حبيبتي ... اعتقد اعتمادج على نفسج في كل شيء خلى زوجج يحس انه مب مهم في حياتج
علشان جذي يوم تسإلين عن أي شيء يرد عليج : في شو يهمج السؤال ؟
اختيه .. ما في مشكلة في الدنيا ما لها حل ... الرجل يصمت احيانا لامور مثل :

اذا عمله كله كلام ومناقشات واجتماعات .. يرجع البيت يبي كل شيء الا الكلام لانه تعب منه ..
اذا حس انه زوجته مب فاهمتنه ولا مقدره وضعه ولا تشاركه فهذا يشكل فجوة بينهم فيفضل الصمت على الكلام معاها ..
اذا كانت الزوجه تختار الاحاديث اللي فيها حش ونميمه واخبار الناس ونكد وشكاوي .. فيفضل الصمت والابتعاد ..
اذا الزوجه ما تحتار الوقت المناسب للطلبات او الشكاوي او النقاش ولا تراعي نفسيته وظروفه ومزاجه ..

والعاقل حبيبتي هو اللي يفضل السكوت علشان ما يخربها بالكلام ...

زوجج مع ربعه غير لانه سوالفهم غير ... معاملتهم غير ... جوهم غير ... شوفي زوجج شو يحب ؟ معقولة في الـ 3 سنوات
ما فرح ولا ضحك ولا تحمس لشيء ... فكري شو هالشيء ..؟

الحل مع زوجج انج تهتمين فيه .. بشغله .. بشخصيته .. بهواياته .. شوفي شو طموحه ... واحلامه ... خلي تكون بينكم
اشياء مشتركه .. شاركيه همومه ... وفرحه وصدقيني بيتعود وبيبدأ يتكلم ويعبر بإذن الله
ولا تحنين وتزنين على راسه بهالاسئلة : انته تحبني؟ انه مشتاق لي ؟
حبيبتي لو هو ما يحبج كان ما استمر معاج ... يكفي انه ما يذلج ولا يهينج ولا يضربج ولا يبخل عليج ..

اذا الطريقه اللي متبعتنها الحين مب نافعه معاه غيري الطريقة وان شاء الله تنفع ...

والله يسعدج ويهنيج ويحفظج ...