__________________

الحمد لله رب العالمين

__________________
انا لله وانا اليه راجعون

مرحباً بالجميع اخوان واخوات عزيزين على قلبي لما لكم من فضل بعد الله في توجيهي

مازلت انتظر رايكم في الهديه وهل اعزمه ولا لا لان زوجي مشكلته مايلتزم بالمواعيد ولو ماربطته بعشاء وعزيمه ماراح يحضر الا متاخر وهذا اللي مخوفني او ممكن يسافر

المهم :
سالتوني عن سر هدوءي واستقرار حياتي السر في الراحه النفسيه والطناش والبرود انا عن نفسي نار شابه عصبيه وحاره ونظاميه واحب كل شي يخلص بوقته ومخلصه جداا في عملي يعني اذا مسكت شي لازم اخلصه ((برج العذراء))

زوجي بارد قالب ثلج متحرك اللي يخلص اليوم يجلس تحت يده سنه ضروريات عندي بالنسبه له ثانويات وهنا سبب مشاكلنا شارفت ع الجنون لحد ماعرفت كيف اتعامل معاه

تعبت كثير بس طلعت بنتيجه وهذا المهم بضرب لكم امثله لعل احد يستفيد بعدي

مثلا لو جيت اربي ولدي على غلط كان يتدخل ويستفزني وتقلب هوشه بيني وبينه والولد بينا وهذا غلط صرت اكبر عقلي انا ولااتدخل في ولدي وهو موجود اعلم ولدي اذا ابوه مو فيه لو جلسنا ع السفره انا احب اوكل ولدي بنفسي ولاابيه يخرب وهو عادي عنده مايهمه صرت اجيب صحن ولدي واجلسه جنب ابوه واقوله وكله انت عشان يحس فيك وتراه يحبك ومن هالصواريخ عشان ابيه يحس ان الطفل مايصلح ياكل بدون ظوابط كان يخليه يكب ويحوس ويلعب بالاكل كنت اقرف اكل معاهم واضرب ولدي اذا طلع ابوه واتهاوش معاه ومااستفدت اي حاجه

بعد ماصار هو يوكله واحيان ولدي يحوس لبس ابوه صار يقول وكليه قبلنا بوقت عشان لاحطينا الاكل مايشتهي ياكل وارتحت انا من النكد وصار ولدي هادي اكثر اعطيه غداه قبلنا بساعه كذا ونحط الغدى وهو يلعب ولاهمه خلاص شبعان ومرتاح

يعني صرت امثل دور اني بارده مايستفزني شي ماعاد ارد عليه تخرب الحاجه بالبيت ابلغه يصلحها او اطنش واسوي انها عادي مو ضروريه ابد ويروح يصلحها بدون مشاكل

من ناحية اهله كانو قارفيني في حياتي كل شوي مشاكل واقوله ومايصدقني ابد عجزت احاول اقنعه انهم يكرهوني واني لازم اتجنبهم وكان مايصدق ابد المهم جلست ادعي ربي ليل نهار انه يكشف امرهم له ويصدقني لو مره وان ربي يفتح عيونه على مواقفهم معاي ماهو هدفي انه يكرههم او يتهاوش معاهم بس كنت ابيه يسمح لي ابتعد عنهم

وبطلت اسلوب قالو وحطو وفعلو واني مظلومه وكذا لحد مامر عليه كذا موقف وعرف انهم ناوين يدمرون حياتي وامرني مااروح الا بالمناسبات وانه هو الرجال وياخذ لي حقي


الحمدلله على كل حال

المواقف كثير بس عطوني افكار عشان ارتب حفله واعطيكم غيرها(استغلال) ههههههااي

ايش رأيك تخليها مفآجئة له وهو جاي ليومك عاد شوفي متى يجئ عشاء او غداء..

وقتها رتبي عشاك بالبيت أفضل دام يتبع حمية ..

والأطباق اللي يحبها ، مع عصير يحبه سويه بنفسك

مع الكيك بس يكون من برا أفضل عشان الشكل

ورتبي البيت بالطريقة التي تحبيها ...

أحيان لما تكون بسيطة وتجي فجأة لها طعم أكثر ..

الهدية ، دام جايين على عيد ههههه بيخليها حركاتهم

، ايش رأيك بشمآغ مثلا مع قلم أو كبك أو مسبحة غالب عمره يستخدموها..

أو عادي تكتفي بشيء واحد حسب الميزانيه ..

حاولي تكون الهديه قريب من حقته قبل ، عشان يستخدمها ...

__________________

التعايش امر جميل وبديع.. ومبدء التعايش ياخذ ويعطي.. لكن استعيني بالله وتمرسي على مرونة المواقف واستخدميها في صالحك


تمنياتي لك بالتوفيق

__________________
ان انت اكرمت الكريم ملكته.. وان انت اكرمت اللئيم تمردَ!!