيارة مع الفلوس حقته الـ 4000 ..
بقيت ألف ، هو يدبرها خلاص .. و هذه ممكن يدبرها زوجي بسهولة ..

قال لي ، خلاص مو لازم خليها معاك ..
قلت له ، خليها معاك .. على بالك ما عندي قلب و لا إحساس ؟

بس لا تحسبه غباء مني ، و لا طيبة زايدة و هبل ، و لا إني سامحت و نسيت ..
إنت نزلت كرامتي للأرض ، و صارت الدمووووووووووووووع تنزل من تحت النظارة الشمسية ..
مع إني كنت مقررة ، ما أخليه يشوف دموعي ..

وعدني بيعمل لي شي بعد شهرين ..
بس ما راح أكتبه هنا ، لحد ما يعمله لي .. و قال الموية تكذب الغطاس و راح أثبت لك ..

قلت له ( ما أبغى منك شي )

.
.

و اتفق مع صاحب البيت إنه يوقع عالعقد الربوع هذا ، يعني بكرة ..

أنا ما أبغاه يشعر بقيمة وجودي معاه .. لإني عارفة نفسي .. و متأكدة من نفسي ..

أبغاه يشعر بقيمة ( ربنا ) ..
أبغاه يشعر بداخله ، إنه ماله أحد ( غير ربنا ) ..


هو ماهو عارف ، و لا عمره حس .. إيش معنى ( إنه يكون عندي رب .. اسجد له و ألجأ له ، و يفرج همي و كربتي )

حتى مرة سألته ( إنت تشعر بداخلك .. بقيمة وجود ربنا و إيش معناه ؟ )
قال لي ( الصراحة .. لا ، بس كذا بأصلي عشان تعلمت إنه للازم أصلي )

قلت له ( ما تحس مرات كذا ، إنه ربنا قريب منك و يسمعك و حاسس بك ؟ )
قال لي ( لأ ) ؟؟؟

جلست أفكر مع نفسي ..
ياربي ، كيف ممكن يشعر بالإحساس هذا ؟؟؟

.
.

قلت له من شهر ..

لو بيوم كنت محتاج لوظيفة ، و رحت لأي مسئول عشان يتوسط لك ..
بيجيب لك الوظيفة بسهولة صح ؟؟؟

قال لي إيوة ..
لإنه يقول لي أصحاب الواسطات يتوظفوا بسرعة .. إلخ

.
.

قلت له ،،

طيب إنت ربنا واسطتك ..

دحين نحن بنص الليل ،، قوم صلي ركعتين و اطلب من ربنا ..
و الله العظيييييييييييم .. إنه بكرة بتلاقي همّك انفرج ..

.
.

قال لي معاك حق و اقتنع بكلامي ، و قال دحين أقوم .. و طبعا الشيطان شااااااااطر ، خلاه ينعس و يتكسل عن الصلاة ..
و نام .. ما أسمعه غير يشخر ..

.
.

( أبغاه يلجأ لربنا .. بعد ما دق كل الأبواب و ما لقي أي أحد ممكن يساعده .. و أنا ما راح أتحرك من الشقة و ما راح أتحمل
مشاكله مع صاحب البيت .. لإني نبهته من زمان ، و تحملت زمان بما فيه الكفاية من مرمطة و غيره )

باقي دحين ، مشكلة وظيفته ..

لو بعد أسبوعين جلس بدون وظيفة ،،
ما راح أتهاون بالموضوع ..

تعديل ..
قلتله .. اشوفك مهموم و اتفرج ؟
ماقلتله على بالك ماعندي قلب و لا احساس .. هذه قلتها له برمضان .. كنت هبلة وقتها

.
.

و لا احد يقول تقسي عليه ..
هو انسان تركيبته كذا .. يبغاني كذا ..

بداية الزواج لما كنت اعامله بالطريقة هذه .. كان يدلعني مرة ..
و كلهم يقولوا .. انت قاسية .. الله يعينه .. مدري ايش وووو الخ
كانوا يتدخلوا من حالهم .. عشان يسمعوا من امي الله يرحمها انه سوى لها و عمل لها ..

بديت اتغير و اصير مرة ضعيفة و اسعى خلف سعادته على حساب نفسي و الاخرين ..
هو وقتها الي بدا يتغير و يقل اهتمامه و اخلاق اهله تظهر فيه ..

.
.

بس خلاص .. خلينا كذا افضل ..

و ماراح اصبر ابدا ..

اصبر ممكن على مصائب لاسمح الله و لاقدر الله .. مثل مرض او موت او امور قدرية ..
لكن ما اصبر على نتائج اغلاط تربية غيري .. او نتائج سوء تفكير و تدبير من غيري ..

اصبر على نوائب الدهر لاسمح الله ..
لكن ما اصبر على غباء اشخاص .. او على اتباع الاخرين لشهواتهم او شياطينهم ..

الحياة مرة وحدة نعيشها ..
و الانسان هو يقرر مصيره و طريقه ..

.
.

انا كذا ..

ان عجبه عجبه ..
ان ما عجبه .. لا يعجبه ..

.
.

و معاه و لا من غيره ..
راح اعرف اعيش حياتي ..

.
.

خلاني سابقا انزل من مقداري .. شككني بحالي .. كان بيضيع ثقتي بحالي ..
كله عشان ادور كيف ارضيه و ادور فين الخلل بحياتنا ؟

الصائمة لله .. تابعت معاي بالبداية كيف كنت اسعى للتضحية من اجله ..
بس خلاص .. لحد هنا .. و

Game Over

.
.

الف شكر للغالية صاحبة القلب الكبير .. بيتا

و الف شكر للفاضلين .. و الله يكثر من امثالهم ..
ابو حكيم و البليغ ..
نصائحكم كانت و مازالت درر .. تنير دروب عقلي ..
حتى وان كانت لاتتعدى الكلمة او الاثنين .. بس كانت وقود لي لمحاربة الشيطان

و المتفائل بالله .. اسم على مسمى ..
و ابو مريم ..

و الغاليتين ..
فاكهة الشتاء .. مرآتي
نورة ..

متفائلة خير .. ما انسى مشاركاتك .. و متابعتك ..
ترى السعادة بداخل قلبك .. مو بوجود اشباه رجال ..

.
.

بالاخير ..

ماراح انكر افضال زوجي و لا انكر مكانته عندي
بس لازم اكون كذا .. لانه اعجب بي لما كنت اصلا كذا ..

و انا مرتاحة اكثر كذا : )

ينقل الى المشاكل المحلولة

باستمر باليوزر هذا ..
عشان هذاك يفكرني بامي و باخر موضوع كتبته ..

و انا دحين طلقت الماضي بالثلاث .. ^^

بالتوفيق عزيزتي ؛ عصاميه .. وبارك الله في حياتك ..

يغلق ،
ونسخه للمشاكل المحلوله .

__________________