الله يقومها بالسلامة يارب
ويجعل مساعدتك لها في موازين حسناتك ويثيبك عليها بااااااااااارب
شوفي حبيبتي نبدأ بالتدريج
اول حاجة لازم تتدفا كويس وماتتعرض لتيار هواء بارد
ثاني حاجة بالنسبة للاكل :
1. كثري لها من السوائل خاصة اذا كانت مرضع ، لكن لازم تراعي انه السوائل تكون دافية او بحرارة الغرفة ،، البارد مرة ماينفع للنفاس عالاقل اول 20 يوم ، كثري لها من الحليب الدافي لازم الحليب كل يوم مع كل وجبة اذا تقدري ، عصيرات طازجة مانجو فراولة الحاجات الدموية عشان تعوض اللي راح منها
2. بالنسبة للطبخ ، البيض مهم مرة ، والمسلوقة اهم حاجة للنفاس ، تسلقي اللحم او الدجاج مع البهارات وتخليها تشرب المسلوقة وهي حااارة ، لازم تكون حارة وتعرق معها عشان تستفيد ، لو شربتها باردة راح تكون كلها دهون وتتخزن في جسمها
طبعا مع المسلوقة اعملي لها فطير بر ، مكون من دقيق بر مع شوية ملح وزيت ، اعجنيه كويس بالموية الدافية بعدين افرديه وحطيه على الطاوة واقلبيه هو يستوي ويطلع مرررررررررة لذيذ ، زوجي بنفاسي صار يتوحم عليه وياكله بدالي بالعافية عليه يارب
3. الملوخية والبامية ممنوعة تماما للنفاس
4. اكل النفاس اكل عادي يعني من اكلكم اطبخي واعطيها ، بس حاولي تخلي المسلوقة والحليب والبر شي اساسي كل يوم
5. العريكة ولمعصوب وهذه الاشياء مرررة ممتازة ، تمر وسمن وبر وعسل كلها حاجات كويسة ، حاولي تجيبي لها منها من برا لانه شغلتها في البيت متعبة
امي تسويها بطريقة مبسطة تعمل فطير البر وتطحنه ، وتطحن فوقه تمر ، وترش شوي سمن وعسل ، يطلع لذيذ
بالنسبة للخياطة والمنطقة الحساسة :
اكيد انها عارفة مايحتاج نقولها بس للتذكير ..
1. تهتم بنظافة المنطقة مررررة كويس اهم حاجة التجفيف عشان لا يتلهب الجرح
2. تستخدم الكريمات اللي يعطيها هي الدكتور واحسن كريم ميبو + بيتادين
3. تعمل مغطس بالديتول الخاص بالبشرة مرة وحدة في اليوم
4. تعمل مغطس بالموية الدافية مع غسول البيتادين المطهر
5. ماتجلس على الخياطة ابدا عشان لا تنفك ، وكمان تضم رجولها وماتباعد بينها
بالنسبة لأعشاب النفاس :
1. أول عشرين يوم تغلي لها المجلب او المجمع احنا كذه نسميه ، تعملي لها ترمس (اللي زي الدلة) وتشرب منها رايحة جاية قد ماتقدر مهمة ومفيدة تنظف الرحم
طبعا هي عبارة عن حلبة ويانسون وشمر وكراوية وقرفة وممممم مو فاكرة والله احنا يجينا جاهز من وحدة كبيرة في العيلة تسويه بس تقريبا هذه الاعشاب المهمة اللي اتذكرها ويارب البنات يساعدوك في هذه النقطة
2. العشرين يوم الثانية تجيب غرا من العطار ، ورشاد وتاخذها سفوف ، يعني مو مغلي لا ، تبلعها وتشرب وراها موية فايدتها طبعا تقوي الظهر اللي يكون مكسووووووور
ان شاء الله يارب اكون افدتك لو بشي بسيط وربي يكتب لنا اجر هذا العمل الانساني ويجعله في موازين حسناتك ياااارب ويعوضك ويفرحنا فيك يارب