اخوي ساري عوضك الله بالزوجة الصالحة تحبك وتحبها .،

نصيحة أخ لا تتأمل في رجوعها .. أخوها يشفق عليك ووده يصلح ويحنن قلب أخته عليك بأي طريقة ..

الحياة ما تتوقف على شخص .. والعيال يكبرون وتقدر تعوضهم بتواجدك معهم الدائم ..

هل تريد أن تعيش معك زوجة تحبك وتودك أو زوجة تعيش معك لأنها تشفق عليك .. طليقتك راحت للمحكمة لتنفصل عنك تتوقع أخذت هذا القرار وعندها 1٪‏ رغبة في العيش معك ..!

اشكركم كل الشكر ، نعم انا اعترف
انزلت القليل من كرامتي لعيون اولادي
ولعيون اخو زوجتي اللي الح علي ان اراسلها وان اتأكد من نفسي ، وهذا انا تأكدت ، وهذا انتم اعطيتوني نصائحكم ، ووالله معاد اراسلها ابد ، وغسلت يدي منها ، نعم كرامتي فوق كل شي ، ولكن بعض الاحيان ننزل القليل من الكرامه لعيون ، والحين خلاص بان معدنها ، الشاهد الله معاد بتواصل معاها ، وبعيش حياتي ، والدنيا ماتوقف عشانها ، صبرت بما فيه الكفايه ، ونصائحكم زاددتني قوه ، لأني افكاري اصبحت مشتته ، تطمنو ، اقسم بالله معاد اراسلها ولااتصل بها ولاأسئل عنها وبعيش حياتي ، متى ماتبي ترجع فالله يحييها ، وإذا مارجعت فأنا مثل ماقلت لكم ، بعد سنتين إن شاء الله راح اتزوج ، وفي خلال هالسنتين إن رجعت فحياها الله
انا شاك بنسبه كبيره جدا ، يمكن فيه حرمه لعب بعقلها ، لأن زوجة ولد عمي نمامه درجه اولى ، وقبل زواجي هذيك الأيام ، كانت تبغى تزوجني اختها وانا رفضت ، وكلمني زوجها وهو ولد عمي هذيك الايام فرفضت واعتذرت ، وجاني خبر مؤكد بأنها زعلانه زوجة ولد عمي ، وماحضرت زواجي ، وقبل ماتصير المشكله بيني وبين زوجتي ، زوجتي قالت وديني عند فلانه اعزي عليها بوفاة امها ، وأتوقع بنسبه كبيره ، عبت رآسها بشي فيني يمكن ظلم ، انا مااظلمها ، ولكن مابعد هالزياره بعد اسبوعين الا اشوف زوجتي تغيرت ماهي هالأوله اللي اعرفها ، عموما/ مختصر الموضوع اللي صار صار ، والشاهد الله معاد بتواصل معاها ابد ، وأنا الحين عند كلمتي ، وأنا اول كان قلبي يحن لها ،

معليش يا جماعة الخير يا ليت تخففون اللوم شوي على اخونا لأنه تواصل مع طليقته بناء على كلام اخوها
يعني الأخ ساري وش دراه عن نية اخوها اذا هل فعلا اخته نادمه ولا قصده ان ساري يبادر عشان هو يضغط عليها شوي من جهته؟
عن نفسي ارجح ان هذه نية اخوها, يعني هو يبغى يلم الشمل لكنه ربما يفتقد الأسلوب الصحيح
ولو ما ارسل لها وصار شي بعدين يمكن اخوها يقول له انا طلبت منك تبادر ولكنك رفضت وضاعت عليك الفرصه
ولو شارونا قبل ما يرسل ربما اغلبنا قال له ارسل واكيد اخوها مرتب الموضوع وما عليك .... الخ, عموما اشوف ان مبادرته بمحلها واتفق معكم بأن ما كان فيه داعي يسترسل بالرسائل والرساله الأولى كانت كافيه جدا .

__________________

الأخ الفاضل ساري انت رجل طيب وصادق ومراسلتك لطليقتك من اجل اسرتك عين الصواب انت قمت بكل ما يتوجب عليك فعله وسيتذكر يوماً ابنائك ذلك بامتنان كبير ليس في الأمر ذُل وإهانه كلنا هذا الرجل لو كنّا في مكانه لفعلنا فعله فلا ملام عليك ولا عتاب حطيت نفسي مكانك وكنت سأفعل مثلك تماماً واتبع ومضات الأمل التي اوحى لي بها اخوها او عديلي حتى اذا فات الفوت لم يكن في نفسي ندم على فرص مضاعه انت بذلك وقفت على جادة الأمر ودع الأمور تجري في أعنتها حفظ الله لك ابنائك وجعل الله مافات برداً وسلاماً يسكن قلبك

الله يهدي زوجتك ويحنن قلبها ويردها لعقلها وصوابها
الله يلم شملكم ويمسح هلى قلوبكم ويبعد الشيطان عنكم

ياصاحبي روح مكة يومين واطلب الله من بيته الحرام وانت متيقن بالإجابة وسيأتي الفرج بحوله وقوته

الله يفرج عليك يارب

هذى اللي كنت شاكه فيه وسالتك عنه

المفروض انها مو على طول تصدق قبل تتاكد

__________________
أيّــــها الحـاملُ هـمــاً .. إن الـهم لا يدوم
مثـــلما تــفــنى السعـــادة .. هكذا تفنى الهموم

بيض الله وجهك..على محاولتك. وكفى ..ليكن شعارك من الآن فصاعدا في الحياة عز نفسك تعتز ..ارمها كل يدوس عليها... اللي يحبك وباقي على العشرة يشتريك ومايبيعك ووبيسامحك وبيعطيك فرصة ...ضع هذا نصب عينيك..وركز على حياتك الان وعلى ابنائك واحذف رقمها من جوالك..حتى تمنع نفسك من خطوات مشابهة أخرى ...ولتبدأ بداية صحيحة أخرى وفقك الله أخي الفاضل

الله يعوضك خير انت وياها،،،يمكن تحن بعد كم شهر اتركها حاليا،،،مو شرط انو احد ضغط عليها او عبى راسها بشي وتغيرت يمكن هي من نفسها مكتئبه او شي،،

نظرتي في تصرفات زوجتك ربما الاستعجال!

وأنا بتحليلي لو هي فعلاً كرهتك كان ما ردت أصلاً على رسالتك.
أقرأ في كلماتها شخصية كانت تنتظر بفارغ الصبر التأكد من رغبتك فيها حتى ترد عليك بكبرياء تزهو بعده.

العائلة كلها عارفه بنتهم وعارفين زوجها، اتركها الله كفيل بأن يأمر الأيام وتصحى.

توها شهرين بكرا تزورها فلانت وتروح مع صاحباتها وكل وحده تتكلم عن بيتها وتتذكر حياتها السابقه.

وإذا كنت فعلاً شخص طيب حنون يراعيها صدقني ماراح تنسى والذكريات بتحنن قلبها بعد الله.

ولو كانت كارهتك ما ترسل 3 رسائل كانت اختصرت كثييير في رساله وحده، مثلاً: الله يعوضنا خير، انتهى كل شيء.

وتقول لولدها قول لأبوك إني أبغى أغراضي.

بس ترسل 3 مرات ما صدقت إنك راسلتها


ما انهانت كرامتك ولا شيء بالعكس من الجميل إنك أرسلت لأن هذي أشياء تساعدك في إرضاء ذاتك، يعني تؤكد لنفسك بإنك حاولت بكل ما تستطيع.

افعل ما يحلو لك حتى لا تندم غداً.

عشان فعلاً بكرا إذا رجعتوا لبعض تحترمك أكثر بإنك حاولت في إرجاعها وكانت تعني لك شيء.

أما إذا الله كتب لك نسيانها فأنت قدمت اللي المفروض يتقدم، وهي راح تذكرك دائماً بمحاولاتك.


بعدين أخوي لا تتكلم عن الكرامة ما فيه شيء تسويه أنت حالياً يمس كرامتك، بالعكس أنت تسعى لرفع كرامتك بالمحاولات لأنك تبغى ترجع تعيش مع زوجتك وأبنائك وبسعادة وش فيها إذا حاولت مرة واثنين وثلاثة وتراسلتوا؟

عادي هي يمكن تسرعت في قرارها وتفشلت تعلم أحد وما تقدر تقول لك رجعني لأنك بتقول لا !

هي عاشت معاك سنين وأنت بعد مو من العقلانية إن أحد يقول لك لا تكلمها إذاً ليش الشرع أمهلنا 3 شهور؟

أنت بنفسك عاطفتك غير مستقره 7 دقائق تكرهها و23 ساعه تحبها وتحن لها!

هل من العقل والمنطق إن القلب جهاز يطفي بسهوله أو بأمر؟

عادي سو اللي تسويه في إطار الثلاث شهور إذا انتهت اتكل على الله

وعدل من حياتك يمكن تغريها أكثر إذا تطورت في أمور كثيرة من الناحية المادية والجسدية!

إذا سمين انحف وإذا نحيف حاول تزيد حجم العضلات، صدقني أنت راح تحب نفسك أكثر.

اشكركم جميعا" على مروركم العطر
ومتابع ردودكم الرائعه اللي تثلج الصدر
وللأمانه نفسيتي الآن صار لها اسبوعين بالضبط ، اصبحت عادي جدا والحمدلله اضحك من كل قلبي وليس صناعي مثل السابق ، احس اني ارتحت نفسيا واستقر وضعي بشكل اكثر من ممتاز ، وخفففت الهموم بنسبه كبيره ، اصبحت اكثر اوقاتي اكثر من الإستغفار ، والصلاة على رسول الله ، اول شي لعل الله يعوضني بغيرها او يردها لي ، ، لأني اتذكر بأن الحياه لاتقف عند احد ، والحياه ستمضي ، اتذكر ان المؤمن مبتلا ، فلعله خير ، اتذكر قبل طلاقها ، كانت تبكي وتقول انت يمكن سويت شي بحياتك والله اراد الفراق بيني وبينك ، ابغى ارجع لكن احس انك خرجت من قلبي ، وهي كررتها وقالت يمكن انت ظالم احد او سويت شي وعصيت الله فيه وقالت دائم ابكي ابغى ارجعلك ، واجاهد نفسي لكن ماقدرت ، انا عفتك ، طبعا هالكلام قبل الطلاق ، قلت اعوذ بالله ، انا حتى دخان ماادخن فمابالك بالاشياء الكبيره ، عموما اخواني الاعضاء/ انا عن نفسي الحين فوضت ووكلت امري إلى الله لعل الله سبحانه يعوضني بأفضل منها او يردها لي ، مانعلم الغيب ، لعله خير ، والشاهد الله قطعت اتصالي بها بجميع اشكاله وصرت معاد افكر فيها كثير زي اول ، احس وضعي تعدل ، نفسي تعز علي ، يكفي ، وانا اعترف انزلت من كرامتي لعيون اولادي ولعيون اخو زوجتي الغالي عندي ، ختاما لكلامي هذا احب اقول لكم ، قررت اكثر من الاستغفار لعل الله يعوضني بأفضل منها ، او يردها لي ردا" جميلا ، فالمؤمن مبتلا ، ويمكن هذا ابتلاء ، مانعلم الغيب ، نصحني شيخ ، وقال اكثر من الاستغفار والصلاه على النبي ، لان قلوب العباد بين يديه يقلبها كيف يشاء
وقال تذكر ياولدي ، المؤمن مبتلا ، والانبياء اصابهم ايضا الابتلاء ، قلت له ، نعم سأكثر من الإستغفار ، والله قادر يبدل حياتي للأفضل
((( الحمدلله على كل حال )))
إذا استجد شيئ جديد ، بعطيكم خبر
وتذكرو كلامي إن شاء الله
إن استجد شيئ جديد ، فسأبشركم
بما اراده الله لي ، بالتوفيق للجميع
تحرير في 1438/7/25 السبت