مو كذا القصد ..

يعني الكثير من الفتيات عاشت مع ابوها وامها وابوها من الجيل القديم . وطلباتها مجابة من ابوها . وابوها مدللها كثير ولا يعصب عليها . وتعودت تشوف ابوها يداوم 9 الصباح ويفطر مع زملائه بالعمل ! ويداوم ساعتين ! بس ويأذن الظهر ويفرك من الدوام كل يوم بعد الظهر
ويجيب بناته وعياله من المدارس ويتغدى معهم !

تتزوج والحين اغلب الشباب يعملون ويكدون ولا يرجعون البيت الا قريب المغرب!

ولما تتطلب تتوقع مثل ابوها ! لكن تتفاجأ ان زوجها وحبيبها الي يحبها ما يلبي طلباتها كثر ابوها ! وتزعل وتتضايق وتختلق المشاكل وتنغص الحياة !

وزوجها ما يجي الا قريب المغرب ! وحركات الموظفين القديمة الي خربت البلاد واخرتها لم تعد موجودة . . المرأة الواعية الفاهمة تعرف ان علاقتها مع زوجها شيء ومع والديها شيء آخر ! . لا يمكن المقارنة بينهم .

كل ما اتذكر شي راح اكتبه هنا.

تعلمي استغلال التقنية في صالحك.

توجد تطبيقات على الجوال للازواج للتخطيط المالي وكل شيء. ابحثي عنها وتعلمو استخدامها .

وايضا فيه حاجة مو كويسة وسيئة جدا يسوونها بعض الاخوات. وهي لما تشوف شي مو عاجبها في خطيبها مثلا انه يبي يسكن في مكان ما قريب لاهله، تسكت ولا تقول لا، عشان ما تخسر الخطيب ويتركها ، وتنتظر الى ان تعقد وبعد عقد القران تختلق الخلاف وتطالب بتغيير السكن وكذا.
كل شي اتفقو عليه من بدري نظام اتمسكن حتى اتمكن مو كويس ابدا .


فحص الزواج اول شي تعملوه قبل كل شي. عشان لايطلع فيه شي وتكون يافرحة ما تمت. وتصابون بالصدمة . صاحبي ماطلع متوافق مع زوجته عشان امراض وراثية وابو البنت رفض وكنسل الملكة وهذا قبل الملك باسبوع فقط ! . ودخلو الاثنين في حالة اكتئاب شديد. بعد ان خططو مع بعض لكل شيء وعاشو الاحلام .