بتنحل باذن الله
اما برجوعها او بخروجها من حياتك للابد
في كل الحالتين امر المؤمن كله خير
محد يقدر يجبر احد على نفسك
انت وضعت الكره بملعبها
خلاص ركز بنفسك وصحتك
جاهد نفسك واجحد حزنك
خلك قوي وصابر ومتمسك بقربك من الله

عندي خبر ابغى اقوله ، سبق وأنا قلت لكم بأن اخوها يقول اختي احسها نادمه وتكابر ،فقال انصحك راسلها بأنك ترغب بإرجاعها فيكون فيه مجال بيني وبين اختي بأن لما اجي اكلم اختي برجوعها لك ، قد انت راسلتها بانك راغب لرجوعها وقال بسوي نفسي مدري انت راسلتها وطالب ارجاعها او لا ، قال بطريقه غير مباشره
قلت يالله براسلها ، لكن ماضنيت بتوافق على رجوعها
واليوم راسلتها بأني ارغب بإرجاعك
فقلت برسالتي
انا ماانسى العشره الطيبه معاك ولاانسى اجمل ايام عمري معاك،بيض الله وجهك يابنت الأصول،ياما تحملتيني،والحين هذا أنا اشيل همك وأتحملك وأردلك الجميل،عشان كذا اقول لك الله يحييك بأي وقت ومستعد اراجعك وأحبك وابغاك،والعجله والتأخير منك،وسأنتظرك،تذكري ذلك
،،،،،،،،،،،،،،،،،،،،،،،،،،،،،،،،،،،،،،
ردت علي بالرساله الأولى وقالت :
السلام عليكم
لوسمحت ...انا هاذي الفتره محرمة عليك..ولايجوز ترسل برسائل..
وانا الي بيني وبينك انتهى من زمان..ولالي رجعه..لا اليوم ولابكرة..ولابعد عمر...
انت إنسان مت بداخلي ومستحيل احيييك..انصحك لاتنتظر..اقطع حبل الأمل..وتعوض الله...
،،،،،،،،،،،،،،،،،،،،،،،،،،،،،،،،،،
وهي أرسلت الرساله الثانيه وقالت :
الان بيني وبينك الاولاد فقط
ومعاد يربطني رابط فيك ف الحياه...والعده باقي لها شهر ويسير طلاق بائن...
،،،،،،،،،،،،،،،،،،،،،،،،،،،،،،،،،،،،،،
وهي أرسلت الرساله الثالثه وقالت :
والحاجة الثانيه....عفش البيت انت تعرف اش الي لك والي مو لك...فإذا لك شأن في شي منه وتبغاه..ثمنه وخذه
وإذا مالك فيه برسل عمال وأخذ اغراضي..
،،،،،،،،،،،،،،،،،،،،،،،،،،،،،
رديت على رسائلها وأنا قلت
عليكم السلام،العده3شهور او 3حيضات فيكون فيها رجعه اذا وافقتي وإذا انتهت يصبح طلاق بائن،فإن اردتي الرجعه فيصير بعقد جديد،وبعد انتهاء العده انا اصبح اجنبي ومحرم اراسلك او اتصل بك، هذا هو الشرع
،،،،،،،،،،،،،،،،،،،،،،،،،،،،،،،
وراسلتها بالرساله الثانيه وقلت :
وإن حصل الطلقه الثانيه،يكون نفس موضوع الطلقه الاولى بالضبط، وإذا حصل الطلقه الثالثه، يصبح طلاق بائن واكون محرررم عليك ،فإن اردتي الرجوع لي يكون تتزوجين غيري ويعقد عليك ويطلقك ذاك الوقت نفسه
،،،،،،،،،،،،،،،،،،،،،،،،،،،،،،،
وبخصوص رسالتها الثالثه لطلبها العفش
مااارديت عليها ، وعفشها كنب صاله مختصر ومكيف اسبليت وشاشه ومدخل مرآيه (يسمونه منظر)
،،،،،،،،،،،،،،،،،،،،،،،،،،،،،،،،،
طبعا انا اعطيت خبر لأخوها بخصوص رسائلي وردها مني برسائلها ، وقال الله يكتب بما فيه الخير ، وانتظر لحد رمضان لعل وعسى تعود ،
......................... الحين اخواني الاعضاء والمشرفين ، عطوني نصائحكم
انا عن نفسي لحد يقول تزوج ، حاليا مو بالي ، في بالي بعد سنتين ان شاء الله اذا اشتد عظمي وتعدلت بعض الظروف الماديه
ولأن بعد سنتين راح يتخللها اقساط انتهي منها من ضمنها السياره اللي معاي وراح يرجع لراتبي 2000 ، وعلما ماشاء الله انا موظف حكومي بإحدى القطاعات ، عشان كذا انا قلت بعد سنتين راح ابدأ ابحث عن الزواج ، بعد ان اقرر وأخرجها من حياتي
وأنا عارف نفسي ، من اليوم لحد السنتين مستحيل اخرجها من حياتي لعل الله يردها لي ، فقلوبنا بين يدي الله سبحانه، ولانعلم الغيب ،وبالعكس انا لازلت احبها حتى هذي اللحظه، فأعطوني نصايحكم ،،، مع العلم مستحيل عاد اراسلها حتى لو قال اخوها او غيره وقال راسلها ،وأنا راسلتها لعيون اولادي ، وكان نفسي ترجع
شوري علي ياجماعة الخير

معناته اخوها يكذب بانها نادمه وتكابر ويبدو لي انه فعل ذلك بدافع الصلح .. وكذبه حلال بالحاله هذي

اخوي بقولك شي
اي امرأه بالكون اذا وصلت العلاقه مع زوجها الى الخلع فهي خلااص رافضه زوجها بكل الحالات ..

الله يكون بعونك

ماتبيك .. متى تقتنع انها ماتبيك؟

__________________

الله يعوضك ويرزقك الزوجه الصالحه الودود الولود

__________________
اللهم اني استودعك اولادي وبناتي دينهم وآمانتهم اللهم جنبهم الخمر والمسكرات والمخدرات والزنا واللواط والفتن ماظهر منها وما بطن يامن لاتضيع ودائعه

بصراحة وضعك بيزعل يا اخي انت طيب ومن اسلوبك في الكتابة واضح انك على نياتك وقلبك نظيف....

ياما قلنالك طنشها ولاعاد تكتب بس ما بتسمع الكلام. البعض فكرتهم غلط انو لازم يموت نفسه حتى تحن عليه المرأة، اخي اسمع الكلام المرأة ماتحب الي يلتصق فيها تحب الرجل الراكز الثقيل الي هي تدور رضاه، وانت بحالتك اصلا هي ماعاد تبيك سواء متذلل او ثقيل وقالتها لك ولكل الناس ونحن بعد في المنتدى فهمناها هي فعلا ماتبيك فعلى الأقل عز نفسك شوية!

كلامك في الرسالة بالنسبة لها ماهو شي جديد، يعني من جدك محتاج تفسر لها الطلقة الاولى والثانية؟! احسن شي سويته انك مارديت عرسالة العفش.. اذا الرجل مايسوى بنفتك منه ولاهمنا عفش وخرابيط... قبل شوية كانت بتخلعك وانت تعرف شو يعني خلع يعني تتنازل عن حقوقها وتدفعلك من فوق، وبعد ماطلقتها وقدمتلها هالمعروف ببلاش جاية تساوم على العفش.. سبحان الله يالتناقض.. مدري بس والله احسك كثييير على نياتك وبريئ... الي نيته صافية وبريئ وماشي بكل صدق الله بيبعث له اشارات عشان يصحى.. اصحى يا اخي وخلي عنك الخيالات الوردية عن الصبر والتضحية لانهم في غير محلهم بيصيروا ذل وهوان.

__________________
{قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ}

صدق الله العظيم

أجل انسى موضوعها واعتبرها خلاص طلعت من حياتك ولا تتعلق بوهم عسى الله يرزقك ويرزقها من واسع فضله
وبالنسبه للتواصل معها بعد ما تخلص عدتها .. عفوا من قال لك انه حرام في كل الاحوال؟
يا اخي التواصل مع الاجنبيه جائز للضروره مثل تواصلك مع طبيبه أو موظفة استقبال مستشفى واعتبر طليقتك مثل أي وحده اجنبيه تكلمها للضروره
وهي كذلك مثل ما تتواصل مع طبيب او بايع في محل تجاري
بيجيكم وقت بتحتاجون فيه التواصل من اجل الأطفال للضروره شئت ولا أبيت ولا ترفض التواصل بحجة انها محرمه عليك وتفوت مصلحة عيالك ولكن تقدر تقنن التواصل جدا بحيث يكون كتابي عن طريق الواتس او ترسل مقاطع صوتيه
ولا تكلمها مباشرة إلا اذا كنت مضطر جدا .

__________________

ياخوي حرام عليك كفايه اهانة لنفسك!

تخيل لو اهلك درو عنك انك تتوسل لها ترجع. وش موقفك قدام عيالك اذا كبرو ودرو ان ابوهم القوي الشجاع ذل نفسه علشان امهم وهي ماتبي ترجع.

بالنسبة للعفش ارسل لاخوها وقله اذا هي تبي عفشها تعالو وخذوه. ياما قالو لم الاعضاء لا تتواصل معها وانت الله يهديك طنشت النصائح. انت كل شوي تمتب وتقول عطوني نصائحكم لكن ماشفتاك تطبق ولا نصيحه.

اخي الكريم. تخيل الان صورتك قدامها. تلقاها مبسوطه انها تشوفك تتودد لها وتترجاها وترحع مع انها ماتبي ترجع.

ياخي الى هنا وخلاص حنا يالاعضاء انقهرنا علشانك مدري شلون انت ما انقهرت.

مااقدر اعطيك مشوره لكن بختصر لك ماحدث معي وما كنت سأفعله لو كنت مكانك

اقطع التواصل معها نهائيا ترسل رسائل احطها بالدرج انزل عيالي وبعدها الزبالة اعزك الله دون قراءة

اي شي يخص العيال يكلمني رجال اذا هي تواصلت معي كان وقت عدتها ارد بالرفض بعد عدتها رفضت انها تتواصل معي تماما ابوك اخوك موجودين لااشوف رقمك

عيالي ثم عيالي ثم عيالي اوسع صدورهم وامرهم وامشيهم واشتري لهم يطلبون مصروف للملابس وارفض 300 ريال مصروف واطلع بعيالي للسوق اشتري لهم ب 1500 مزاج انا بشتري لهم

من عافنا عفناه مين ماكان وكرامتنا فوق كل اعتبار وماقصرنا معهم وان كان زلات اللسان لاتغتفر فالله لايعيدها

ياخي عيش حياتك سجل بنادي رياضي وغير جو مع اخوياك وخلك حول عيالك دايم وصلى الله وبارك الحياة ماوقفت على زوجة وعيالك بيتعودون

انا كنت اراجع طليقتي بعد الطلاق وتكتب لي كلام اقل من الرسالة اللي جاتك وحسيت اني رامي نفسي عليها علشان ايش لا اشتت عيالي ؟

بتتزوج هي وباخذ عيالي
بيكبرون العيال وباخذهم عندي

ليه الاحق وحدة ماتبيني او تبي تمشي كلمتها علي
من بعد رسالتها ارسلت لها رد واحد فقط

الله يستر عليك ويعوضك خير انتي من اللحظة هذي محرمة علي ولاعاد ابيك

والحمدلله تزوجت وحدة تنحط على الجرح يبرى يالله لك الحمد كنت بنقمه وحياتي قلبت نعمه

ولاتوقعت ان زواجي بتتغير حياتي بهالشكل

والله الكل يقولي تغيرت وأفضل

ياخي حتى عيالي تغيروا كانوا بقمة العصبية والعصيان الحين هدو

الله يصلح حالك بس ارمي الماضي ورا ظهرك وتوكل على الله ان قالت برجع وانت لك خاطر فيها رجعها وان قالت برجع وانت حاس انك عفتها لاترجعها لاعلشان عيالك ولا علشان احد
وان ماقالت برجع خيرة لك ولها

انا مكانك والله بعد هالرسالة خلاص ولا ارد باني بصبر ولا بردك ولا عقد جديد ولا بربسه
ردي يكون الله يستر عليك والله يوفقك مع غيري وأنتهى