ما يامر عليكم عدو يارب

بس احس مخنوقة شوي، أحتاج اتكلم معكم

قبل كم ساعة أرسل لي في الواتساب: "مرة متضايق. ابغى اغير اسلوب حياتي. جسمي مكسر و مرهق من الزعل"

بعدها بساعتين أرسل: "سخنت".

هذا تمثيل؟

ان شالله يا ميمي ماتضطري تفتحي موضوع مشكلة.

يارب مع قدوم الشهر الفضيل أمورك تتحسن

تبين رايي ؟
ليش تاخذينها من منطلق تمثيل او لا ؟
اغلب الظن انه كلام تمثيل اي واضح

بس الاكيد يا صديقتي انه يبي يستعطفج ويحنن قلبج عليه عشان ينكسر خاطرج وتعطينه وجه
وواضح انه يحاول يخليج تهتمين فيه
الاشراقة ... ما يبين واضح عندج ان الرجاب يحبج وخايف يفقدج ؟!!

خذيها من ناحية ايجابية

حبيبتي يا اشراقة ما بعرف الموضوع اللي قلتي عنه بس الله يفرجها عليكي يا رب

__________________
أبسط شيء في الأناقة نظافة قلبك

زين انا ادري يحبني وخايف يفقدني مو خايف بس ، الا والله مرعوب وصاير عنده زي الهاجس..

بس شوفي القرف اللي معيشني هو، يا اعيش معاه لا اسمع لا ارى لا اتكلم ولا يصير بهذه الحالة.

تخيلي يا زين

قبل يومين اشتريت فستان جديد حق بيت،
وامس في الليل باقيسه وهو على السرير بجواله،
وجيت قلت له ايش رايك؟

لو الجدر يلتفت وينطق وهو لا،
عينه مارفعها نظرة ما طالع
صرت اناديه باسمه واقول له شوف عشان داخلة اتروش باغيره
قال طفي اللمبة تعبان ابغى انام !

انا وقتها اتفشلت وحسبت بالاهانة وكسر الخاطر
حسيت بشي حاااار في صدري

طفيت اللمبة وصكيت الباب وطلعت.

الله يبعد عنك الضيقه يارب .... أنتي أكيد إن شاء الله تعرفين لما يكون صادق ولا يمثل يمكن جد محتاجك ... هوا دايما يقولك كذا ولا نادرا ؟ إن شاء الله مايضايقك سؤالي
يارب مايكون كلامي تخبيب بس جد موقف جدا سخيف ليه كذا

__________________
أفضل طريقة للالتزام بالوعد هي ألا تعد بشيء
اللهم صل على نبينا محمد

وسيلة ضغط عليج عشان هو يرتاح
ضميره مشغول ، وفي نفس الوقت خايف
يحس انه خرب حياتج خصوصا لما يشوف الزعل بعينج انتي تعطينه تأكيد او رسالة انك جرحتني
لذلك يشعر بالتأنيب ويجلد نفسه
وخوفه واضح من قبل و زاد بعد العملية
يحس ان عندج كل المقومات اللي تخليج تتركينه بعد الجرح
لذلك يعيش تحت ضغط الهواجس
عشان يتخلص من هالشيئيين يبيج تسكتين وكا يبيج تظهرين الزعل لان الخوف والتأنيب يزيد
اي هو فعلاً كان يبي الزواج الثاني
وتوقع انه بيكون سي السيد
الثنين بيحبونه وبيتنافسون عليه وووو
وتوقع انج بتظلين معاه نفس اول
لكن لما حقت حقايقها وصار اللي صار حط روحه بهالموقف
الغلط مو منج الغلط منه هو ..
هو حط نفسه بهالموقف

لكن يبيج انتي تقولين له " انت براءة " منت مذنب وانه عادي مو زعلانه
يبيج تعطينه تطمين ان انه معاك ما بتركك

والله يا اشراقة .. انتي ماجبتي كلام غريب .. ولا شي جديد ..
زوجك حاس انه غلط .. وتوهق مب عارف كيف يرقع المشكلة ..
طبعا مايقدر يعتذر عشان مايثبت عليه الغلط ..
فماله الا انه يتمسكن ويتميرض وبدل ماهو يراضيك انتي تراضينه..

اذا الشيء ما يتعبج سايريه
يمكن ترتاحين من هالحركات!

حبيبتي انت طبعا ما اتضايق والله نعمة انتم اني اقدر اتكلم معاكم
مافيه ولا مخلوق افضفض له.

هو يا عتبات 4 سنين من يوم تزوج، اي مرة يصير موقف او مشكلة يصير كذا ويقعد فعلا أسبوع نفسيته زفت ومهو انسان طبيعي ابدا.