بموت من القهر - الصفحة 2 - منتدى عالم الأسرة والمجتمع

19-02-2012, 05:27 AM

استغفر اللـه

عضو جديد

تاريخ التسجيل: Feb 2012

المشاركات: 1

بموت من القهر

السلآمـ عليكمـ ورحمة الله وبركآته ..

صبآحكم راحة بال ..

شفت منتدآكم وشفت فيه ناس ماشاء الله كفئ انهم يحول مشاكل وقصص ..

ان شاء الله احصل عندكم الحل ..

بدخل بالموضوع على طول ..

آنآ بنت عندي بنت خآلة تسكن بمدينة غير عن مدينتي ..

تجينا زيارات او احنا نروح لهم .. المهم بنت خالتي هذي اهلها معطينا حرية وثقة ..

يعني معاها جوال وعندها نت وتسكر على حالها الغرفة يوم ماحد يقول لها وينك ..

الشي اللي ماهو زين بها الله يرفع عنها انها تعرف شباب كثير ..

وانها تحلف وتنذر بالكذب مع انها طيبه وحليله ..

دايم لما تروح مع سواقهم تكشف وتكون حاطه مكياج فل اوبشن ..

وتقولي عطيه فلوس ويسكت .. ماقدر اقولها شي لاني اعرفها ماتبش وتسكتني وتسوي هالشي من وراي

مره كانت جايه زياره عندنا وراحت معنا المول .. المهم كنا احنا بمحل واتصل عليها قالت انا عند المحل اللي انا فيه وهي تكذب ماهي فيه عديتها وسكت رجعت اتصلت مره ثانيه لقيت جوالها مقفل ..

لمن خلصت شغلي رحت فوق اتقهوى ب كوفي ولا اشوفها تسولف مع واحد انا مادري هو راعي محل هو واحد تعرفه والله ابرئ ذمتي ما ادي ..

انحريت حيل من تصرفها وماقلت شي لما رحت البيت قلت لامي السالفة وامي قالت قولي لخالتك الكبيره وافهمي وش تسوين قالوا لي حرام لازم تقولين لام البنت لازم تنتبه لبنتها قبل يطيح الراس بالفاس ..

انا مسكت خالتي وقلت لها وش صار بالمول بس سترت على السوالف الثانية وبالغت شويه بسالفة المول ما اكذب لكن يشهد الله علي اني ابيها تنتبه لها وماتمشي بطريق غلط .. انا طلبت من خالتي ما تقول شي لبنتها ان السالفة من طرفي لاني اعرف بنتها وبتسبب مصايب ..

قالت خالتي متاكده هذي بنتي ومن هالسوالف وانا حلفت لها ..

مرت الايام وفيه حده اصغر خالاتي علاقتي معاها قويه ودايم مع بعض جبنا طاري البنت قالت لي انها مره مسكتها بمول مع واحد وسالتني اذا اعرف عنها شي او لا قلت لها سالفة المول انا اجري وقتها لساني كان طويل بس ماتوقعت خالتي تروح تقول لام البنت وتكبر المواضيع وتألف ..

المهم اللي حصل ان خالتي صارحت بنتها والبنت نكرت وقامت تحلف لامها وانا طلعتني كذابة وأألف كلام و و و و .. وخلتني انا اتكلم بشرفها ..

قبل كم يوم كانت عندنا خالتي قالت لي انا صارحت بنتي وبنتي انكرت وتقول تألفين عليها كلام وانك طعنتي بشرفها وتكلمتي مع ناس كثير عنها .. وقالت ان شاء الله لما يجي شهر 4 بواجهكم ببعض وبجيب المصحف تحلفوون به وترى بيطلع الكذب واللي يألف كلام واللي واللي ..

حسيت بإهانه يعني زود اني تكلمت لك وخفت على مصلحة بنتك مانتي مصدقتني وصدقتني بنتك واللي نفسها امها عارفه عنها الكذب .. طيب ليش انا وش ذنبي لو تدري عن سوالف بنتها الثانيه وش بتسوي !! ..

انا ماقلت لها ولا شي الا اني جلست احلف لها انا الكلام اللي صار صدق واني ما ألفت عليها وجبت لها المصحف بحلف لها بس قالت خليها لوقتها مابي تجيك مصيبة ترى الحلف بالقران عظيم ..

انا لو مو عارفه وش نتيجة الحلف بالقران ما جبته ..

وصآروا اقاربي يتكلمون ان انا بس أألف كلام وتكلمت بشرف البنت واشوهه سمعتها ..

والبنت نفسها شافوها اقاربي اكثر من مره مع رجال استغفر الله ياربي ..

الحين انا ميته من القهر ماقدرت انام من القهر احس بتأنيب الضمير اني قلت لامها تندمت والله .. تمنيت اني ماقلت ولا حرف وخليتها بحريقة ..

وش اسوي افيدوني احس اللي ارتكبته خطأ .. آحس اني مكبوته ومتصايقة .. واذا تواجهت معها وكذبت وحلفت بالكذب وش يكون مصيري اطلع كذابة وانا مالي ذنب ..

انتظركمـ لا تبخلون علي ماني قادره انام من القهر ..

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه