السلام عليكم

الحمدلله الامور ممتازة الى الان طول ما أنا متجاهلة مسجاتها وطريقة كلامها المايعة خلال مكالماتهم ...صار يكلمها بامور الشغل براحته وما عادت أعصابه مشدودة بسببي مثل أول بعد ما قلت له اني اثق فيه وبحسن تصرفه معها وما راح أرجع اراقب مسجاتها ....

لكن خطرلي اني لازم أنبه زوجي بما انه شخص متدين ويهمه انه ما يوقع بالجرام اني أنبهه انه صورة علاقتهم حاليا ممكن يكون فيها حرام ..لانه واضح انه فيها ود... صحيج انه مو كل ود حرام ... يعني راح يجاوبني ويقول لي انه يودها مثل بنته وانه سبق وقال لها هالكلام .وانه مو ذنبه انها ترسل له مسجات غرام بما انه ما يجاوبهم وما يكلمها الا بالشغل ..لكن طريقته بالكلام معها مو طريقة واحد يكلم بنته .. هي تقول له ..أمس صوتك ما عجبني حسيتك متضايق ...يجاوبها ..اي والله يا فلانه باسمها المجرد ...متضايق من فلان .. قاعد يكيد لي ويحفر لي ....وهكذا .... مع انه يكلم الموظفات الثانيات وبالذات اللي بعمرها ويكلمهم مثل بناته .... يا عمي يا فلانه كذا كذا ....أو يا بنتي يا فلانه كذا كذا ... ...

أبي أطلب منه يصير يدخل مثل هذي الكلمات أحيانا في كلامه معها ( بنتي ...عمي ) .... سؤالي ... هل في بطلبي هذا اساءة له أو شعور بعدم ثقتي فيه .... ما أبيه يعصب مني مرة ثانية ويتهمني اني ما أثق فيه وكل هدفي اني خايفة ربنا ما يوفقه بسبب طريقته الغلط بالتعامل معها وانا الوحيدة اللي تقدر تنصحه لانه مافي حد يسمعهم أو يشوف مسجاتها وعارف باللي صاير غيري

هذا دعاء للزوج
(اللهم يامالك الملك ملكني قلب من ملكته أمري ،اللهم أصلحه لي وأجعله قرة عيني و لا يرى أحدا غيري..اللهم أصلح بيننا ولاتجعل بأسنا فيما بيننا وأجعل بأسك على عدوك وعدونا..اللهم أستر عنه عيوبي واستر عني عيوبه،واظهر له محاسني واظهر لي محاسنه ورضني بما قسمت لي وبارك لي فيه.اللهم ارزقني حبه ورضاه وصدق حديثه وإن غضب فألجم فاه بكلمة لاإله إلاالله،واسكن غضبه بلاحول ولا قوة إلابالله..اللهم أرزقني حنان الزوج والولد ومالاً حلالاً بلا عدد وقراءة القرآن الى الأبد)
آمين ...
ودائماً أدعي له بأن يصرف الله قلبه في طاعته وأن يشغل هذه المرأه بنفسها

أسأل الله العلي القدير أن يفرج همك