خذي طلة سرعة على مواضيعي السابقة
بتشوفينها تدور حول محور واحد - تقريباً - ألا وهو رغبتي بإحتواءه لي ومداراة مشاعري .
إحدى البنات هني في المنتدى الله يذكرها بالخير آفاق المجد
عطتني مثال كان فعلاً على الوتر :
+ تخيلي ...عندج بنت حلوة ، طبعاً بديهياً تحبينها كونها بنتج ، تمام ؟
لكن هذي البنت طول اليوم تركض وراج ..
يمه احضنيني
يمه تعالي جنبي
يمه بوسيني
يمه قوليلي قصة
يمه نامي عندي
يمه آنه متضايقة
يمه آنه خايفة
تروحين المطبخ وراج .. تروحين الغرفة وراج ، تطيرين للسماء هم تطير وراج ، وكل هذا وهي تحن وتزن فون راسج وتبيج على طول جنبها ، وعلى طول محتاجة لج وعلى طول تبي منج مداراة وحنية ...
تحبينها ؟ طبعاً تحبينها ، لكن تتضايقين منها ، تنفرين من تصرفاتها ومن ركضتها الدايمة وراج
وهم الأخ مثابر يزاه الله خير هم عطاني مثال ، قال :
بما معناه ، طالع مع ولده حق مشوار ، وطول الطريج ولده يسأله عن هالمشوار
وين يصير ، متى بنوصل ووو إلخ
لحد ما طلع من طوره وصرخ في وجهه
يكرهه ؟ لا اكيد لا ، لكن مل من كثر الإلحاح بالحديث عن الأمر وطلب تفاصيل...
وهم اللطيفة انلمتيد قالت لي :
الزوج يبي اللي يبحث عنها يدورها يركض وراها ، ويمل من الزوجة اللي كل ما طلبها لقاها
.
.
ممكن تتسائلين : يحبني ؟
نعم يحبج ، بس تملل ... وآنه هم يحبني بس " لاعت جبده "
.
.
حبيبتي ، آنه كنت ملتصقة في زوجي لدرجة لو يفتح الثلاجة إحتمال يلاقيني داخلها انتظره ، لو يفتح حنفية الماي اطلع له .... تعرفين اللي يقول بكل مكان اطلع لك ؟ .. مو معطيته مجال يتنفس .. اراقبه .. اشوفه مرة شهيق ومرة زفير .. لو مرة اخذ شهيق مرتين وراء بعض بدون زفير اقول له : حبيبي ، ليش تغيرت عملية التنفس عندك ؟ - طبعاً مبالغة بس عشان اوريج شلون خانقته - اشوفه متى دخل الواتس اب متى طلع .. اعرف تاريخ كل شيء يخصه ، صرت له رزنامة من كثر ما اراقبه ، إذا نسى ان عنده اجتماع انه عند ويهه اذكره لو لو لو ....
لو آنه مكانه ما اتحملني يوم كامل
بس تعرفين اللي يقول ( كفـ " ــن " صفعني نفعني ؟ )
لا تنتظرين إن تتلقين صفعة عشان توتعين حق نفسج ..
ترى الأمر مؤلم ، فجأة تحسين إن ما تقدرين تنطلقين في مشاعرج مثل قبل
تحسين فيه حاجز مريح للنفسية بس مؤلم للقلب ...
صحيح مع الوقت يصبح الشيء هم مريح للقلب
الحب يختفي ؟ لا ما يختفي ، بس وقتها تعرفين متى تظهرينه ومتى تخفينه
ومع الوقت الزوج اللي كان يهرب ، هو نفسه اللي يقبل عليج
وتصيرين متوازنة في مشاعرج ...
انتي ترتاحين ، وهو يرتاح ..
انشغلي بنفسج بأي شيء يخصج ... كنت احس الأمر صعب التطبيق
بس ألحين وآنه اكلمج .. هو موجود ما اهملته صحيح ، بس مو طول الوقت علة على جبده
ترى حتى آنه وانتي وغيرنا ... لو احد يلاحقنا وملتصق فينا بهالطريقة نمل منه
كانت لي صديقة ، اذا تكلمني واتس اب وتقول السلام عليكم وارد عليها وعليكم السلام
فعلاً واللي رفع السماء تظل يومين وراء بعض تكلمني ما تغفل عني الا شيء بسيط وترجع تكلمني .. تكتب لي تصبحين على خير واذا شافتني اون لاين مرة ثانية ترجع تكتب لي ليش ما نمتي شتسوين شلونج وووو إلخ .. احبها بس مليت منها
يوم خف التصاقها فيني صرت اكلمها بشكل طبيعي ....
ادري طولت ، بس اتضايق اذا شفت احد مثل وضعي السابق