رد : سيدة الموقف ،، محتاجة استشارتك بقصتي مع أهل زوجي ..
زوجي فيه طبع غريب و عجيب ..؟؟؟
إذا شافني مثلاً اهتم في ولدي، تلاقيه العكس تماماً معاه ..
إذا شافني عصبت على ولدي، تلاقيه مرة حنون و طيب معاه ..
يحب يخالف الشخص، ماعرف ليش ؟؟؟
إذا شافني أدلعه و أهتم فيه، يطنشني و يشوف حاله ..
إذا شافني أطنشه، يبدأ يلصق فيا و يدور عني ..
و هو وقت كانت علاقتنا كويسة أنا و أهله،،
كان يعمل الأشياء اللي تضايقهم ، فيقولوا ( زوجته ) .. و مع إنه من قبل الزواج و هو كذا معاهم ..
و دحين بدأ يعمل بالأصول و يسأل و يعزي ووو إلخ ..
و نفس الشي مع الناس ألاحظه كذا ..
يعني اللي يطنشه، يلاحقه ..
و اللي يلاحقه، يطنشه ..
و الطبع هذا برضو عند حماتي ..
وقت كنت طيبة معاها و ما أرد عشان احترام لها، كانت تزيد و تقل أدبها علي و تطول لسانها ..
بس وقت رديت عليها، صارت تحسب لي حساب و كذا ..
أكبر مثال اللي قلته، وقت جبت ولدي الأول ..
ماحد فيهم جاب هدية أو بارك أو زارني في بيت أهلي أو المستشفى ..
و أنا كنت أجيب لكل وحدة فيهم هدايا بعد ما يولدوا ..
و في ولدي الثاني، كنت مقاطعتهم .. و الكل اتصل يبارك و ارسلوا هددايا و أكل و شوربة ؟؟؟
.
.
و ما راح أحلل تصرفاته ..
بس استغرب و أتعجب منه ..؟؟؟؟
و ما أعرف كيف يفكر ..؟؟؟
.
.
وحدة من أسباب راحة زوجي لمقاطعتي لهم ..
إنه هو يكذب عليهم، مثلا أمه تقوله ( رحت المسجد ) يقولها إيوة ..
و هي تتصل علي كأنها تسأل عني ( و تسألني فين زوجك ؟ ) ..
و أنا كنت بحسن نية .. أقولها مثلا في المكان الفلاني ..
و هي أصلاً تتصل علي عشان تاخد أخباره ..
فيجلسوا يعاقبوه و يعملوا محضر تحقيق معاه ( و أنا مادري لإنه هو ما يحكي لي و لا هما يحكوا لي )
و كان المفترض إني أتعلم منهم ( أقول ما ادري ) ..
بس ما كنت أصلا أدري إنه زوجي يعرف يكذب ( بس طلع فنان درجة أولى مع مرتبة الشرف بالكذب )
فصار زوجي يغير مثلا أرقام تلفون البيت و ما يعطيهم و يقولي لا تعطيهم
(يعني إنه عشاني و عشان ما أحد يزعجني، لإنه حماتي كانت 24 ساعة تتصل و حتى في نص الليل)
و هو أصلا يغيره لهدف إنه ماحد يعرف أخباره
( فهمتيني دحين سيدة الموقف ؟ )
ترى زوجي مكاااااااااااار أو ممكن نسميه دبلوماسي .. و ولدي طالع له ..
يكسب جميع الأطراف و في الأخير هو الكسبان أهم شي ..
.
.
إيوة صح، كل زيارة لازم ينكدوا علي .. و اللي يساعدهم إنه زوجي شخصيته ضعيفة قدامهم ..
يبغوني أنكد عليه عشان يرتاحوا ..
مرة من المرات زرت حماتي و من وجهي كان باين إني شوي متضايقة
و هي فهمت إني زعلانة من زوجي
و أنا ما كنت أحكي لهم أي شي بيننا و الشي هذا يقهرهم ..
و من عيونها تشوووووفي الفرحة ،، يبغونا نتخاصم و أجي اشتكي لهم و أبكي ..
و أطلب منهم يتوسطوا لي عند زوجي و أدخلهم في حياتنا
زي ما تعمل ( سلفتي ) ..
لدرجة صاروا يهددوها ( إذا ما سمعتي كلامنا ، ترى نقول لأخونا ما يوديكي الهوم سنتر مثلا )
.
.
و هو قالي مرة ، إنهم متضايقيين عشان يبغوني نسخة من أخوي و يبغوك نسخة من زوجته
و الشي هذا مستحيل ..
.
.
و أنا الصراحة حابة أرجع مثل زمان، أحب كل الناس و ما أشيل في قلبي على أحد ..
و أنام و أنا مرتاحة و الناس تدعي لي .. و أنا انسانة اجتماعية و أحب الناس و يحبوني ..
و خدومة جداً ،، بس أكره الإستغلال و عنيدة جداً لأي شخص يحاول يذلني أو يظلمني ..
أحب أخد حقي بيدي ..
و أحس إنهم دحين خلاص ممكن يكونوا تعلموا و بدأوا يعرفوا حدودهم ..
و أنا تعلمت كيف أتعامل معاهم و فهمتهم و فهمت زوجي ..
زمان ما كنت فاهمة شي، و لا كنت أدري إيش سبب المشاكل و إيش مصدرها ؟
و ماني فاهمة شي .. بس كانوا ينكدوا علي ..
و دحين صرت أذكى من قبل في تجنب أي موقف يحصل ..
و تعلمت ( الإستغباء ) ..
.
.
فيه نقطة حابة أقولها ..
أنا ما أكرههم ،، و أحبهم ..
بس أكره التصرفات اللي صدرت منهم ..
و التصرفات هذه ( تختفي بغياب زوجي، و تظهر بظهوره ) ..
مثلاً .. مرة نزلت من بريطانيا من غير زوجي ..
و كانت علاقتنا تجنن أنا و أمه .. و مجرد ما لحقني و نزل ..
تغييييييرت و أحسها ما تقدر تتحكم في نفسها ..
.
.
علاقتي مع زوجي قبل القطيعة و بعدها تتقسم لقسمين ..
1. قبل لا أقاطعهم كنت غصب عني ما أقدر احترمه .. لإنهم يقللوا من احترامه أمامي ..
يسبوه ، يشتموه ، و أبوه قدامي كل شوي يقولي ( إنت متزوجة حمار ) الله يعز السامعين ..
و يجلسوا يعددوا عيوب ولدهم و يكبروها أمام عيوني و كنت تويي عروسة ..
و يجلسوا يقولولي ( الله يعينك مادري كيف متحملته ؟ )
ما كنت أرد ..
بس ارجع البيت و أبكي، ليش ما قالوا الكلام هذا كله قبل الزواج ؟؟؟
و هما أصلا بيعملوا كذا عشان يسحبوا مني الكلام .. و ما كنت أتكلم ..
بس كنت أتخاصم مع زوجي ..
كلامهم صح مو غلط ، بس الزوجة لازم تتغاضى عن عيوب زوجها و تصغرها ..
و هما بأسلوبهم كانوا يخلوني غصب عني ما احترمه .. و اللي يزيده إنه يسكت لهم و ما يرد ..
بس كان رومانسي أكثر معاي .. يمكن عشان يغطي على كلامهم ..
و أحسه كان مكسور .,
.
.
2. بعد المقاطعة، زوجي ثقته بنفسه زادت أكثر .. و يقولي إنت السبب في تغييري و قوة شخصيتي ..
بس أحسه مازال أمام أهله ( ما يرد ) إذا أحد غلط عليه ,,
لإنهم كللللللهم ينقلبوا عليه إذا رد على واحد فيهم ..
فيهم طبع ( ينقلوا الأخبار بسررررررررررعة في العيلة ، و زوجي عكسهم إنه كتوم جداً )
أنا مرتاحة من مشاكل حماتي و القيل و القال و تدخلاتهم في حياتنا ..
.
.
بس أبو زوجي كبير في السن .. و أنا أعزه في مكانة الوالد ..
و أحبه كثيييييير .. و أخاف لا سمح الله يموت و ما أشوفه ..
.
.
سبب زعلي الأساسي إنه مثل ما قلت ، حماتي من أول تحاول تقلبه علي ..
و هو كان بفترة زعلان و مهموم عشان بنته كانت زعلانة عندهم و بتتطلق من زوجها ..
و أنا كنت في الخارج .. و مادري عن مشاكل بنته، لإنهم ما يخرجوا مشاكلهم و أنا ما أتدخل ..
فأبو زوجي قاللي مثل ، و قبل كذا قالت المثل هذا زوجته ..
بس زعلت مرة يوم سمعتها منه .. من معزته الكبيرة عندي ..
انجرحت كثييييييييييييير ..
.
.
و أم زوجي ما همتني ، لإنها ما راح تتغير و هي ( عقلها صغير ) ..
بس أبو زوجي ما توقعتها منه ..
و كنت بفترة اختبارات الماجستير و تخرج ، و فترة مشاكل شغالتي في بريطانيا تبغى تسافر و تهدد ..
عشان اشتاقت لولدها .. و فترة زوجي و تركه للمسئوليات كلها فوق راسي .. و مرض أمي بالسرطان ..
يعني حسيت إنه خلاص ..
Over Load
التعديل الأخير تم بواسطة روح الطير ; 16-06-2012 الساعة 05:19 PM