مساء الخير عالجميع..
لثقتي بمنتداكم ومرتاديه حبيت اعرض عليكم مشكلتي واتمنى منكم مساعدتي فانا في حيره ...
قبل مااقول المشكله ابعطيكم بعض مواصفات زوجي الزينه والشينه عشان تقدرون تحكمون ..
زوجيمن النوع اللي مثل مايقولون فري عادي عنده اكشف اتغطى البس قصير طويل بنطلون غيره مايمانع هذا مايعني اني مستغله هالشي او شايفته ميزه او عيب انا اصف فقط
يهتم بنفسه كثير من ناحيه الشكل كلامه حلو لاكن في بعض المواقف فقط يعني مثلا اذا دقيت عليه او هو اتصل يرد
هلا جبيبتي
هلا عمري
كريم
واذا زعل مايرفع صوته بس يقول كلام ماينطاق مثل
حريم
طبعا يقولها بصيغة استصغار او السخريه
او انا مااحب الحرمه الغبيه
....
اذا بغيت اناقشه بموضوع اما يرد بطيب خلاص كل اللي تبينه بيصير من باب التسكيت لاني طبعا مااشوف شي يتغير
او
يعصب ويطلع من يوم ابدا اتكلم ويرفض الكلام
طبعا بتقولون اختاري الوقت والاسلوب
مابقيت وقت ماجربته وما بقيت اسلوب ماجربته اذا رجع اقول هاه يفلان ممكن نتكلم يرفع صوته وبلهجه حاده يقول لو سمحتي ماني فاضي ابغى انام اقول له طيب ممكن تعطيني عشر دقايق اقولك اللي عندي وعقب نام يقول ان ماسكتتي بطلع انام بالصاله
ولا يجلس يسمعني ويقول انتي مين حاشي راسك
العلاقه الوديه بيننا مقطوعه يعني مثلا مزح مرح مافيه يعني ماكانه زوجي العلاقه رسميه نوعا ما
ومن ناحية العلاقه الحميمة مايحصل بيننا شي الا كل ابوعين مره واحيانا ثلاث او اكثر
غيره
عنده جوالين ومقفله برقم سري
ولما سالته قال انتي مريضه شهالتفكير وطلبت منه يخليهم بدون رقم سري قال انا اقدر افتحهم واخلي ثالث بالسياره وانتي ماتدرين ارضي فيهم كذا احسن لك
اذا جاه اتصال اما مايرد واذا سالته يقول هذا واحد بالشني وماابي ارد عليه او يرد ويرفع صوت التلفزيون مع اني اللي اعرفه ان الناس اذا جت تكلم توطي الصوت
او مايرد وعقب عشر دقايق ياخذ جواله ويطلع من البيت واكثر الاوقات اذا فتح باب البيت داخل من الدوام يكون ينهي مكالمه
غيره
ا فتح المسن ممنوع اجلس جنبه والتبرير يمكن واحد من زملائي عنده سر مايبي احد يعرفه طبعا كل هالاشياء زرعت بيننا بذره شك او على الاقل عندي
غيره اذا مارحت لاهلي فتره طويله يقول ليه ماتروحين لاهلك روحي ونامي عندهم
واذا رحت ورجعت لبيتي الاقيه مقفل على نفسه غرفة النوم ولما سالته قال انا متعود كذا قلت له طيب اذا قفلت اسحب مفتاحك عشان افتح انا بمفتاحي قال لاانا متعود اصلا كذا من يوم اني عزوبي مع ان الشي هذا ماشفته الا قريب وللعلم انا صار لي ثمان سنين متزوجته
غيره
سمعت له مره اتصال مع بنت ولما سالته قال تتوهمين مع ان اختي بعد سمعته مره يكلم بنت
غيره
طريقة تربيته للبنات جدا سيئه دائما يخانقهم
وينفر فيهم
واذا دخل البيت يجلس في غرفته
حتى لو جيته المغرب ومايبيهم يدخلون عنده واذا دخلة تهزئ فيهم طول الوقت واذا كلمته انه يحسن من طريقة تربيته لهم وان الواحد كل ماكان قريب من اولاده يكسبهم وان احنا لازم نزع فيهم الثقه بانفسهم زعل وقال عيالي مثل ماهم عيالي ومو انتي اللي تعلميني التربيه
انسان متناقض
اللي يبغاه اليوم يخاصم عليه بكرا
غيره
دائما حسسني انه متفضل علي بعيشتي معه وبما يعطيني
ودائما يردد علي احمدي ربك اني اخذتك
وغيرك يتمناني
او انتم حريم تنكرون العشير واذا سالته ليه تقول كذا انا شسويت يقول هذا كلام الرسول يتناقشين الرسول الرسول مايقول شي خطا
وبشكل عام عايش حياته برا البيت وتاركني
وللعلم انا شكليا مافيني شي وحلوه هذا اللي اسمعه من غيري وحبوبه واندمج مع الناس بسرعه
ولا واسمع بعد من غيري اني دكيه او تفكيري حلو
الان المشكله
انا ماعاد اتحمل الجمود اللي بحياتي
علاقتي الوديه ان صح التعبير مقطوعه من اخذته مافيه لامزح ولا مرح
ابي احس اني زوجه
اشتهيت مره يقول لي بي اطلع معاك لحالنا مافيه اذا رحت لاهلي فترة الاربعين مايجي الا اذا طلبت منه
اجلس عند اهلي بالاسبوعين اوقات بالاجازات اشتهيت مره يقول لي متى تجين او بجي اخذك نطلع انا وياك ماعمره قالها
ولما اساله انا عاجبتك ولا فيني عيب يقول بالعكس كل اللي اتمناه لقيته فيك واكثر
العلاقه الحميمة مثل ماسبق وان ذكرت
تعبت من المذله بانه عايش معي او مااخذني او معطيني
تعبت من الشك طول الوقت افكر مين اللي اتصل وليه طلع من هالاتصال مع اني يشهد الله مو شكاكه
بالعكس هو لظروف عمله يظطر يكلم حريم وكثير اوقات اذا اتصلو اطلع واترك له الغرفه عشان مايحس اني اراقبه او مو واثقه فيه بس بدات تظهر تصرفات شككتني
الحاصل قلت له بروح بيت اهلي متضايقه
قال شفيك
قلت متضايقه
قال ا عندك شي مزعلك
قلت مافيني اتكلم اروح لبيت اهلي وعقب اقولك
رحت لبيت اهلي ثالث يوم اتصلت فيه وقلت كل اللي عندي وهو الكلام اللي قريتوه

وقلت له هلاشياء مضايقتني
قفلنا وجلسنا اسبوع تقريبا لاكلمته ولا كلمني
ولما عرفو اهلي واهله حاولو يتدخلون
صارو يكلمونه يقولون له رح لزوجتك تفاهم معاها ورافض يقول اذا تبيني تجي لبيتي تتفاهم معي
يجي يوصل لباب بيت اهلي يحط بناته ويروح نزلت له امي تترجاه يدخل
قال مو انا مو فلان اللي يدخل
يحطهم ويروح
جلسنا اسبوع تقريبا وعقب كلم اخوي يقول له انا ماادري وش فيها مع اني قايلة له وقال كلمها شف وش تبي ورد لي حسيت بهالكلام ماعنده استعداد يتغير اولا ولا فيه معزه لي ثانيا
مع اني اشوف انه من الطبيعي واذا هو شاريني بل وابسط حقوقي وحتى اللي مايحب زوجته يروح لها لبيت اهلها يتفاهم معاها
صارو اهلي يقولون روحي له للبيت تفاهمي معه وانا رافضه طبعا لان الفكره خطا
اولا من حقي انه يجي
ثانيا نفترض اني رحت وماتقبل كلامي البس عباتي وارجع مثلا ولا شلون
او قال هذا انا تبين ولا بكيفك ارجع ولا اقعد ولا ؟؟؟
الان انا محتاره جدا
اعتقد انه من حقي اطلب زوج ودود وعلاقه حميمة سليمه او على الاقل اشوف اللي يحسسني انه فعلا يحبني مو كلام
ونفسي طايبه وماني غارفه مين الصح ومين الخطا
هل اسبا بي تستحق الطلاق او لا
هل اذا رجعت راح اقدر اكمل ولا بيجي يوم واقول كفايه مثل ماحصل الان
اتمنى منكم تساعدوني وتقولون رايكم مع العلم اني من قبل لااتزوجه اتفقت معاه اني مااطبخ وانه يجيب لي شغاله ووافق اوقات يقول انا اصلا ماابيك تطبخين شغاله هي اللي تطبخ واوقات يزعل ويقول اطبخي