يعني هذا وضع طبيعي اني اجلس طول اليوم في بيتي بلبس ظي العباية..

تخيلوا انفسكم في مكاني .. تفرض عليكم قوانين للبس وانتوا في بيتكم !!


بيعجبكم الوضع انكم طول اليوم بروب طويل واكمام طويلة ؟؟

ماطلبت اني اطلع من غرفتي بلبس فاضح بس طلبت شوية تسهيلات بدال الارواب اللي لبستها عشانه ومحد مقدر حتى !!

ما اعتقد فيه شي حرام اني البس اللي يعجبني في بيت زوجي مو للناس

طبع المرأة تحب تتزين وانا ماني قادرة حتى اتغدى بفستان قصير !!

اسألكم بالله ترضونها لأنفسكم !!

بصراحه هي ما عندها سالفه الله يهديها .
طيب ليه ما جاوبت هل هي ساكنه عندكم عشان مكان عملها قريب ؟
ولا ساكنه عشان ما عندها احد ؟

على اساس انك بتجلسين بهاللبس طول عمرك ..ياعزيزتي كلها سنة ..سنتين وهي ناقله عنكم

سؤال
اجل كيف تحملتي سنوات ببيت اهلك بلبس ساتر ولا تضايقتي ..

اذا هي تنام بدري عشان عملها وزوجك يسهر شوي بالصاله البسي لبس معتدل وانيق واجلسي معاه
والله يعينك لين ربي يفرجها

__________________

هي ساكنة عندنا عشان عملها

وللأمانة ماعمرها قالت لي شي عن اللبس واحيان تشوفني ببيجامات سهرانة في الصالة او اشتغل في المطبخ ولا تكلمت لأنها خلوقة ومحترمة ومو راعية مشاكل

زوجي لما يسهر في الصالة مايعبرني أصلا ماينزل الجوال دقيقة ..

مشكلتي في اللبس مو عشانه قد ماهي عشاني أنا .. اكتئبت من نفسي كل يوم نفس اللبس بس لون مختلف !!

انا مليت من نفسي ومن شكلي وصرت احب اجلس في غرفتي ألبس اللي يعجبني وأجلس ع الجوال ..

لو كنت ما اشترطت بيت او كنت اعرف عنها قبل زواجي كان تقبلت الوضع بس شي انفرض علي فجأة وطالت مدته ومجهولة المدى

والسنة والسنتين محسوبة من عمري ومن حياتي الزوجية اللي باقي في بدايتها واللي مفروض تكون اجمل ايام عمري لأني اعتبر لسى عروس ومارزقت باطفال وعشتها على تربيتهم وعاداتهم هم بالرغم اني مو قاعدة اطالب بشي محرم لا شرعا ولا عرفا

هي مالها ذنب ولا ألومها ولا ذكرتها بكلمة شينة

اللوم على أخوها يعاملني انا وهي نفس المعاملة مو شايف أي فروقات

هم أسرة متدينة ولبسهم المعتمد في بيتهم حتى للأطفال هو الروب وعلى هذا الأساس أقتنعت أكون وحدة منهم عشان ما أكون شاذة وعشان ماتحس بالإحراج و الاختلاف يعني تكرما مني واحتراما لها ولأخوها رغم انه مو حرام لو لبست بنطلون وبلوزة طويلة نوعا ما او شال طويل ومايبين من البنطلون الا اللي تحت الركبة..

المشكلة في زوجي ورفضه التام اني اطلع من الغرفة بغير الروب مو فيها هي

عند اهلي كنا عادي نلبس بيجامات واسعه واحيانا البس اكبر من مقاسي بشوي عشان ما تبين من جسمي شي واكمامها قصيرة يعني عادي الوضع ماعمري لبست أرواب الا عند زوجي

عزيزتي
اشوف الوضع. زوجك هو من سببه لك و عدم موازنتك للامر
تقولين لبست بجامه و فوقها شال طويل
يعني هل كانت قصيرة او مزلط
البسي بجامات ليست عارية بنص كم و لنصف الساق مثلا
فستان ساتر من فوق و لنصف الساق و هكذا
لا تجعلي الامر اما ارواب او متعري
ثانيا هو وش وجهة نظرة بالبنطلون مع البلوزة. شرط ما تكون البلوز قصيرة جدا
هل هو يرى ان ذلك حرام شرعا.

__________________

لا كانت بيجاما بنطلون طويل وواسع من فوق اكثر من الساق والبلوزة كت

القصير مالبسته قدامها ولا جربت لأن اللي عندي قصير لفوق الركبة او بدون اكمام

كل العائلة عندهم الكت حرام والقصير حرام والبنطلون حرام وبرضو الكم القصير حرام

دايم ملابسهم كم طويل ولبس طويل ولا يلبسون بيجامات حتى وقت النوم ولا بنطلون بلوزته طويلة حتى وفي روحاتي لهم التزم بالزي حقهم تجنبا للاحراج مع اني اشوف الوضع مبالغ فيه بس احترمت الكبار الموجود وما بغيت احط نفسي في موقف محرج معاهم واسمع كلمة تنكد علي

بس شغلة اني اعيش نفس نظامهم في بيتي اللي هو مملكتي عشان اخته عندي ما اقدر عليه

تعبت منه بصراحة وتحملت مالا طاقة لي به وياليته ع الاقل قدر او حس فيني فوق هذا كله

يشوف اني مكبرة الموضوع ومافي شي مستاهل ويزعل اذا فتحته

ما لك الا الصبر
لان احس مو من الأصول تكلميه انك متضايقة. و معروف السبب اخته
وش بيسوي يعني. مافي حل الا لما تنقل او تتزوج
على فكرة شيء إيجابي انها تساعدك و قايمة بنفسها

__________________

يبدو أن زوجك متعود على نمط معين .

طيب عندي فكره مجنونه شوي .

اشتري لك ولأخت زوجك ملابس ، فساتين طويله و مزينه ونفس الوقت رزينه
اختاررري شي فريييد وغريب شوي واهديها اياااه


بعدها بفتره

البسيه تحت الروب ، وراويه لاخت زوجك من تحت الروب وانت جالسه معها ، قولي لها ايش رايك

اكييد راح تقول لك حلو ، قولي لها اريد البسه كذا من دون روب ، بس استحي ، البسيه معاي


بس ممكن زوجك يعتقد انك غيرتي اخته ويعاتبك .
وممكن يعاتبها وهي المكسينه بريئه .

لذلك استخري قبل ما تجربين

دام كل شي حرام ايش الي حلال اجل ايش تفكير الناس هاذي ربي اعطانا عقل الوسطية والاعتدال مو تشدد هم ماشين على وتيرة وحدة لازم الناس تمشي على هواهم يا اختي الكريمة انا معك قلبا و قالبا من حقك تظهري انوثتك و شكلك امام زوجك و انتي عايشه في كبت لازم تناقشينه و تجلسين معه بهدوء لازم تعددين نقاطك ايش الي تبغينه او ما تبغينه انا مو ضد ان اخت زوجك معك لكن بالنفس الوقت يحس بوجودك كزوجه لها احاسيس و مشاعر و انوثة بمعنى هذا زوجي و انا زوجته ولنا الحريه في بعض ما اقول الا الله يعينك المهم النقاش الهادي و الكلام الحلو له دور حاولي تناقشيه بكل شي لا اكتمي شي من حقك كزوجة تعيشي حياه حلوة الله يسخركم لبعض

__________________