ردكِ يمثل الواقع فعلاً
أنا الحمد لله المدرسة اللي أشتغل فيها الحين ممتازة وتتعامل صح مع الأهالي
وأمس المديرة سايرت الأب حتى خلص الموشح حقه
وقالت لي ولا يهمكِ أنا أتصرف معه ولا تشيلين هم
تقول بنته يبغى لها تعامل صارم وبأكسر شوكتها بس اصبري شوي ولا تتناقشين مع أمها لو كلمتكِ
وقالت الصلاحيات كلها معي ما راح يوصل لصاحب المدرسة:14:
ذكرتيني بموقف ثاني في ثانوية اشتغلت فيها
تراه موقف يرفع الضغط
كلموني أشتغل مراقبة بديلة مؤقتة وأن الراتب 2000 قلت بخاطري حلو
داومت شهر تقريباً ولما رجعت الأساسية قالوا خلاص نجربكِ معلمة عشان تكون عندنا خلفية لو احتجناكِ وجهزي درس
ماطلوني شهر أداوم كل يوم يقولون بكرة
يوم خلاص مليت قلت أنا اتفاقي معكم أسبوعين والحين كملت شهر تقريباً
وش الحل ؟
لما رجعت الأساسية قلت للمديرة خلاص أطلع وإلا أستمر كان الأسبوع الجاي الاختبارات النهائية
قالت خلاص لا تداومين:14:
قلت لها طيب بما إن اليوم آخر يوم دوام آخذ مستحقاتي
قالت أنا ما قلت لكِ في راتب
يمكن نعطيكِ مكافأة مقابل عملكِ
أنتِ تدريب ومؤقتة وماسوينا عقد
مشيت الوضع وقلت لمعلمة معي قالت روحي القسم الخاص بالرواتب
رحت قالت كم يوم داومتِ ؟قلت لها من التاريخ الفلاني
قالت يعني ما كملتِ شهر مدرستنا ما تعطي أقل من شهر
وبعدين من قال لكِ راتب
وش يثبت لي إنكِ تداومين وأنت ما توقعين حضور
قلت لها سجلات المراقبة كلها باسمي وتوقيعي والمديرة قالت لا توقعين بالحضور حتى أقول لكِ
قلت لها ترى أنا مو محتاجتكم واللي أطلبه مقابل عملي
حسيت السالفة تافهة قلت لها طيب أعطيني إفادة بأني اشتغلت المدة الفلانية قالت ما نعطي أقل من شهر
قمت قلت لها ترى المديرة اللي قالت عن المكافأة
قالت يللا تورينا المديرة من وين تجيب لكِ المكافأة
نرفزني ردها وكأني من حلال أبوها أطلبها
بعد كم يوم مريت بالمدرسة عندي شغلة مع معلمة وأنا طالعة قلت أمر بالمديرة
سلمت علي وقالت ليه تقولين لقسم الرواتب عن المكافأة هذه مني ما للقسم علاقة علمتها برد الموظفة
قالت بأقول لصاحبة المدرسة تعالي معي قلت أنتِ كلميها وأنا برة أنتظركِ راحت ورجعت قالت إنها تقول ما لك إلا 200 ريال
وأن صاحبة المدرسة تقول وش ضمنني لو سويت لها عقد شغلها يعجبني
وتضايقت المديرة من ردها وكلمتني وهي محرجة وقالت تقبلين بهذا المبلغ قلت لا طبعاً ترى أنا بنت خير وأصرف على صاحبة المدرسة
قلت لها أنتِ قلتِ لي أول ما قدمت لي راتب 2000 كيف يصير 200
وقلت لها يكفيني شرف معرفتكِ وعارفة إنه ما بيدكِ حل ولا ربط بس صاحبة المدرسة مو هذا أسلوب تعامل فيه خلق الله وكأن الحلال حلال أبوها
والمديرة مرة طيبة ولا زالت تراسلني بالمناسبات والأعياد الله يسعدها تستاهل من يحترمها تعاملها راقي
وطلعت انقهر الوالد قال أنا قايل لكِ ما وراء هالمدارس إلا التعب
وفكرت أسوي تظلم وتأكدت إن لي حق بحسب نظام مكتب العمل وساعدني أحد معارفنا بس ما تسوى الروحة والجية
وتركتهم فجأة مع إني ماسكة لهم المراقبة الأساسية في الصيف ووهقتهم يستاهلون ليه يعطوني الشمس بيد والقمر بيد وهذا ردهم
قلت للمسؤولة عن كلام صاحبة المدرسة وإني ما ودي أوهقكِ وما عندكِ بديلة بس تعامل المالكة ما يشجع أكمل معها وقالت لي المعلمة بعد الكلام اللي قلتيه أنا أشجعكِ اتركي العمل أهم شئ كرامتكِ
يللا بأروح الدوام استعنا على الشقا بالله