اخي الكريم
والله الضحايا الأطفال هؤلاء وإلا انت بتعيش وهي أظنها عائشة ليش مافي صبر واحتساب لله حتي في تحملنا للمشاكل انا ما قول انت غلطان او هي أنا أقول شيء واحد وبالفم المليان ترى البيوت كلها تصير فيها مشاكل وأحيانا ماهي مشاكل بل مصائب يا دافع البلاء لكن مدى ردة الفعل تختلف من زوج وزوجة وأهله وأهلها الحكمة والعقل والتريث شيء لابد منه عند وجود الابناء لانه خسارة عظيمة وجسيمة لو الزوجة والزوج ما تحملوا بعضهم لأجل أبنائهم وشالوا بعضهم اجل يشلون لأجل مين كثر الطلاق في المجتمع السعودي بسبب التسرع وعدم تحكيم العقل والمنطق الله يجمع بينكما وأبناءكم معكم |
وش اصبر عليه يا اختي ؟؟
صبرت الى ما تعودت على نمط معيشي معين وكل هذا خوفاً على مصلحة عيالي ولا انا اخر شئ افكر فيه نفسي اكل صحي مافيه كله مطاعم ولولا الله ثم حنان امي ورحمتها بهالطفلين والله ما ترسل لنا كل يوم غداء دوامها بعيد وجبنا له سواق وسيارة علشان ترضى والحياة تمشي البيت وسخ بحجة مافيه خادمة واستقدمت لها بس عارفين ازمة الخدم اخذت اكثر من 5 اشهر ماوصلت بيت الوالد الحمدلله دور كامل عمر الفيلا 28 سنة سكننا سنة بشقة اجار وانتقلنا بعد الترميم بالكامل وساكنين بدور كامل مستقل تماماً باب خاص ودرج خاص الحوش غيرته بالكامل ديكورات من اشهر محلات تزيين الحدائق علشان يواجهه ضيوفها وحسب طلبها اثاث الصالة غيرته لانه كان للشقه القديمة وصغير وغرفة النوم غيرتها لانها تفككت وتطلع اصوات صرير وقلت بجيب نجار رفضت وقالت مانام هنا وصارت تنام بغرفة العيال مكيفات ماتبي شباك ركبتها كلها سبلت وقفلت فتحات المكيفات وصار لازم اصبغ بوية علشان منظر الجدار اقترحت نركب منظر ورفضت الا بوية جديدة كل هالامور عندي تهون يا اخوان انا كان راتبي 6000 ريال كان علي قرض 2100 ريال + اجار شقة 1500 + مصاريف السيارة والكهرباء والبيت واعطيها مصروف 500 + مكافئتها الجامعية ورفضت الا تعطيني 1000 صار يبقى بجيبي 2200 ريال والله اني اذكرها منها اغراض للبيت ومطاعم ومصروف لي ومصروف للبيت وقلت اصبر يارجال الحياة كفاح بكرة تتيسر هالانسانه اللي تشتكي ان دوامها بعيد عن البيت كنت اطلع الفجر اوديها للجامعة وارجع للدوام والظهر استأذن اطلع من الدوام وارجعها للبيت وارجع للدوام ثم اطلع من الدوام وارجع للبيت وهي نايمه مافيه غداء ارجع مهدود حيلي وتصحى بتروح لاهلها وصبرت سنتين ولما قلت لها اذكري تعبي معاك على ماخلصتي الجامعة تقولي لاتقارن هذاك وضع مؤقت سنتين وانتهت بحلوها ومرها انا ماقدر اتعب اكثر من كذا ابي ننقل قريب من دوامي معليش وش اسوي اكثر ؟؟ اتنازل اتنازل اتنازل داست علي دوس مرغت وجهي بالتراب من كثر ما اتنازل بس خلاص انتقال وتغيير للبيت مافيه من اول يوم تقدمت فيه لخطبتها وانا قايل لهم انا بسكن ببيت الوالد بالدور الي فوق بالمنطقة الفلانية والحي الفلاني وقالوا مافيه مانع اهم شئ مستقل وش اسوي اروح استأجر جنب دوامها ب 60 الف ريال بالسنة ؟؟ علشان ترضى وترجع لي ولا اشتري بيت هناك واقصدهم 30 سنة 12 ألف ريال علشان ترضى واقعد طفران ومديون للبنك ومو معقوله انقل للشمال علشان تصير قريبة من دوامها واصرف 5 آلاف بالشهر راتبها 6500 وعرضت عليها 3000 ريال بس تقعد بالبيت ورفضت خلاص معليش انا يحق لي ارفض مثل ما انتي ترفضين زوجات الظباط والعساكر يتنقلون مع ازواجهم للحفر الباطن وتبوك والشرقية والجنوب مو من شمال المدينة لجنوبها لا من شمال المملكة لجنوبها وصابرات ويروحون مع ازواجهم وين ماراحوا احمدي ربك اقولها معلمات يكافحون من قبل الفجر يسافرون 200 كيلو معلمات وبعضهن ماترجع لبيتها تموت بحادث احمدي ربك لاتزول نعمتك تقول مالي دخل بالناس هم عندهم ظروف صعبة انت الله اغناك انا صبرت عليك وانت فقير والحين الله اغناك خلاص لاتصير بخيل الله اكبر عليها حسبي الله ونعم الوكيل شوية رحمة ياناس اقسم بالله عندي كلسترول بسبب اكل المطاعم وعلمتها اني مريض تقول اشتر لك كودو او مشويات مافيها كلسترول بالله هذا رد ندمت اني قلت لها انا وعيالي ياامساك يا اسهال يا مرض والله بعد ماطلعت من البيت وحصل الطلاق عيالي راحوا للمطبخ اقولهم وش نفطر ؟؟ يقولون نبي حليب شكولاته وبسكوت ؟؟ بالذمة هذا فطور اطفال ؟؟ لاحد يقولي كل الاطفال يحبون كذا لا ايام الاجازات اشوفها بعيني كورن فليكس ينبلع الموضوع اما بهالشكل لا والله القائمة تطووووووووول بالمشاكل والبلاوي اللي ساكت عليها لانها مسؤوله امام الله عننا فالله حسيبها اما توصل الى تخيير يا تطلق يا تشتري بيت جنب دوامي او تستاجر وتعطيني فوقها مصروف بعد خلاص انخنقت ودي احد يعطيها ضربه تصحيها حتى كنت افكر بس برجعتها كيف ارجعها الآن اقسم بالله افكر ماعاد ترجع وش فيه من تغيير بيصير لو رجعت برجع لاكل المطاعم و برجع للبيت مالقاها ولا القى عيالي ويرجعون بالليل تتصل تعال شيل العيال نايمين تقول ودي نغير المطبخ يا بنت الحلال انتي ادخليه اول واطبخي ثم اطلبي تغيرينه اليوم اللي تطبخ فيه تكلم امي وتعزمها وتحلف عليها الا تجي وهذا مره بالشهر وامي تتهمني اني اتبلى عليها واني انا اللي متعود على العزوبيه وابي اكل المطاعم بعد ما طلعت من البيت والعيال عندي وجات امي فتحت الفريزر لقت لحمة عيد الاضحى موجوده بأكياسها <<<< الحمدلله طلعت مظلوم وسمبوسه ملفوفه علشان رمضان مثل ماهي ماتغيرت معلبات كلها منتهية الصلاحية معناها ما استخدمت ابد ادري بيجيني 20 ألف عضو ويقولي انت السبب انت اللي من البداية تتنازل انت اللي عطيتها وجه وانت اللي تركتها تتحكم وانت اللي بينت لها ان طلباتك مجابة انت اللي تضغط على نفسك علشان راحتها وهي ماسألت فيك ادري والله ادري بس لاحد يقولي كان صبرت كثر الطلاق بسبب ماعاد فيه صبر ولا ناس عقلاء اسباب الطلاق كثيرة ولو بسبب فقط انه مافيه عقلاء وناس متسرعه ماعندهم صبر ما حلله الله وحسبي الله ونعم الوكيل على كثر ما الاخت قلبي سر معاناتي ندامه انها كانت تعطي زوجها دون مقابل وبالاخير كشت فيها على كثر ما انا ندمان اني كنت اصرف واعطي بدون حساب وهي تجمع من وراي تقولي خلص راتبي ابي فلوس واعطيها 1500 او 2000 وتحطها مع باقي فلوسها اللي جامعتها على جنب اخر شئ اتفاجأ ان حسابها طق 100 ألف ماختلفنا حلال عليك لو هو راتبك الحالك مو تضحكين علي وتقولين خلصت فلوسي واليوم والله ماشريت حتى سندويشه لان مامعي الا 5 ريال تشغلين اسلوب الرحمة عندي علشان اعطيك عيب والله عموماً الوضع انتهى اما رجوع يكون فيه اعتدال وحياة كريمة لي ولها وللعيال او مايحتاج ترجع ابد |
مواقع النشر |
ضوابط المشاركة |
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك
BB code متاحة
الابتسامات متاحة
كود [IMG] متاحة
كود HTML معطلة
|