اولا ربنا يبارلك في خطيبك ويهديكو لبعض بجد دي اهم حاجة

ثانيا اهم حاجة انك اخترتي جوزك عارف ربنا لانك كدا هتضمني انه يتقي ربنا فيكي ويعاملك بما يرضي الله ويكون الشرعهو الحكم الي تقدري تلجاي له في اي مشكلة بينكو

واضح انك حصلك مشاكل في حياتك العاطفية قبل كدا وماتزعليش مني حاسة انك عاملة زي مابيقوله عندنا
الي اتلسع من الشوربة بينفخ في الزبادي

واذا كنتي فاكرة ان المركب ممكن تمشي بيكو مهما عملتي بدون مشاكل مش هقولك غير

انسى ياعمرو

هتحصل مشاكل واختلافات في وجهات انظر وخصوصا اول سنة دي وهيا الي هتحدد مسار وتركيبة كل واحد فيكم ونظامه ودا الي هيستمر معاكو بقية عمركو انشاء الله

انا معاكي ومايداكي انك تبعدي عن المشاكل وان الحياة المستقرة مافيش اجمل منها بس مش هقولك غير اننا بشر ومهما كان جوزك كويس وممتاز ورائع فهو بردو بشر والتعود صفة بشرية

وانا من انصار ان النفس البشرية ليها طباع من يوم ماتخلقنا لحد يوم القيامة ثابتة وعمرها ماهتتغير

لو اتعود انك كل حاجة حاضر ونعم وبدون نقاش هيبقى دا حق مكتسب ليه {صفة بشرية} بعد كدا ويوم ماتيجي في يوم تقولي لا هتبقي غلطانة قدامه من ساسك لراسك

ونفس الحكاية انتي هيجيلك يوم ياحبيبتي وتبداي تملي وتزهقي {صفة بشرية} وعشان تغيري الوضع دا هتتعبي لان بقى السمع والطاعة هو سمة الحياة بينكم طب وليه ماحنا لسة فيها من دلوقتي تحطي اسس حياتكم
الطاعة اوكي ماحدش قال حاجة بس لازم يكون ليكي راي والي ماتقتنعيش بيه ماتنفذهوش غير لما تقتنعي بيه ماتلغيش نفسك لحد ماتوصلي في يوم ماتلاقيهاش
وفي نقطة لفتت نظري
ازاي مابتقوليش رايك في بيتك دي مملكتك لازم حتى هو يحس بروحك فيها بنفسك بلونك بزوقك بطعمك انتي بتقولي بتبقي عايزة حاجة مثلا اغلى بس بتتكسفي وتتكسفي ليه مدام هو الحمد لله مقتدر ومعاه ليه وجوزك؟؟؟

تتكسفي لو حاسة انك هتحمليه فوق طاقته اوكي ساعتها اقولك ماتضغطيش عليه وبردو في الحالة دي ممكن تنقي حاجة في نفس السعر بس يكون زوقها عاجبك لازم يحس بوجودك وبطعمك في كل شيء
الحقي نفسك من دلوقتي قبل مايفوت الاوان وترجعي تنحتي في الصخر
اكتبي اسمك من دهب على لوح الجبس الللين قبل ماينشف وماتقدريش تعملي حاجة