السلام عليكم ورحمة الله وبركاته .. عندي مشكلة أتمنى الاقيلها حل عندكم .. انا ي اخواني متزوجه من سنه وشويه تقريبًا ومغتربه انا و زوجي المهم اخر مره نزلنا فيها السعوديه لاهلنا سارت تصرفات من زوجي وسارت تصرفات من اهلي .. زوجي ما كان يزور اهلي الا نادرا وابويه كان يسالني فينو ما يسير كدا ما يسأل ولا شي .. واحنا طبعا ما عندنا بيت انا اروح لاهلي وهوا لاهلو لما نرجع السعوديه كم مره ازعل منو وانا عند اهلي ويبان عليا اني زعلانه واحس اهلي شالو عليه .. المهم فرمضان انا اتسحرت عند اهلو وعلى اساس خلاص افطر عند اهلي الا وهوا يجي يقلي يلا تعالي عشان تفطري عندنا يقلي كلمتك من امس صح يمكن كلمني بس ما اتزكرت .. ابويه زعل و نزل كلمو خليها بس اليوم عندنا تفطر ابويه فرحان اني رجعتلو من السفر وزوجي الا يبغاني اروح افطر عندهم مع انو ابويه نزل تحت الشارع عشان يكلمو ابويه زعل منو ورحت فطرت عند اهلو .. بعد كم يوم ابويه اتصل عليه وكلمو عاادي وقلو الله يحييك عالفطور .. وجا وعادي وكل شي .. وقبل السفر بيوم ابويه قلو تعال عندنا العشا بس رحنا اول سلمنا على اهلو واتاخخر شويه وابويه شويه زعل بس كلوو بيمشي .. زوجي ما عندو سياره قلي شوفي ابوكي ازا يوصلنا المطار كلمتو مع انو كان يبى ينام كان بكرتها دوام .. فالاخير قال طيب .. وفوقتها جدتي ام امي دخلت المستشفى وامي قالت اجي معاكم عشان تروح تزورها .. امي ركبت قدام وانا وزوجي ورى و زوجي جالس يهرج وعاادي .. ومن يوم ما سافرنا دحينا اكتر من خمسه شهور ولا كلم امي ولا ابويه وقلي انو كيف يركبوني ورى و انو امي من ايام الخطبه تجلس تقول كلام مدري كيف ومدري اي صح كلامو فامي بس فوقتها يقلها الكلام اللي زعلو مو لما يزعل يجمع كل شي و يقطعهم صح ولا لا .. امي مرتين دحينا ترسلو كيفكم ايش اخباركم يقلها طيبين الحمدلله وبس ما يسالها كيفكم انتو ولما قالتلو لي ما تسال ولا شي قلها زعلان منك ومن عمي على ابويه امي تقلو على اي بالضبط يقلها انتو عارفين دا كلو واحنا مسافرين .. وانا بس اجي افتح السيره دي معاه يصرخ ويقلي انتي مالك شغل حتى لو اكلمو باسلوب وهوا رايق بس اجيبلو السيره يقلب واحد تاني .. والله اني شايله هم دحينا لما نرجع السعوديه ان شاءالله ما تكبر المشكله .. امي وابويه دايما لما اكلمهم يقولولي سلمي على زوجك اقلو يقلي الله يسلمهم وخلاص كانو اهلي يترجو يكلمهم مع انو سارتلنا افراح كبيره واحزان كبيره برضو بس ولا بارك ولا عزا ولا شي 😢 والله مقهوره بس ايش اسوي انا .. الله يخليكم ساعدوني ايش اسوي مهو راضي ينسى وما ادري ايش يبغى ؟؟؟