انا عندي تحفظ على بعض الناس لما يجون يسألون عن واحد وطريقة الأسئلة وطريقة الإجابة واعتقد مثل ماقالوا الأخوان مافيه أحد كامل والشخص لو يبي يطلع عيب في اي شخص راح يحصل مئات العيوب مثل ما قالوا في الورد ان كله شوك .

أتذكر سالفة صارت لشخص قريب وعزيز لما خطب بنت ناس واتصل علي أبوها واستفسر فقلت له انا راح اكون صادق معاك تفضل اسئل فلما سألني.. قال يسافر للخارج ؟ قلت ايه ، قال يصلي كل الصلوات في مسجدهم ؟ قلت لأ ، قال هو من البيت للمسجد والا له روحات وطلعات؟ قلت له له روحات وطلعات . قال جزاك الله خير على صدقك .. فقلت له لكن عندي مبررات اقدر اقولها لك .. قال تفضل
قلت هو يسافر للخارج مع أهله ومعي انا شخصيا وماعتقد فيه ناس كثير ماتسافر للخارج فالموضوع قديم شوي " سالفة السفر "
وبالنسبة للصلاة ما يصليها في مسجدهم لأن عنده دوامين فالظهر والعصر في الدوام والمغرب والعشا في الدوام الثاني وبكذا مافيه احد يشوفه في المسجد مع ان الرجل يصلي وان اشهد

بالنسبة للروحات والجيات والتمشيات .. أمانه من اللي فينا مايطلع ما يروح مطاعم ما يتمشى مع اصحابه احنا محنا متزوجين احنا لسه عزاب لازم نطلع ونتمشى .
قال جزاك الله خير والحمد لله وافقوا عليه وحاليا عنده ولد

الشاهد في الموضوع .. لما أحد يسألك جاوب بصدق ولا تبالغ في اشياء بسيطة او غير مستمرة حتى لو كانت سيئة وحط في بالك انك الشخص هذا راح يتزوج ويمكن تكون عقبة في طريقه لاعفاف نفسه فلا تظلم الولد ولا تظلم البنت وابتعد عن المبالغة في الدين فكل شي وسط مبروك ومستحب

وبالتوفيق للجميع