اذا هي ماطلبت
كان سحبت عليها فتره ولا طلقت
لعل وعسى ترجع لعقلها

انا رحت بناء على اتصال ابوها العصر قالي تعال نبي نتفاهم توقعت انه الموضوع بيكون بيده بحكم انه كبير البيت وتفاهم رجل لرجل يكون مجدي وحلوله كثيرة واكيد بنوصل الى حل جذري للمشكله

وانا اعتذرت له عن هذاك اليوم واول مادخلت قبلت رأسه بكل احترام حتى قبلت يده وقلت انت مثل ابوي اعذرني

لبيت الدعوة وحضرت الساعه 9 مساء جلس ابوها وتكلم عن اننا لازم نوصل الى حلول ومدري ايش جذرية لان الوضع كذا ماهو عاجبه وناداها وجات طليقتي العزيزة

قلت له كل شئ من الأالف الى الياء وتعبت وانا اشرح له اخر شئ قال شوفوا انا ما احب اتدخل بحياتكم الخاصة
واعتذرت له عن اسلوبي اخر مره واني ماكنت اقصد بس من قهري

قلت تعال انت تدخل احسن من صديقتها الملعونه - قالت لا تسب بنات الناس - قلت الا بسبها وتستاهل اللعن دامها خربت حياتنا

قالت مالها علاقه انا اللي اختار واتكلم باللي ابيه انا - قال ابوها خلاص هي ماعاد كلمتها وتعوذوا من الشيطان وحلوا الموضوع

ثم قالي يابو فلان اتقي الله فيها تراها زوجتك ولو تطيح وتنكسر مالك الا الله ثم هي تعينك وقال لبنته نفس الشئ

رجعنا نتناقش على موضوع البيت واقولها شوفي المعلمات الله يلطف بحالهم حوادث ووفيات ويتركون عيالهم ويقطعون 200 كيلو

احمدي ربك انتي 80 كيلو رايحه راجعه طريق امان وسيارة وسواق

قاطعتني وقالت ذليت امي بالسيارة والسواق والخدامه خلاص مابيها مابي منك شئ ( انا مو قصدي اذلها قصدي المعلمات يروحون بباصات نقل وخطره وفهمتها ) بس لا مسكت غلط انت منان كل ما صار شئ قلت ماقصرت معاك بشئ وتذكرني بكل شئ جبته لي انا مليت قلت طيب ذكريني انتي ومني علي وش سويتي لي ؟؟ قالت انا ماسكه عيالك مايكفي قلت كملي مهامك كزوجة قالت هذي مهامي كزوجة بس انت تبي خدامه وتبي عبده

قالت مهامي كزوجه تختلف عن مهامي كخادمه قلت محشومه وتابعنا نقاش وهي ترفع صوتها علي واقولها عيب عليك قصري صوتك انا بمجلس ابوك اذا ماحترمتيني احترمي ابوك قالت انا ماجيت الا علشان ابوي ولا انت ماتهمني ( ارتفع ضغطي منها )

اكلم ابوها مايرد ابد وسكتنا فترة قلت يمكن تهدأ الأمور شوي فجاه طلعت جوالها وتسولف مع احد يعني احنا نتفاهم على مصير حياتنا وانتي تطقطقين بالجوال وتسولفين بالواتس اب

سألتها من تكلمين قالت صديقتي

صديقتك اياها نفسها هاه ؟؟ قالت مو شغلك وتضحك انقهرت زياده

قلت كيف مو شغلي انتي زوجتي قالت مالك دخل فيني لاتتدخل بخصوصياتي وقتها خلاص استحاله تكون وصلت الى هالمستوى بسبب وسوسة صديقتها مستحيل ينقاد الشخص بهالشكل ابداً مستحيل تأكدت انها عازمه وليست نادمه

اعدت عليها اكثر من خمس مرات يا ام فلان حياتنا بتنتهي بهالشكل قالت بصره بمعنى ( عادي خلها تنتهي )

خلاص هذا اللي تبينه يابنت الحلال كلمي ابوك ابيه يحضر قالت مالك دخل بأبوي وهذي حياتي انا مو حياة ابوي مايتحكم فيني ولا احد يتحكم فيني

وبدأت ترجع تغلط علي بكلام لا يحتمل يمس الرجولة والقوامه ووصل الأمر انها بكل بجاحة تقول بعيش حياتي واشوف نفسي قبل يمضي عمري وتقل فرصي بالزواج <-----<< هذا ايش معناه معناه طلق بتزوج مره ثانية ماتحملت هالشئ تفكر تستبدلني وباقي على ذمتي

وطلقتها وقالت احسن اصلا هذا اللي اتمناه وضحكت بابتسامه كرهتها بعدها

قلت لها الله يسامحك والله يوفقك

امس اتصلت علي قالت تعال خذ عيالك انا مو مسؤوله عنهم

قلت طيب رحت اخذتهم ولقيت شنطهم مثل ماهي لما جبتها لها وولدي الصغير الله يكرمكم موصخ مافكرت تغير له قبلها

احس تسوي هالاشياء تبيني اكرهها والله نجحت والله نجحت والله نجحت

اخذت اولادي لبيت اهلي والوالده الله يعطيها الصحة والعافية سوت للعيال العشاء وروشتهم وقالت خلاص وانا امك انا اقول اترك بنت الناس بحالها لا ترجعها الا بشروطك والحرمة السنعه واللي تبي بيتها وزوجها وعيالها تصبر وانت ماسويت لها شئ يخليها تنحاش منك اصبر وعدل حياتك وعدل اوضاعك ونظم حياتك وحياة عيالك وخلهم يتعودون على العيشة معاك وزيارة امهم وخلاص لاحسيت ان الامور زانت زوجناك وخلها تقعد عند اهلها والله يرزقها بنصيبها

ورحت للوالد وعلمته قبل يكلمه ابوها او يعرف من برا قال الله يستر عليها لو كلمني ابوها وقال ولدك سوا وطلق بقوله بنتك ماتبي ولدي وانتهينا وقالي لو تجيك بعد اسبوع او اسبوعين تقولك باخذ العيال عندي لاترجعهم لها الا بالمحكمة خلاص هالحرمة ماينفع معها الطيب ابد خلاص انهي الموضوع تماما بترجع رجعها بعقل مو علشان العيال تلتزم بالشروط اهلا وسهلا ماتبي خلاص

والحمدلله على كل حال كسر خاطري الولد الكبير توقعت الصغير بيضيق على فراق امه طلع العكس الكبير اللي يسأل عنها ويبكي

ودي اعرف كيف اعودهم على غياب امهم عنهم

الغريب كاتبه لي بالواتس اب من باعك لا تبيعه اكتب على ظهره مستعمل وهدية مجانية بعدها حذفت رقمها وحظرتها وخلاص أي تواصل يتصلون معي الرجال اما هالخربطة والكلام هذا ماله داعي وانتهى خلاص

زعلت على عيالي وهمي الاول والاخير الان انظم حياتهم بين مدارسهم ودراستهم وزيارة امهم واحتضانهم بغيابها

مادري كم راح ياخذ وقت على مايتعودون لكن فعلا الخاسر الاكبر هم الأطفال انشقاق مابين اب وام يتمنى يشوف امه ولا يلقاها ويشوفها بعدين ويتمنى يشوف ابوه ولا يلقاه ويشوفه بعدين

ولا يجتمعون ابوه وامه بمكان واحد ابداً كم هو قاسي هذا الإحساس لكن بحول الله وقوته سأنظم الحياة واكرس حياتي لهم الى ان اجد الامور توازنت بعدها ساتزوج يمكن سنة يمكن سنتين ويمكن قبل مادري

الحمدلله على كل حال اهلي بجانبي ويدللون عيالي ويحبونهم كثير فماعليهم خوف

علمت قبل قليل انها كلمت امي وقالت بروح اخذ اغراضي من البيت وامي قالت لها البيت فاضي روحي بأي وقت
والحمدلله على كل حال

قرأت ردودكم والله يجزاكم خير ماقصرتوا بالنصح والارشاد من اصاب بنصح فأسال الله ان يوفقك ومن أخطأ من الشيطان فأنا احلله وهو اجتهاد منه ومني في النهاية نتمنى أشياء ان تحدث او معجزات وننسى ان الله اعلم بما هو افضل وخير لنا

سبحان الله وبحمده سبحان الله العظيم

وأشهد الله اني مسامح ام عيالي دنيا وآخره وأسأل الله لها التوفيق والسداد

احساسي الآن اني لارغبة لي برجعتها ابداً اشعر اني لم اعد املك لها اي مودة خلاص سأحترمها فقط لأنها ام اولادي

والله ما قدرت يا اختي الكريمة

الكلام اللي قالته لي يهز الوجدان بقوة لا يحتمل ابداً

الحمدلله أمك وابوك واقفين معاك وضامين عيالك.. اصبر الأيام بتجبرك وتجبر عيالك لا أسف على امرأة مثل ذي.. من كمال الأنوثة الكلام المؤدب والصوت المعتدل وقلب يحن مو صراخ وتعال خذ عيالك.. ربي يعوضك بأنثى تخاف الله تنسيك الهم ويطرح بقلبها حب لهالأطفال وان شاء الله ماعليهم خوف وانت ابوهم تصرفاتك كلها عادلة من اول المشكلة

لاوالله جزاك الله خير انك طلقتها بدون مرمطه

حرام ايش ذنب ابوها وامها هي محموله في سياره ولا بياكلها الا الضعوف


صدقني ربي رح يعوضك بنيتك دام تفكيرك كذا

الله يجبر قلبك ويعوضك خيرا

__________________


سبحان الله و بحمده
عدد خلقه و رضى نفسه
و زنه عرشه و مداد كلماته

~♥¤♥¤♥¤♥~

أقرب من أطفالك كثير الفترة هذه..بعد دوامك حاول لو تفرفر بالسياره معاهم..
وتقضي مشاويرك معاهم..حاول تكون صاحبهم حتى تكسبهم وتعوضهم عنها..
والحمدلله أنهم أولاد يعني موضوعهم سهل..
ربي يكتب لك الخير حيثما رحلت..

كلام امك وابوك حكيم
ماشاءالله
ولا تلوم ابوها للاسف معظم اباء هالوقت مايعرفون يعقلون بناتهم
ركز على نفسيه العيال رحمتهم تراهم ضحايا
حسبي الله على شياطين الانس الي يفرقون بين زوج وزوجه
قصتك مشابهه للاخ الوحيد
واكيد انت اخطات وهي اخطا والاطفال بيتحملون
الله يهديها

كم اعمار اولاذك ؟

اذا قريب الخمس سنوات ممتاز ،.دخلهم حضانات ومراكز روضات ودورات خل يغيرون جوو


الله يهدي سركم وييسر الصالح لاموركم

__________________




ربِ هب لي من لدنك ذرية طيبة أنك سميع الدعاء

ابوها وامها شكلهم مالهم كلمة عليها ولو فيها محاكم يمكن ابوها يكون له كلمة ويعقل بنته