كلكم تبون تعرفون وش صار على ولدي..

صارت أمور وأحداث كثيرة نهايتها أبو العيال اتصل بأبو البنية وعرض عليهم الموضوع وطلب موعد يروحون يخطبون رسمي..راح العريس وأخوانه وأبوهم واثنين من أعمامه وأنا أيضا أجبروني أروح..

المهم صار الموضوع رسمي وبعدها بأسبوع طلبوا الشوفة الشرعية .. وبعد الشوفة بأسبوع يصير مجلس الرجال والإتفاق على الذهب والمهر والشروط والكلام اللي تعرفونه...

يوم الشوفة خرج ولدي مبسوط والنفسية ماشاء الله تمام... المهم وصيته استخر ثم استخر ثم استخر قبل الشوفة..

وطول الوقت أدعي ربي يكتب الخير لغاية مارجعوا ..

رجع ولدي وهو النفسية زفت ووجهه أسود..
قلت له شفيك.. قال والله يا أمي بنت الناس مافيها شي بس أنا ضاق صدري وحسيت بنفور وقت شفتها..

قلت له مو هي هذه اللي دخلت قلبك من أول نظرة؟
مو هي نفسها اللي جننتني وجننت أبوك وأمرضتنا عشانها؟

شوف يا أحمد بنات الناس مو لعبة واللي ماأرضاه لبنتي ما أرضاه على بنت الناس..
إنت لعاب جالس تتلاعب.. وهذه مو تربيتنا لك وربك مايرضى بالظلم..خاف ربك ياشيخ...قال والله يا أمي مو تلاعب وجزمة فلانة على راسي بس ماينفع أتزوج انسانة بعد هذا الشعور عشان ما أظلمها...

كان شايل معه بجيبه ذهب عشان يعطيها بعد الشوفة لكنه رجعه وما أعطاها شي...قلت خلاص اسأل ربك يوجهك لمافيه الخير وتوكل عليه هو يكفيك بفضله.

المهم
الناس اتصلوا بعد ثلاثة أيام واعتذروا بأسلوب جميل البنت استخارت وماارتاحت.

سجدت لله شكر... المهم إني ارتحت من الدوامة والتفكير والهم وحسيت جبل عن قلبي انزاح..

قبل يومين رحت الصالون والسوق أدلع نفسي لأن نفسيتي اندمرت الفترة السابقة كنت مهملة نفسي ومو معطيتها حقها..رجعت والنفسية عال وآخر شياكة وحلاوة ..المهم جاني ابني أحمد كعادته يضحك وينكت وفجأ قال بكلمك في موضوع ياست الكل..

قلت خير إن شاء الله😑
قال أمي لأنك الخير والبركة أبغاك تدورين لي عروس مناسبة.. أنا هنا ما اتمالكت نفسي وأعطيته كف على وجهه..قلت لسة باقي براسك عرس ..مو قلنا خلاص وانتهينا..

زوجي انفعل وعصب وقال كيف تضربين رجال أطول منك وأعطاني كف على وجهي،وأنا ما دريت بنفسي غير رديت الكف بكف على وجهه..

وبكيت بنحيب ومن غير شعوري لبست عباتي وطلعت من البيت أمشي وأمشي مدري بنفسي وين ماشية..لقيت نفسي عند فندق دخلت أستأجر غرفة ومامعي ريال ولا جوال ولا هوية.. الشباب ماقصروا أعطوني جوالهم واتصلت بأحمد وجاني سوالي اجراءات الفندق...بعدما حاول معي أرجع البيت وأنا رفضت..

عارفة نفسي غلطانة والله ماحسيت بنفسي وأنا أضرب وأنضرب كيف صار اللي صار مدري😢
وربي كأنه فلم أو حلم..لكن قدر الله وماشاء فعل..

بعدما هديت أرسلت لزوجي رسالة يا بو عيالي وياتاج راسي أعتذر منك والله كانت لحظة غضب والشيطان أعمى بصيرتي ورب البيت ماحسيت بنفسي.. المهم سموه الكريم مقفل جواله والرسالة ماوصلته...

أحمد يلح ويترجاني أرجع البيت أو أدخل عنده أو حتى شقة الضيوف... قلت له ما أرجع الين أعرف أبوك يفكر في ايش...أبوه خرج من البيت وما رجع.. ومحد يدري عنه وينه..

لا تلومومي وتحاسبوني حساب الملكين ترى اللي فيا مكفيني..

سبحان الله وبحمده سبحان الله العظيم..


(مستجدات الرد22)
http://66n.com/forums/showpost.php?p...2&postcount=22

مستجدات (الرد 66)

http://www.66n.com/forums/showpost.p...2&postcount=66


مستجد(الرد111)

http://www.66n.com/forums/showpost.p...&postcount=111

(مستجدات الرد126)

http://66n.com/forums/showpost.php?p...&postcount=126

(مستجدات الرد 140)

http://www.66n.com/forums/showpost.p...&postcount=140

(مستجدات الرد154)

http://www.66n.com/forums/showpost.p...&postcount=154

(مستجدات 172)

http://66n.com/forums/showpost.php?p...&postcount=172

(مستجدات الرد204)

http://66n.com/forums/showpost.php?p...&postcount=204


(مستجدات الرد220)

http://66n.com/forums/showpost.php?p...&postcount=220

(مستجدات الرد265)

http://66n.com/forums/showpost.php?p...&postcount=265

(مستجدات الرد306)

http://66n.com/forums/showpost.php?p...&postcount=306

مستجدات 317
http://www.66n.com/forums/showpost.p...&postcount=317