رد : اعيش صدمة زواجي ، وعدم قناعتي
كنت اكلمه ع الواتس وماكان يرد
لين سألته انه بروح معك لحفلة اختك ولالا
قال بكيفك
ثم سألني انه ليش تأسفتي لي قبل كم يوم ؟
افهم انك عرفتي غلطتك وبتصححين وترجعين لي مطيعة ومثل ماكنتي شهر العسل ؟
قلت انا عارفة خطأي عليك ولاصار اني انكرت
هالشيء ، خفت تكون متنكد ومجروح فتأسفت منك
قال يعني مو عشان ترجعين لي حاليا ؟
قلت ايه *لأن ماكنت متأكدة من مشاعري بخلال هالأربع ايام بس*
قال اللي يريحك سوي اللي تبينه
صارت حفلة اخته واستعديت من بدري واخذت اغراض الحفلة ودقيت له يجي ياخذني
جاء ، ولأول مره كان يكلم وانا معه
كان رااايق ماعرفته ! كان يضحك ويقول لخويه ياعمري وتفداك روحي وو
سكر وقال شخبارك ؟ ان شاء الله تكونين مثلي مبسوطة ومرتااحة
قال تدرين عطوني 3 مخالفات بيوم واحد ومبسووط ماهمني وش يعني لو ضاق صدري بتروح المخالفة ؟ ياخي انبسط وعيش حيااتك
وانا سااكته ومستتتغربة
كان يدندن مع نفسه ويقول ماكنت ابيك تجين ولا اشوفك بس عشانك مواعده اهلي
بعدها لا ابي تدقين لي ولا حتى تكتبين لي واتس ، قلت لو بغيت اطلع وبستأدن منك ؟
قال سامح لك اطلعي وسوي اللي تبين لاتفكرين فيني
ولاتفكرين ترجعين عشاني لو انتي ماتبين
كنت احررق قلبي ويضيق صدري واهين نفسي. ، وش عليه !
شوفي صح انا مازلت ابيك والله يحييك لو رجعتي
بس لو رحتي الله يحفظك ، ممكن انتي تتزوجين وانا بتزوج
اللي كااتبه ربي انا رااضي فيه ومبسووط
وصلنا الشالية قلت بجلس شوي ثم انزل
ضاق صدره اني تنكدت جاء قال هالكلام اللي قلت كان لازم من زمان اقوله سوا لك او لوحدة ثانية غيرك
انا مستحيل ارجع ابادر بكل شيء زي اول
ومستحيل اجيك الا لو صرتي مهمومة وضايقة فيك وغيره لا
انزلي الحين وانبسطي معهم وانسي اللي قلت لك حاليا
نزلت ونزل معي بيغير جوي وشافني بكامل أناقتي
كان يمزح ويستهبل ويضحك ويشوفني حسيت بعيونه اللهفه تمنيت اقرب له واضمه
تمنيت اسحبه من اهله واضمه
احس اشتقت له كثير
لأول مره اتدلع قدامه قاصده ، اتغنج بمشيتي ابي حضنه ، اضحك وانا اشوف عيونه مشتاقة وجالس يتكبر ولأول مره !
يجي شوي يسولف ويروح
ولما جينا نمشي دق لأمه مادق علي ، احس امه حست علينا
نزل اهله بيتهم وصرت انا وياه بس ، قلت وين بتنام قال بيتي
قلت قصدك بيتنا واتدلع وانا اقوله ، قال لأ بيتي لحالي
انتي نامي بغرفتك واستمتعي عند اهلك
ماعلقت ، وكنت مشتاقة له كثيير
حبيبي بنسدح على كتفك تسمح لي ؟ قال لا
هه صدمة ياعالم : )
مسكت يده وانسدحت ع كتفه قلت بنام هنا برتاح
اخذ له لفه وانا منسدحة عليه وكان يسولف من غير مايحط يده ع راسي
قال قبل كم يوم قلت بدلع نفسي وشريت اغراض لي ، لي لحالي اوكي ؟
اذا تبين تستخدمينهم براحتك بس انا مشتريهم لنفسي ، قربنا من بيتي قال تبين ننزل تشوفينهم ؟
قلت اخاف نجيب العيد ، ضحك وقال هذاا اووول صدقيني عمري ماببادر خلاص اول راح
يلا انزلي نشوف الاغراض
نزلني وانا بعبايتي مافتشت ، كان جايب شموع مره رايقة وانا مزاجي شمووع
واشوف الوان وردية وريحة فواحة نسائية
سحبت الشمعة لين عندي وقلت هذي حقت حبيبتك اكيد
اخذها مني قال لي لبيتي انتي مالك شيء
وبكرة راح اسوي لي حفلة صغنونه هنا ولا ابيك تجين
انصدمت ! ليش جالس يقول كذا ؟
قمت وقلت يلا نمشي
وصلنا بيت اهلي قال مثل ماقلت لك لاتدقين ولاترسلين لي نهائي لو حتى جلستي عندهم سنتين
قلت سنتين ؟ قد كلامك عههههه ؟ قال قد ونص
قلت صدقني هذا مو كلامك هذا كلام مستشارين او اخصائيين انت ماتعامل حبيبتك كذا !
قال اذا هي واطيه علي اعاملها بكذا واكثر
انجرحت من هالكلام وانصدمت
تغير باسبوع كليا
مازلت متأكدة انه يحبني ماكرهني بس هالقوة وصرامة هالحكي العنييف من وين !
اشياء كثيرة وتفاصيل اكثر تغيرت
ماهمني ولا تعبني التغير قد ماانه هل
هو تغير فعلا شاف سلبياته وقرر يغير للأفضل ! او نتيجة انه انجرح جدا ؟
خايفة يكون يمثل ومجرد ما اروح ينهاار
فهموني حكاية هالتغير المفاجئ
التعديل الأخير تم بواسطة حيث النقاء ; 29-11-2014 الساعة 10:15 PM