ماودي انقهر واتفاجئ
اخاف انصدم وتتعب نفسيتي
افكاري بس سلبيه مو عارفه ليش
يمكن لاني ماأثق فيه
اتخيل بس كيف يكبر راس زوجته علي
ليش ان شاء الله
ومين تكون مو زوجه زيي زيها

الله يهديك يا ابتسامة

صار لك قد ايش تحاولي وتحاربي معه عشان ينقلك..
ولما جاء يلبي رغبتك،
تقومي تبغي العكس وتطلعي كل السلبيات والأفكار الشينة في راسك !

أنا أقول لك:
كلا الوضعين له ايجابياته وسلبياته
إنت رجحي الأفضل لمصلحتك في المقام الأول والوضع المحبب لنفسك
وكوني شجاعة وعلى قد قرارك واستخيري وتوكلي على الله .. !

الله يوفقكم ويرزقكم السعادة دائما .

أحب اشير الى ثلاثة نقاط مهمة في اي علاقة زوجية ناجحة :
1. الثقة .
2.حسن الظن .
3. التغافل .

حاولي استحضارها دائما بالنسبة لوضعك براي احضري ورقة واكتبي ايجابيات وسلبيات كل قرار بعدها استخيري بعد ذلك اتخذي قرارك وضعي خطة الاستفادة من هذا القرار.

كيفك ابتسامه...

والله القرار صعب ..

حطيت نفسي مكانك وبصراحه اشوف اذا اولادي كبار اقدر اطلع معاهم واغير جو او هو يسمح لي اخرج بتاكسي اتمشى في الوقت الي مو عندي وفي نفس الوقت اروح لاهلي متى مابغيت هنا اروح معاه

واذا والله بيخليني منطقه في البيت بين اربع جدران اهوجس متى يجي لا واولادي صغار لا والله اقعد عند اهلي ومتى ماجاء حياه

بالنسبه للعدل غالبا المعددين فيهم انانيه لازم تاخذي حقك بالقوه ومعاهده منه امام اهلك سواءاً الان او اذا نقلك

وتأكدي انه حقك مارح يضيع عند الله ولا تفكري انه جالس معاها لانه فيها زود عنك لا ياقلبي هو اناني يبغى يمشي بدون قيود زي ماكان متزوج وحده مايدري انه رح يحاسب ويبان امام الخلق بشقه المائل

الحقي بزوجك ...
البعد دماااااااار للزوجين وسلبياته اكبر مما تتصوري ..
الا اذا راضيه ببضع من حقوقك !

واذا متوجسه من امور معينه ...
فضعي بينك وبين نفسك خط رجعه .. بس بدون استعجال وتخبط ..

__________________

ماأعرف أي القرارين صائب لك ،، لكن استخيري واختاري قرار عن قناعة ،، أهم شيء يكون عندك قناعة بالقرار عشان ماتندمي لاحقا ،، لاتختاري قرار بناء على ظروف معينة لان الظروف ممكن تتغير وترجعي تندمي على قرارك ،، فكري واستخيري واختاري قرار مقتنعة فيه مهما كانت الظروف وتوكلي على الله ،،


أصلح الله شأنك

__________________
اللهم أسألك أن تحقق لي ماأتمناه عاجلا غير آجل .. وأن تحقق لأختي "المنسية" راحة وسكينة وعافية ..

انا ماحاربت ابدا
وذكرت قبل كذا اني ماقد طلبت منه ينقلني عنده ابد ابد
بس كان من وقت لوقت يلمح وانا اسكت مايعرف تفكيري ايش
لاني اساسا اخاف من الفكره
اقولك حاجه ياإشراقه.. مره جابني هناك زياره لمدة شهر تقريبا
وكان يبات عندي يوم واحد فقط في الاسبوع وكل يوم يجي ياخذني يمشيني ويرجعني
الليل يحطني ويروح تقريبا كل اليوم معاي لكن بالليل مايبات الا مره بالاسبوع
صح مو مقصر بالتمشيات لكن الوضع ماعجبني حسيته كانه سواق وسخيفه الحركه
لان الليل سكن وهذا من حقي
عشان كذا اتردد كثير
ممكن او سكنت هناك يصير مايبات الا يوم بالشهر مع الايام الله اعلم

والله والله والله اني متأكده واعرف هالشي تماااما
انه مافيه زود بل على العكس الحمدلله
ومقتنعه تمام ان ربي ماراح يضيع حقي
وزي ماقلتي لاحظته يتنرفز لما بس اقوله متى جاي طولت
حسيته يبي يعيش زي اول لما كانت معاه زوجه وحده
ويبي يعيش بلا قيود
بس اخذ الحق بالقوه مايجي ولا راح يصير اذا الظالم مصر
مايقدر على الظالم غير رب العالمين
انا اللي علي قلته وانتهى
قلت له اخر مره انا مو مسااامحه على اي يوم زياده لها
ويوم القيامه الله اللي بيحكم بيننا بس عشان يكون عنده علم في الدنيا عشان ماتكون له حجه
انه ممكن يقول ماقالت توقعتها راضيه ومن حججه هذي
والحين صايره اتعامل على انه قطعة اثاث
ان جا هلا والله اطلب كل تمشياتي واغراضي وزياراتي لصاحباتي
بصراحه اصبحت اتعامل معاه كانه سواق
هو مو حاسس بهالشي ع باله انه لمى يلبي طلباتي انه يعوضني عن زيادة الايام اللي يغيبها
وانا مو راضيه اصير انتقم من تحت لتحت
اهم شي مصلحتي ومصلحة عيالي ع مايصير كل شي يحرمني منه

لايغرك حبيبتي احيان القرب يصير دمار كل شي بالدنيا الحين اصبح مكعوس
قصدك اخبره اني بجرب السكن لمدة ثلاث اشهر او 6 وبعدها اقرر اكمل او ارجع؟

الله ييسر الخير
اشكرك حبيبتي الله يسعدك