السلام عليكم ورحمه الله وبركاته

مشكلتي يا أحبتي واللي أتمنى منكم مشكورين تشورون علي بطريقة لحلها
زوجي يحب يسافر من فترة لفترة بهدف التغيير والترويح عن النفس وعشان يعطي نفسه فرصة يشتاق لنا مع أنه ما يصرح بالسبب دائماً مره يقولي شغل ومره زواج صاحبي وهكذا
وأبداً ما عمري اعترضت لانه من حقه مع أني اسمع تعليقات تسد النفس بخصوص سفراته من جهة قرايبي واعديها
قبل 6 شهور سافر مع والديه للعلاج لدوله سمعتها سيئه وما اعترضت بالعكس فرحت له خاصه انه من زمان في خاطره هالسفره مع اهله
لما كان مسافر زار طبيبين كل واحد فيهم شخص الصداع اللي يجيه بطريقة واحد قاله شقيقة والدكتور الثاني ضرب له في راسه إبر مسكنه وسوى له تنظيف للدم
المهم بعد رجعته كان وضعه في البدايه تمام يأخذ ادويته وكانت قويه الى ان ترك الكورس لانه تعبه
الي صار يا حبايبي انه خلال الشهر اللي فات حجز لدولتين دولة رايح لها شغل تقريبا 10 ايام وبعدها بيروح اسبوع للدولة الي سافر لها سابقاً بعذر أخذ الجلسة الثانيه من إبر العلاج يعني مجموع الأيام اللي راح يغيبها 17 يوم
انا اعترضت ع الأيام لانها كثيرة وانا سبق ونبهته ع الموضوع هذا وقلت له فوق الأسبوع الى ع 10ماني راضية انا زوجة ولي حقوق بس هو طنش ولا اهتم واللي حز بخاطري اكثر انه كان بياخذ صاحبه معاه كل المده بس صاحبة اعتذر لان المده كثيرة وقاله كفايه 10 ايام💔
الشي الثاني قبل فترة جواله كان مع ابني وصدفت فتح محادثه له مع قروب لاصحابه دائماً كنت اعترض ع اسم القروب واللي اخجل من كتابته شد انتباهي جمله ذكرها زوجي فاخذت الجوال من يد ابني وقريت المكتوب وكان زوجي كاتب لاصحابه انه يبغاهم يسافرون معاه وانه محتاج شيمي.. 😳
انا هنا تقرفت منه وقلت له ع اللي شفته وبينت له أني متقرفه وهو كان رده انه مزح وهذا عادي بين الشباب
من بعدها تفتحت عندي كل ملفات اخطاء زوجي والاشياء اللي ما كنت ادقق عليها بدافع انه في ثقة
وقررت أني أرسل رساله مضمونها انه اذا انت لسا مصر ع سفرة " البلد الثاني" انساني
من بعدها اعترف بخطئي صرت أفتش من فترة لفترة وكأني أدور له عذر او مخرج او حتى رساله تمحي الجرح البسيط اللي سببه وأتمنى انه ما يكبر
وجدت في نفس القروب عبارات بين أصحابهم في القروب ومقاطع غير أخلاقية وانه واحد من أصحابه عزم انه يرافقه بالرحله للبلد الي رايح يعالج فيها
تاكدت انه مصر ع الروحة وان كلامي زي عدمه
قررت في نفسي أني اساله قبل يسافر عن مدى تأكده من تحمل نتايج قراره للسفر وعليه سأنفذ قراري
مع العلم انه في اكثر من مره أمسك عليه أشياء يلاقي له مخرج منها سواء صدق او كذب وانا امشي الأمور تندمت ع طريقتي ربما لا تصلح في التعامل معه لأنها ريحته بالمقابل سببت لي القولون وصارت الدمعة ما تفارق مخدتي.
ايش رأيكم هل انا في قراري على خطا ؟ طريقتي في التعامل معه صحيحة ؟ وإذا صحيحة ليش تعبتني ؟

(تم تعديل العنوان ليتناسب مع المضمون)