المشاركة الأصلية كتبت بواسطة عشقك جنون

السلام عليكم ..

نظراً لكثرة الردود على موضوعي الأول ’ و إنتظار البعض الرد مني ..

حبيت أطمئن الجميع اني بخير والحمد لله على نعمته , و أشكر كل من خصني بدعواته ..

وكما قال عليه الصلاو السلام :

(دَعْوةُ المرءِ المُسْلِمِ لأَخيهِ بِظَهْرِ الغَيْبِ مُسْتَجَابةٌ )

فقد فرج الله كربتي والحمد لله " ربما بدعوة من أحدكم " .. ومن حقكم تعرفوا كيف :

كان زوجي كله سرحان وساكت ولا يطلع من البيت إلا لدوامه ويرجع قبل يخلص الدوام بوقت

يفتح معي أى موضوع ويلف ويدور وينهي الحوار وكأنه يمهد لأمر أنا عارفته بس أتغابي

كنت حاسة إن زوجي معزم على الطلاق , وكان إحساسي في مكانه , لكنه ما قدر يقولها ..

فحبيت اريحه لأن وضعه صععب جداً ونفسيته تعبت وهو ماهو قادر يوصل لي الفكرة ..!

فقلت له : أنا فاهمة زين وش بتقول , أنا فاهمتك من نظرتك ومن أول ما فكرت بالموضوع ما أحتاج كل هالتمهيد , ريح نفسك

وأنا راضية باللي تبغى , بس لي طلب واحد , نروح عمره كأخر مشوار يجمعنا , وخل يكون ختام حياتنا مسك ..

وافق ورحنا , إعتمرنا وإنتهينا , وقت كنا جالسين قدام الكعبة , قالي يالله يامي نرجع على الفندق ..

قلت لا خلني شويه بس , وكنت أصلي , وقام هو كمان يصلي , بعدين قالي يالله , قلت لا شويه بس ..

مرت ساعتين وإحنا على هذا الوضع ..

بعدين قلت له , تدري أنا كنت دائم اتمنى يختم لي بعمل صالح , وأموت بمكان طاهر زي هذا ..

طلقني هنا , يمكن الله رايد يستجيب دعائي ..!

طالعني وهو ساكت , واصلت كلامي وقلت : منت مصدق إن روحي فيك , وإن رحت عني بتروح معك ,

هذا ماهو بيدي شيء الله حطه بقلبي وعلق روحي فيك ..

وإن كنت خائف تظلمني , أقسم لك بالله بأشرف مكان , إن الظلم اللي ناوي تسويه ,والله ما تزوج بعدك ..

تهلل وجهه , و إنبسط وقالي والعيال ما تبغينهم , قلت : لا , أبغاك أنت ..

" ولو ما كنا بالحرم والناس تطالعنا كان عبرنا عن مشاعرنا بس اجلناها للفندق "


و في الفندق عرض علي فكرة تربية يتيم ,, وافقت , وقال ننزل الحرم نستخير , ونزلنا وإستخرنا ..

ويوم رجعنا بتنا , رحنا الدار , على أنا بنأخذ ولد واحد , ويوم رحنا وشوفنا تؤائم ثنين ولد وبنت عمرهم

أربعة اشهر, طمعنا هو يبغى الولد وأنا ابغى البنت , فقال نأخذهم الإثنين ..

وسميناهم مع إن لهم أسامي بس غيرناها , قلت له بسمي البنت وعد , ياللي أوعدني ,, قال أوعدك :

بالسعد , وسمى الولد سعد ..

بس الدار ما سلمونا إياهم قالوا لازم نخلص الإجراءات ويأخذوا الإثباتات ..

وبعد أربع ايام أو خمسة نستلمهم ..

وأختى بشهرها التاسع قالت بس تولد ترضعهم لنا ..

وأكرر شكري لكل من دعى لي بظهر الغيب ..

وجزاكم الله خير الجزاء على إهتمامكم ..