الأخت الغاليه soul حياك الله في قسم المتزوجين السعيدين والتعيسين في هاذا القسم هناك شاكي همه وهناك من يحاكي سعادته شوفي ياحبيبتي أنا لو أجلس أحكي لك إلين بكره ماراح أخلص بس باخذ قسمي وقسم الأعضاء الباقين علشان أشوف فطاحلة قسم المتزوجين ماشاركوا والمشاركات أشوفها قليله شوي
فعلشان ما تتعقدي وتقولى ليش ماردوا عليه المتزوجين
وتظني إن الحياة بعد الزواج تعيسه وإنها هم وغم لا لا ياعمري الحياة بعد الزواج نعيم وجنة الدنيا وسعاده لاتوصف أبد أول شئ إستقلاليه وإنفراد بحريتك في بيتك وراحه نفسيه وكلمتك مسموعه وطلباتك مجابه ولك شخصيه وعندك زوجك حبيبك كل ماقلتي فلان قال سمي ياعمري آمري وتدللي ياعيون فلان وبتعيشين في سعاده وحياة هنيه بس بشروط أول شئ الحب والتفاهم ثاني شئ الصراحه في مابينكم كل واحد يشرح لثاني وش يحب وإيش يكره ثالث شئ الإحترام والتقدير كل واحد فيكم يراعي شعور الآخر
رابع شئ الموده والرحمه في مابينكم كل واحد يقدر ظروف الثاني إذا مرض أو أحتاجه في شئ خامس شئ ترك الغيره الزايده والعصبيه والإنفعال الزايد وإذا أحد غلط الثاني يتحمل ويعذره ويعاتبه بلطف على إللي صار في وقت يكون رايق سادسا الإهتمام كل واحد يهتم بالثاني مثلا هو يهتم فيك وفي طلباتك وإهتمامه بك كلجلوس معك ويطلعك زيارات لأهلك ولأي مكان ترغبين فيه ويدلعك وأنت تهتمي في بيته وأكله وشربه ولبسه وسعادته وتكوني خير زوجه لزوجها وأهم شئ إغلاق الإذنان من كل جانب أهله وأهلك وعيشوا حياتكم بدون تدخلات الأهالي حتى لو فرضا صارت بينكم مشكله لاتطلع خارج نطاق التغطيه أحصريها أنت وزوجك وحلوها على رواق بينكم وأسراركم قفلوا عليها بحجرة النوم لاتطلع للخارج أبد وفيه أشياء واجد بعد بس أخاف أطول عليك طبعا المسؤ ليه الكبيره تجي مع العيال أكثر شئ لأنهم يحتاجوا إهتمام وتربية فياخذوا كل الوقت منك وتحسي إنك كثرت مسؤلياتك وأشغالك بس لما تشوفي عيالك قدامك طيبين ومبسوطين رايحه تنبسطي وتفرحي فيهم لأنهم زينة الحياة الدنيا ووجود الأطفال في حياتك سيمدك ببذل المزيد من العطاء في حياتك وينسيك كل آلام التعب والمشقه في رعايتهم وتربيتهم بإذن الله تعالى شوفي أنت تزوجتي وأنت بنت ناضجه وفاهمه الحياة عدل لاكن أنا يوم تزوجت كان عمري أربعة عشر عام فقط وزوجي في العشرينات وكانت حياتي كلها لعب وجنان وطفوله ما أعرف إيش معنى الزواج والمسؤليه أتذكر أول طبخه طبختها لزوجي بعد ثلاث سنوات من زواجنا وأذكرها للآن كبسة رز ولحم وجبت الرز له هريسه كيف هريسه عجينه وزياده مالح ما أعرف شئ أبد أول شئ كنت عند أهلي وماشاء الله الوالده وأختي الكبيره كل شغل البيت عليهم وأنا حتى إبريق الشاي ما ألمسه جلسه ومتابعة التلفزيون الكراتين المدبلجه بداية بلينا وعدنان ونهاية بسالي والكابتن ماجد وقرانديزر كنا نتضارب أنا وإخواني من يجلس أقرب واحد عند التلفزيون ولعب أونو مسكين زوجي قد شحططه شحططه وأحيانا أخليه يتابع معي وإلا يحل لي واجبات المدرسه ولوخلص واجباتي أخليه يحل واجبات أختي إللي أصغر مني وأنا ألعب معاها أونو
وهو يحل في الواجبات حقتنا بس بصراحه الله يخليه ويحفظه كان ماخذني على قد عقلي ويسايرني وكأنه مولدين أنا وهو مع بعض كان يلعب معي الطش ولعبة حاكم ومستشار ولص وجلاد وسجان
ويلعب معي أنا وإخواني كوره
ويتمرجح بالمراجيح معنا وبصراحه كان مبدع وهاذا إللي حببني فيه بزياده كان أبوي الله يرحمه يعصب عليه ويصارخ ويهزئني ويقول أنت كبرتي خلاص عندك زوج لازم تهتمين فيه وأنت عايشه كأنك طفله وكنت أزعل وأتضايق ومن زود
الدلاخه وكبر عقلي كنت أقول لأبوي طيب أنا أعلم فلان قصدي زوجي أخليه يتفاهم معاك قال لي خليه يجي والله غير أخلي سلك الكهرباء ينرسم بظهرك أنت وياه وزوجي ولد عمي أخو أبوي كان يقول لي أبوي كله من زوجك حسبته يعقلك إلا زادك هبال على هبال زوجك هو اللي يبغى له تربيه من أول وجديد وكنت مسوية نفسي فاهمه أشيل ملابس زوجي وأغسلها بصابون تايد كلوركس وما أشطفها من الصابون أشوفها نظفت خلاص أحطها بالنشافه وعلى طول أنشرها على الحبل بالحوش ما أحط لها مويه صافيه وأغسلها مرة ثانيه أشطفها من الصابون لا ما يصير
وزوجي مسكين أكلته الحساسيه بجسمه وكان يهرش حكه في جسمه ليل ونهار وماأحد عرف وش سببها إلا مرة جت عندي أختي إللي أكبر مني بتغسل ملابس إخواني وجلست تسولف معي على بيل ما أخلص غسيل وشافت طريقة غسيلي لملابس زوجي وإنها تصيح عليه لا موكذا تسوين لازم تشطفينها بمويه ثانيه وثالثه حتى تنظف من الصابون والكلوركس قالت لي مسكين زوجك ماينلام قالت أمي إن جسمه كله حساسيه أكيد من طريقتك هاذي وبعدها جلست تقول لي كيف أغسل الملابس وطريقت شطفها وطبعا أخذت منها تعهدإنها ماتفضحني عند أمي وإخواني وبصراحة أقولك حياتي كلها مقالب ونكت والحين متزوجه لي حول واحد وعشرين سنه بس ولله الحمد عايشه في راحه وسعاده لاتوصف وعندي خمسه عيال وزوجي مازال في نفس فرفشته وسعة باله وطيبة قلبه وحبه وإخلاصه ووفائه لي الله يحفظه ويخليه لي ولعيالي ولايحرمني منه يارب فالزاو ج حلو والحياة بعد الزواج راحة نفسيه وسعاده وإستقرارأهم شئ أنت تكون إنسان متفائل بالحياة وعازم على النجاح ومصمم على التفوق في مستقبلك وعالمك الجديد أختي أتمنا إني أفدتك ولو بالقليل ولو إني أطلت عليك بس شفتك تسألين أنت والبنات قلت خلني أرد عليهم إن شاء الله يستفيدوا أسأل الله أن يتمم لكم أنت وزوجك ويجمعكم على خير وسعاده إن شاء الله .
__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق
اشهد ان لا إله إلا الله وأن محمد رسول الله
07-01-2011, 02:09 AM
ضوابط المشاركة
العرض العادي
