المشاركة الأصلية كتبت بواسطة عابرسبيل22

المشاركة الأصلية كتبت بواسطة الماضي الدفين

المشاركة الأصلية كتبت بواسطة بنت الحكمي

الأخت الغاليه صابره بدنيتي ألف حمد الله على وصولك بالسلامه في سفرتك وحشتينا ياحلوه ولماشفت ردودك والله إنه تكدرخاطري منك وعليك منك لأنك صرتي حساسه بزياده يا أختي ليش هالكدر والضيق على شئ ومواقف قد طافت وصارة من الماضي خلاص كل شئ إنتهى بوقته ليش أنتي مضيقه خلقك على شئ قد مضى أولا يا أختي موظف الجوزات لما جلس يسألك هاذي إجرآءت لازم تطبيقها أنتي عارفه كيف الدنيا حوسه والعالم يغلي أكيد لابد من التشديد والرقابه في المطارات على المسافرين وهاذي أسئله روتينيه كان جاوبتيه على قد سؤاله وإذا كان قل إحترامه كان سحبتي نفسك بهدوء بدون ماترفعي صوتك عليه ورحتي لزوجك علشان يتفاهم معاه وأنتي شكلك متوتره أعصابك من قبل السفر وأي شئ صرتي تتحسسي منه
علشان حالتك النفسيه ويمكن الرجل حق الجوازات صوته كذا دايم مرتفع وطبعه كذا مع كل من يتكلم معاه وأنتي فسرتيها إنه سؤ أدب هناك بعض الرجال أصواتهم عاليه وجهورية وخشنه وهاذا طبع فيهم أنا زوجي إللي يسمعه وهو يسولف يقول وش به ذا محرق الدنيا شكله متضارب مع أحد ولو ناداني وأنا في إستراحة المستشفى مع الحريم بس مجرد مايقول أم سلطان إلا الإستراحه كلها تفز وفي البدايه كنت أحس بإحراج من طريقة مناداته لي بهاذي الطريقه قدام الحريم حتى لوأنا ما أعرفهم بس يجلسون يناظرون فيني وأنا طالعه من الإستراحه بنظرات غريبه وقد سبق ونبهته إنه يخفض صوته وقت ماينادي عليه يتعدل فتره ويرجع يحن لطريقته السابقه وأنا صار عندي الوضع عادي ماعدت أعيره أي أهتمام وتعودت علا نبرة صوته صابره موتقولين إني أدافع عن الموظف علشان إنه سعودي وأبرر له موقفه لاوالله بس حبيت أنبهك بالنسبه لزوجك لوكان إنسان عصبي وغير متفاهم وجاء وأعطى الموظف طرااق على وجهه وتماسكوا وتضاربوا قدام الناس وزوجك تعور أو زوجك عور الموظف في كل الحالتين زوجك أما يدخل السجن أو يدخل المستشفى هل هاذا سيسعدك أو يريحك ويحسسك بطعم الإنتصارما أتوقع أبد ياصابره حتى سفرتك ترجعي تكنسليها علشان تطمني على زوجك شوفي ياصابره حنا هنا عندنا السن بالسن والعين بالعين مافيها يمه إرحميني زوجك لو كسر إصبع لرجل كسروا له إصبعه وحتى لو زوجك إنضرب وتعور يعالجونه وبعد مايطيب شالوه لسجن علشان ياخذون حق الموظف إللي إعتدى عليه وضربه وهو يأدي عمله وهاذي فيها حق خاص للموظف وحق عام للحكومه وأنتي ماترضين البهذله على زوجك نرجع لكلامك مع زوجك وقت قال لك أنا ثقتي بك تزعزعت من كل النواحي وأنتي على طول نطيتي للخيانه وقلتي له تتوقع أخونك يعني طيب ليش مافكرتي في شئ غير الخيانه زوجك يقصدك فيه زوجك مثل إن زوجك عجز عن فهمك وماعرف يحل لغزك المحير كل يوم يشوفك على هيئه وكل يوم تتعاملي معاه بأسلوب يختلف عن الثاني يوم تكوني طيبه وحبوبه وهادئه ومعيشاه في نعيم ويوم تكوني عصبيه ونكديه وقالبه عيشته جحيم فصار ماعاد يعرف أي صابره أنتي فيهم مره كذا ومره كذا ولو حصل منك خطأ توعدينه إنك راح تتغيري وتصلحي أخطائك إللي إنتي تشوفينها صح وزوجك يشوفها في وجهة نظره غلط وعليك إصلاحها وهمسه في إذنك وإفهميها وإحفظيها عدل من أخت محبه لك في الله وتريد مصلحتك لو زوجك يشك فيك وماعنده ثقه فيك كان ماخلاك تسافري لديرتك وتجلسي فيها بشهور وتسافري فرنسا لحالك وتجلسي فيها بالأيام لحالك وماخلاك تروحي عمره مكه لحالك وهو عارف إن عندك جميع الوسائل والطرق إللي تتيح لك خيانته بس زوجك إنسان يحبك ويثق فيك ويعرف معدنك الطيب والأصيل ويعرف
إنك إنسانه تضع مخافة الله نصب أعينها ويعرف إن زوجته إنسانه شريفه ونظيفه وطاهره وإنها ماترفع عينها في ماحرم الله ولذلك أعطاك الثقه والأمان وخلاك تسافري وتروحي وتجي وين مابغيتي بدون قيود الحين لك حول ثلاث سنوات متزوجته ورايحه وجايه من ديره لديره والحين توه يشك فيك ما أتوقعها أبد ياصابره بس أنتي صار عقلك يودي ويجيب وصرتي أي تصرف من زوجك تفسرينه إنه قاصدك فيه وإنه
يبغى يطفشك وإنه كل همه مضايقتك علشان أنتي تبعدي عنه وتتركينه شوفي ياحبيبتي ما أتوقع إن زوجك يفكر يتركك أو يتخلى عنك أبد بس أنتي بطريقة تفكيرك هاذي وأسلوب تعاملك معاه بالشكل هاذا يخليه يمل ويطفش منك وساعتها ياصابره الرجل لو فيه شئ براسه ما أحد يقدر يرده
وأنتي الفاصل بينك وبين زوجك باقي كلمه واحده بس ياصابره فأرجوك لاتخلين زوجك ينطقها لأنك أنتي إللي راح تتضرري مو زوجك لأن أنتي كم عمرك الحين وإيش أهدافك من الحياة وش حققتي من أهدافك ما أتوقع إنك حققتي أي هدف منها زوجك محقق أغلب أهدافه وهي متزوج وعنده عيال وعايش ومرتاح ومستقر مع عائلته وما أتوقع ناقصه شئ حتى زواجه منك كان قصده زيادة سعادته ورفاهيته الجسديه والنفسيه وأنا عندي لك حل أخير وحنا قد سبق وتطرقنا له هاذا الحل وأنا ماراح أقوله لك إلا بعد ماتوعديني إنك رايحه تستمعين له زين وتفكرين فيه بعقلك مو بإحساسك ومشاعرك الحياة الزوجية الناجحه لاتأتي في يوم وليله وتحتاج منا صبر وكفاح ومعاناة حتى نصل إلى مبتغانا
وأهدافنا ياصابره أنا أقول لك الصراحه والصدق وأنا أبغى مصلحتك فلاتظني إني مللت منك ومن شكواك لاوالله يا أختي إني أحبك وأريد لك الخير والصلاح وأتمنى لك السعادة
في حياتك وتقبلي تحياتي ولي عوده بإذن الله تعالى .