السلام عليكم
مشكلتك حلها سهل باذن الله
اول شي واهم شي عالج زوجتك من نقص الحديد وفيتامين د سبق وحصل لي نقص وفعلاً ما كنت اقدر اشتغل او اسوي اي شي الا واتعب على طول ، وكل شي يتراكم
عالجها سواءً بحبوب حديد او ابر حديد في المغذي وهي الي نفعت معي وعالجت فقر الدم عندي
بعدين الحمدلله ان عندكم غسالة صحون وغسالة اتوماتيك بيطيح عنكم كل الشغل بس يبي حرص على الترتيب وانهاء الامور اول باول

انصح انك تكون معها وانتو تشتغلون في البيت التزم معها اسبوع مثلاً لمجرد بدء عادات جديده للترتيب معها وبعدين الاستمرار عليها بيكون من طبيعتها باذن الله.
- اولا احرص على انكم تفضون الصحون من الاكل قبل ترفع من السفره الي بتكبونه كبوه على طول والي بيتخزن في الثلاجه للتسخين تجيبون علبه وتفرغونها فيه ، وبعدها باقي الصحون تنحط في الغساله على طول
- افصلو الزباله عن بقايا الاكل عشان مايكون فيه روائح
- غسل ملابسك بنفسك واحرص تطلعها على المنشر واطلب منها تغسل ملابسها وتحرص على نشرها حطو منبه او استغل وقت وجودك في الحرص على الغسيل ماراح ياخذ وقت وضع الغسيل في الغساله خمس دقائق ونشره نفس الحكاية
- احرص انك تطلب منها تعطيك كيس الزبالة وكيس بقايا الاكل قبل تطلع للدوام او اول ماترجع وطلعه على طول
بس ثلاث نقاط ممكن تحل لك ٣\٤ مشكلتك مع النظافه ممكن انت بعدين تزيد من عندك مثلا كل اسبوع خذ المفارش ودها المغسله او حطوها في غسالة بيتكم ، اشتر مفرش جديد كل فتره واطلب منها تختار شكله ، روح بها تشتري اكسسوارات للبيت او نبتات تزيين البيت باشياء بسيطه ممكن يخليها تحب بيتها اكثر وتحرص انه دائماً يكون نظيف.
ممكن كل شهر مره او كل اسبوع مره اذا حاب تجيب شغاله بالساعة تنظف البيت تنظيف عميق زيادة على الاشياء الي حرصتو تسونها يومياً.
والله يوفقكم افعل الاسباب واحرص على فعلها وادع الله ييسر لكم وبتتيسر باذن الله. هي مجرد عادات بسيطة جداً اذا تم الإلتزام فيها يومياً بتنحل مشكلتكم ، بعد علاجها طبياً طبعاً.
( لاتخجل من انك تحاول انا صار لي كذا وماساعدني بعد الله غير زوجي واشعر بالامتنان له خصوصاً بعد ماشفت التغيير وتأثير التغيير على حياتنا الحمدلله )