انا وصلت لحد ترجيع الاجنه التانين ...واالمهم يا بنات اتفقت مع زوجى اننا ترجعهم فى رمضان اللى جاى ده المفروض علشان ربنا يكون معانا بأذن الله
وبس وانا بعمل الحقن زوجى عمل تحليل تانى واكتشف انه عنده ضعف وتشوهات كتير يعنى لازم علاج!! طبعا كلمت زوجى انه يحاول ياخد علاج او شئ او حتى يعمل التحليل مره تانيه نتأكد وبعد كده ياخد علاج ..قالى مش هنعمل حقن خلاص بقى .. بس انا قلت له لازم تتعالج يمكن يحصل طبيعى ... بس بينى وبينكم كنت بقولها وانا بضحك من جوايا وحاسه انه مستحيييل يحصل طبيعى طبعا
بدأت احس بوجع ضهرى قبل الدوره بقتره زى ما كان بيوجعنى من الاندوميتريوسيس قبل كده ...اتدمرت نفسيا لانى كنت عارفه انه بيرجع تانى ...مش ممكن انسى اليوم ده صليت القيام وانى ببكى بشده لدرجه كنت مش قادره اخد نفسى من شده البكاء كنت بقول لربنا ان راضيه بالمرض بس يارب ابعد عنى الألم اللى بحس بيه ...والله كان ضهرى بيتقضم من كتر الوجع ..كنت بتمنى تيجى الدوره علشان اخلص من الوجع لان الشهر ده كان شديد قوى " كان هو الشهر على فكره اللى حصل فيه الحمل "
دخلت على منتدى كده لقيت فيه موضوع عن الحجامه وانهاعلى الظهر ممكن تنزل الاندوميتريوسيس ده وكذا حاله لكذا بنت .. قلت بأذن الله قبل ما أعمل الحقن تانى هاعمل حجامه كذا مره بس أستنى الدوره تيجى المره دى
كان بقالى فتره طويله بستغفر ربنا كتييييييييييير قوى ....الاذكار يوميا ....وأهم حاجه يا بنات الثقه بالله ,,,كنت واثقه بالله جدا...قرأه البقره على طول ولو قدرت يوميا ...قيام الليل والكلام مع ربنا ...
ايوه كنت بحكى واتكلم مع ربنا واشكوا ليه حالى واناديه بأسمائه الحسنى انه يجبر بخاطرى ويرزقنى ..وانى مليش غيره بجد ألجأ له وفعلا كنت حاسه انى مليش حد فى الدنيا غيره ...مقدرش اوصف كنت ببكى أزاى وبحكى قد ايه لربنا
بس كان أكبر ما يوصل له تفكيرى أن ربنا يرزقنى من خلال ارجاع الاجنه اللى جايين ...والله ده كان كل أملى مكنتش أتخيل ان ربنا حبيبى ...هايخلينى احمل طبيعى !!! ومن غير دوا
وسبحان الله فى شهر 5 الماضى ده..أكتشفت انى حامل !! معرفش أزاى مش عارفه فين ضعف التبويض !! وفين القنوات الملتهبه!! فين ضعف زوجى !! فين الألتهابات اللى ديما عندى ....كل ده قدام أراده ربنا ولا شئ
انا روحت لدكاتره تقريبا من رابع شهر جواز علشان كنت متسربعه على الحمل قوى ..,اتبهدلت فى العلاج وعملت صبغه ومنظار ومتابعه تبويض على طول ....لكن صدقونى الحمل مابيجيش بكده وبس......
كل ده مش كفايه .......أهم حاجه ثقتك بالله بجد مش كلام وخلاص ..أخلاصك فى الدعاء بجد مش كلام ..عدم الملل من الانتظار الصلاه على سيدنا محمد قبل البدايه فى الدعاء وبعد اتمام الدعاء" لان ربنا يستجيب للدعاء اللى بيتوسط الصلاه على النبى"..لازم يكون نفسك طوييييييل ...حالتك النفسيه لازم تكون تمااااااااااام الحال السيئه فعلا بتأخر يابنات....
نسيت اقول لكوا انى كنت بدعى لاخواتى المتأخرات بظهر الغيب ..اعرف واحده جارتى وواحده فى منتدى اخر معرفش غير أسمها كنت بدعيلها من غير ما اشوفها وانا ببكى ووالله من قلبى ...ادعو بظهر الغيب لاخواتنا المتاخرات ..من قلبكوا وبجد أتمنولهم الخير زى ما بتتمنوا لنفسكوا ..ده سر الرزق بأذن الله
فى الاخر انا عاوزه أقول كلمه لأختى (
زهور) هى اللى كانت بتكلمنى اخر مره وانا هنا وكانت بتحكيلى انها أد ايه تعبت وفكرتنى برؤيه انا كنت شفتها من فتره وقالتى فاكره رؤيتك دى ربنا هيرزقك ومش هيسيبك ....انا لسه فاكره كلامك يا زهور وبجد بحبك فى الله قوى قوى ...ربنا يديكى كل خير يارب
أدعولى يا بنات ربنا يثبت حملى يارب ورزق كل محرومه بأذن الله
اللهم انى أستودعتك ما فى بطنى يا الله يا من لاتضيع ودائعه ...اللهم يا من رفعت السماء بلا عمد ثبت جنينى فى رحمى واحميه واحفظه من كل شر ...اللهم أنى أعيذه بك من كل شيطان وهامه ومن كل عين لامه ...يالله يارب العالمين وصلى اللهم وبارك على سيدنا محمد وعلى اله وصحبه وسلم