رد : (مميز) زوجة معدد؟ ...... تفضلي
رجع البارحة الساعة 11.30
قام الصبح بدري .. تسبح وصلى .. وجاني في السرير!!
بغا يلمني .. وانا ابعده!!
قال: لين متى يا ام عيالي؟!!
قلت: لين تسوي اللي انا اباه!
قال: شو اللي انتي تبينه؟ <------ لاحظوا!
قلت: ابا الطلاق.
قال: ليش؟ <----------- بعد لاحظوا!
قلت: عشان تعيش حياتك مثل ما تبا وترتاح.
قال: من قال لج اني باكون مرتاح لو طلقتج .. انتي ام عيالي .. انتي اللي خذتج مب حيالله زواج .. انا خذتج لاني حبيتج.
قلت: الكلام هذا خلاص ما منه داعي.
قال: تهون عليج عشر سنوات بينا؟
قلت: كفاية علينا عشر سنوات.
قال: اهون عليج؟!
طالعته بسخرية .. فقال: ترا حتى انا هنت عليك .. مو تبين تقولين جذي؟
بعدين قال: انتي استخرتي؟
قلت: هيه.
قال: وحاسة انه جذي بيكون خير؟
قلت: ان شاء الله بيكون خير.
ما ادري ليش فهم من جملتي اني مب واثقة فضحك .. وبغا يلمني وانا ابعده.
قلت: انت تبا تعيش حياتك مثل ما تبا وانا خلاص هالوضع ما يوز لي .. خلني في حالي وسوي الي انت تباه.
قال: طيب انتي شو اللي تبينه؟
قلت: اللي اباه كتبته في الورقة.
قال: قولي .. ابا اسمع. <---------- لاحظوا!
المهم تكلمت عن اليهال .. وقلت له اني حاضنة وادري ان من حقي يوفر لي سكن .. فاذا ماما بتم في البيت فانا ابا عيالي يتمون عندها .. واذا هي طلع لها البيت الحكومي فخذ لي بيت برا .. قال: عيل باخذلج برا .. انا ابا هالبيت. <----------- حركات لعب بالاعصاب متعودة عليها.
في خلال كل الحوار ما قدرت امسك نفسي وبكيت كثير .. و كان يحاول يلمني .. وكل ما بعدته يقول: انا بعدني ريلج شرعاً!!!!!!!
وردوده كانت طالعة نازلة!
مرة يقول ما راح اطلق .. ومرة يقول خلاص المؤخر بيوصلج وفلوسح اللي عندي بعد .. بعدين يرجع يقول الطلاق هذا تنسينه انا مستحيل اطلقج .. واخر شي قال: متى تبين تسيرين المحكمة!!!!!
قلت له: اي وقت.
قال: يوم الاحد بنسير.
.
.
.
بعدها اليهال قاموا ورحت المطبخ اجهز ريوقهم .. بس حسيت فيني هبوط وريلي مب شايلتني ومسكني الصداع .. فرحت غرفتي خذت حبتين بندول ونمت.
ياني عقب شوي يسألني: شو فيج؟ .. فقلت له: صداع وتعبانة.
.
.
.
باقي اليوم مر عادي .. كان يحاول يكلمني عن امور تخص البيت .. مثلاً سألني عن الزرع الداخلي متى قصيته؟
ردودي كلها كانت مختصرة ورسمية جداً .. وطول اليوم اما اشتغل في
في البيت او يالسة في الصالة .. عقبها دخلت الغرفة اييب شي لبنتي فقال لي: تعالي يلسي في الغرفة وانا باطلع الصالة .. بس انا ما رضيت وطلعت.
__________________
اللهم طِيبَ الأثر .. وحُسْنَ الرحيل.
التعديل الأخير تم بواسطة مهره ; 19-06-2014 الساعة 09:00 PM
19-06-2014, 07:16 AM
ضوابط المشاركة
العرض العادي
