أختي ما دام بقيت شايفة الطلاق هو النهاية الحتميه لموضوعك مش هتخسري كتير إذا جربت مرة كمان ، و بعدين مين قالك إنك لما تطلبي الطلاق هينولهولك بسرعة النوع ده ممكن يماطل و يتعبك أكتر فجربي و إن شاء الله مش هتخسري

اهمليه ،، حسسيه إنه شئ مش مهم في حياتك ،، خليه يعرف و يتأكد بطرق غير مباشرة (عن طريق همزة وصل ما بينكم ، أو حتى طرق مصطنعه) إنك بدأت تشوفي حياتك و إنك بدأت تتغيري
إذا كان جسمك مليان ابدأي خسي
و إذا كان الشغل أفقدك جزء من اهتمامك بنفسك روحي ظبطي كل حاجه ضايعه منك (بدل ما الفلوس بياخدها و يصرفها على واحده تانيه اتمتعي انت بيها) اشتري لبس جديد روحي للكوافير ، و ما دام هو مش بيجي غير كل فترة بعيده هيلاحظ التغيير الكامل ده
شيلي عن ملامحك الحزن ، واهتمي بأطفالك جداً لكن اليوم اللي يكون جي فيه حسسيه إنك مهمله فيهم لأنك بدأت تشوفي نفسك
و كمان اليوم اللي هيجي فيه ، حاولي ترجعي شئ من الماضي ما بينكم ،، البسي شئ بيحبه حطي برفان كنت بتحطيه زمان و كان بيعجبه ،، حطي make_up حلو أوي و يكون على آخر موضه ،، و انت أدرى باللي كان بيحب يشوفه فيك

أما بقه عن أهم خطوة فإوعي تنسي علاقتك بالخلاق الكريم ،، يا أختي صدقيني عمرها ما بتديق غير لما بتفرج بس لازم نصبر . أنا عارفه إن الصبر مش هين بس علشان هو مش هين و صعب ربنا قال (إنما يوف الصابرون أجرهم من غير حساب)
صلي كتير ،، صلي ركعتين بنية إنهم قضاء حاجه و في آخرهم إدعي بكل اللي نفسك فيه ،، و إذا كنت بتعزيه و لو معزة بسيطه إدعيله ربنا يهديه ،،، ادعي بكل الهم و الحرقة اللي في قلبك و ربنا عمره ما هيسيبك
ادعي الفتاح يفتح عليك أبواب رحمته و مغفرته
ادعي العزيز يعزك و يرفع الذل ده عنك
ادعي الحق ياخدلك حقك أخذ عزيز مقتدر
ادعي الجبار يجبر كسرك و يجبر بخاطرك

و في النهاية مش تدعي عليه خليه حسابه لربه و مش تنسي الآيه اللي بتقول فيما معناه -واعذريني على عدم الحفظ- (و أخذنا منهم ميثاقاً غليظاً) و الميثاق ده هو ميثاق الجواز و ربنا بيوجه الخطاب فيه للرجال إن العقد اللي بيستهين بيه ده عند ربنا حسابه غليظ يعني مش هين و إذا كان رضى الراجل سبب في دخول الست الجنه فرضى الزوجه سبب لزحزحة الرجل عن النار

و بعد كل الرغي ده سامحيني على إني طولت ،، بس هطلب منك طلب صغير، بس كبير أوي عندي

أرجوك إدعيلي ،، إنت مظلومة و دعوة المظلوم ليس بينها و بين الله حجاب ،، أرجوك ادعيلي ربنا يفك كربي و كرب أهلي ،، أنا في أمس دعوة منك و ربنا يجزيك الخير و يلهمك الصبر إن شاء الله