السلام عليكم
بحـاول بأسلوبي البسيط أني أشرح لكم بشي من التفصيـل اللي صـار معـاي أمس ... ولأن الحديث كان طويل بيني وبينها أتمنى أنكم تتحملوني شوي لأني يمكن أكتب الكثير منه .
رحـت البيت بعـد صلاة العشاء وطول الطريق وانا أحاول إني أرتب أفكاري وأضبط أعصابي وأقول في نفسي .. يا رجل كن بإذن الله عاقـل ومتزن وكن هاديء وكـن رومانسي ... سبحان من يقول لأي شي كن فيكـون ...
وأول ما دخلت البيت شفتها قاعـدة في الصالة مع الأولاد ...
سلمـت عليها وردت علي السلام بصوت ما ينسمع و بدون أي نفـس وخاطـر !
قلت لها ... روحي غرفتـج الحين أبغيـج بسـالفة ولا تنسين تنادين على الشغاله عشان تظل قاعدة مع الاولاد ليما ينامون ...
نادت على الشغالة وسبقتني هي على الغـرفه وانا بعـد دقايـق رحت وراها الغرفة ... بس لما دخلت الغرفـة شفـت حقيبة كبيرة مقفولة وقلت هذي اكيد حقيبـة سفرها مجهزتنها للسفر عند أخوها ... ها الحرمة عنيدة اللي براسها لازم تسويه ... حسيت ساعتها بضيقة صدر وغصة وأعصابي بدت تفور.
قلت في نفسي ... يا رجل من أولها ما قادر تسيطر على أعصابك وتبغي تتضارب معاهـا وانته بعدك ما تكلمت وياها ولا قلت حتى كلمة وحده ... أتعوذت مـن الشيطان وخذت نفس عميق وتحركت صوبها وهي كانت جالسة على طرف السريـر وتتطالع الأرض ...
ولما وصلت عندها مديـت يــدي ومسحـت بيـدي على راسها برقـة وقلت لها وانا احاول اني أرقـق شويه من صوتي ... أفـا يا ام مايـد أفـا ... بتروحين وبتخليني بروحي هني ... انا مـن لي غيرج في ها الدنيا ... هانـت عليج العشـرة يا ام مايــد ... هان عليج بومايـد ... هانت عليج الايام الحلوة اللي عشتيها ويـاه .. هـان عليج هذا كله .
خزتني بعيونها وقالت ... ما ادري مـن اللي هـان على الثاني انا ولا انت.
مسكت أعصابي وقلت ... يا ام مايـد انتي عارفه زين إني ما قصـدت ولا تعمـدت أبد أني أعـورج وأذيـج .
قالت ... يجوز انـك ما تعمدت انك تضربني وتهيني وتكسر كرامتي لكنك أكيد كنت متعمد في شي ثاني .
قلتلها ... انتي تقصدين سالفـة الزواج .
قالت ... وانت عندك غيرها .
قلت ... يا ام مايـد انا كل اللي سويته اني عرضت عليج موضوع الزواج ... بس بعدني ما تزوجت وانتي بعد الله يهداج ما قصرتي فيني سمعتيني كلام جارح ما يتحمله أحـد وزوجك رجال حساس يتأثر بالكلام كثير ... الله يخليج يا ام مايد حاولي انج تسامحيني ... انا الحينه جاي اعتذر منج وأراضيج ونصفي النفوس ونرجع مثل ما كنا قبل .
قالت ... نرجع مثل قبل ... اللي كسرته فيني ما يتصلح ... وبعدين مـن قالك ان الكلام الجارح اللي كنت أسمعك اياه سببه رغبتـك في الزواج علي .
استغربت من كلامها وقلت ... ما فهمت كلامج في سبب ثاني غير اني قلت بتزوج عليج .
قالت ... نعم ... في سبب ثاني كنـت كاتمتـنه وحابستـنه في قلبي من زمان بس يوم دريت انك بتتزوج علي انفجرت وطلعت كل القهر والحرة اللي فيني منك .
ما عرفت شو تقصد وسألتها ... ما فهمت كلامج .
قالت ... أنت ما ملاحظ انك مقصر معاي بشي .
قلت ... ما اعتقـد اني مقصر معاج بشي ... انتي بعمرج طلبتي من شي وانا رديتج ... أي شي تطلبينه مني اسويلج اياه على طول .
قالت ... الشي اللي كنت ابغيه منك ما ينطلـب ... ها الشي ينعطى بدون طلب ... يعني يطلع من نفسك وبرغبتك انت بس .
قلت ... بعدني مو فاهم شي .
قالت ... أسأل عمرك وقول الصدق متى آخـر مرة أو قـول من كـم سنـة سمعتني فيها كلمـة حلـوة أو حسستني إني زوجـه ... طول الوقت لاهي ومشغول في شغلك ومع ربعك كأنك مـو رجال عندك حرمة محتاجه زوج يراعي مشاعرها ويحسسها بأنوثتها ... شو تنتظـر من حرمة اتحس ان قلب زوجها يابس مثل الصخر وجاف مثل الأرض الميته ... اكيد هي بعد بيجـف ويموت قلبها مثل قلبه ... شو تنتظر من وحده قلبها متحجر غير انها تسمعك الكلام السم الجارح اللي سمعتك اياه يوم بغيت تعرس عليها وهي صابرة عليك طول ها السنين... انته لو كنت مهتم فيني ومراعي مشاعري ومحسسني بحبك كنت ما سبيتك ولا سمعتك الكلام اللي سمعته مني وكنـت على الاقل أتفهمت موقفـك لما حبيت تتزوج علي ... يعني تحرمني الكلمة الحلوة وتبغي تعرس علي بعد ... كيف ما تبغيني انقهر منك وانفجر عليك واطلع غيضي فيك ... ومـع كل اللي سويته فيني انا تميـت أحبك وما بغيتك تتزوج علي لأنه ما بقى لي في الدنيا غيرك عقـب ما ماتت أمي ومات أبوي ... بس لما أهنتني ورميتنـي على الأرض حسيت اشكثر ها الحب ذلنـي معاك .
سكـت وما عرفت كيف أجاوبها لأنها فاجئـتـني بمحاضرتها اللي تحاسبني فيها على ذنوبي القديمة والجديدة بس الموقف كان يجبرني اني اتكلم بأي طريقة ...
قلت لها ... يا حبيبتي انتي عارفه زين إني ريال مشغـول كثير في شغلي خصوصا في السنوات الأخيرة وهذا كله عشان مصلحتج انتي وعيالج .
قالت ... انا ما أبغي منك غير دقايق بس تتذكرني فيها وتفتكـر انه لك زوجة عندها احساس ومشاعر ... زوجـه تحتاج لزوج يحتويها ويضمها وتكون عايشه في قلبه قبل ما تعيش في بيتـه ... وين الكلام الحلو اللي كنت تقوله لي اول ما تزوجنا وينه.
قلت ... انـا ما أدور لنفسي على أعذار واعترف اني كنت مقصـر معاج لكن كثرة مشاغلي والخير الكثير اللي جاني من شغلي خلاني صراحة أنسى واجباتي صوبج... وما أنساني هذا إلا نفسي والشيطان .. و عشان أصارحج وأصارح نفسي بعد... انا لما زاد وكثر الخيـر عندي أغـتـريت بعمري خصوصا لما شفت ربعي اللي بمثل حالتي وهم يتزوجون الزوجة الثانية بكل بساطة ... وبسبة ها الشي انا صراحة طمعـت وقلت ليش ما أتزوج مثلهم والخير عندي كثير خصوصا ان زوجتي ما قاصر عليها أي شي... بس لما فكرت أتزوج ما تزوجت عليج من وراج وخبرتج على طول وتفاجئت كثير مـن ردة فعلج القوية بس صدقيني صدقيني قلبي مو جاف وقاسي مثل ما تظنين.
قالت ... قلت لك قبل شوي انك من سنين ما كلفت نفسك تقولي كلام يشرح النفس او تسويلي أي شي بدون ما اطلب منك تسويه .
قلت ... خافي ربج يا ام مايد ... انتي تدرين اني بكيت عليج لما كنتي طايحه في المستشفى و اعتقد ان دموع عيني ما نزلت لأنج طلبتي منها تنزل ... الدموع نزلت لأن قلبي قبل عيني يحبج ... يا ام مايد ... القلب الطيب ممكن في زمان أرضـه تمـرض و تيبـس ويجف نباتها بس تظل بذور الحـب الطيبة عايشه بترابه بدون ما تمـوت ... وبـذرة حبج يا الغالية كانت و بتبقـى حيـه و مدفونه في تراب قلبي طول ما دم قلبي يسقيهـا .
حسيت أنها لانـت شويه ونفسيتها تحسنت بس قلت في نفسي ما برحمها من الكلام اليوم ليما ترضى عني وقلت لها ... يا حبيبتي أوعـدج وصـدق نيتي يسبـق حروف كلمتي إني ما أتزوج عليج ولا تسمعين حتى ذكـر ها الموضوع على لساني أبد ...
ابتسمت شويه وانا ابتسمت لها وحاولت اني أغير لهجتي من العامية للفصحى عشان ألاطفها وقلت ... يا أم مايد ... لـو يتمـثـل حبـك بصورة إنسان لغـســلت بيـدي كل يـوم رجليـه .
ضحكت على كلامي وقالت ... من زمان ما سمعت منك ها لكلام الحلو.
قلت ... وبتسمعين اللي أكثر منه بعد ... صبرج علي شويه ليمـا أعصـر قلبي اليابـس كله واخلي كل نقطـة حـب تنزل منه اكبر مـن اكبر بحـر واشربج من كل قطرة من مايـه شربة ما تعطشيـن بعدها طول العمـر ... بس أهم شي تكونين راضيه عني .
قالت وهي تضحك ... راضيه إن شاء الله راضيـة ... وانته بعـد سامحني واعذرني على الكلام الجارح اللي قلته في حقـك... بس بطلب منك طلب صغير اذا تقدر عليه.
قلت ... آمـري .
قالت ... نبغي نروح أنا وانت بس شهر عسل جديد يعني نخلي عيالنا عند أمك كم يوم ونروح نسافر برع عشان نجدد حياتنا .
قلت ... والله فكرة حلوه أنسافر بروحنا عشان ننفـض في السفـر غبـار السنين المتراكم على الماسـة حبنا ... بس وين تبغين تسافرين .
قالت ... خاطري اسير جزيرة يسمونها ماراشس ما ادري موريشس.
قلت ... على حد علمي هذي الجزيرة بعيده وتذكرتها غاليه شوي .
قالت ... يا سلام ... يعني يوم كنت بتعرس علي ما قلت العرس غالي والحين مستخسر فيني قيمة التذكرة ... يعني تذكرة الطيارة أغلى عندك من حبيبتك.
قلت ... خلاص خلاص ما تغلى عليج تذكرة الطيارة ... أنا عشان خاطر عيونج أصنـع لج طيـارة مـو بس أهديج تذكرتها .
حسيت انها استانست ونفسيتها صارت أحسن وحسيت اني قدرت أصالحها واكسب رضاها بس روحي طلعت وانا ماسك نفسي واعصابي.
ونحمد الله على كل حال .
طبعا اللي صار بيني وبينها بعدين بتالي الليل وآخـره سـر خاص ما يجوز أني أقوله لكم
..
المهم اني طلعت من المشكلة بسلام وكسبت رضى زوجتي ورضاي أنا عـن نفسي بس بخسـر قيمـة تذاكر الطيارة ... ما عليه يفداها .
على فكرة يا أعضاء ... بعد ما تراضينا صارحتها اني نشرت المشكلة في هذا المنتدى وخليتها تقرا الموضوع و الردود بعـده ... وبعـد ما قرت الموضوع طلبت مني أوصـل رسالتين للأعضاء .
الرسالة الاولى ... تقولكم انها ما ترضى أن أي عضوة من العضوات انها تهاجم وتنـتـقـد زوجها وتقول عنه انه مستبد ومغرور وهمجي لأن ها الشي من اختصاصها هي بس يعني هي تـنـتـقـد وتخسف في زوجها الأرض بس غيرها لا ( شفتوا الحريـم وغيرتهـم ... حتى في الانتقاد تغـار وما تبى حد ينتقـد ويخسف بزوجها غيرها )
الرسالة الثانية ... تشكركم جميعا على وقفتكم الحضارية والصادقة للمساعدة والمساهمة في حـل المشكلة وتدعي لكم بكل الخير والتوفيق في حياتكم وتدعي للأخت نــور اللي طلبت الدعاء لها بأن يصلح زوجها ويرزقها الذرية الصالحة .
وشكر خاص مني أيـضا لكم جميعا ..
ولا هنتـم .
07-03-2007, 03:01 PM
ضوابط المشاركة
العرض العادي
