رد رائع ومقنع
ومؤيدة له تماماً
الجانب النفسي في حالة زوجك
هام هام جداً لحل كل مشاكلكم
ومازلت أرى أن 90% مماهو فيه
نفسي تراكمي

مع انه علاقته بتلك المرأة سبقت قيامه بالعملية إلا أني أوافقك انه في حالة نفسية غير مستقرة وأرى أن أختنا هيا راعت حالته النفسية كثيرا .

ولكن أخي كيف تستطيع أن لا تلزق فيه وهو يحتاجها بكل لحظة من حياته اليومية ؟؟ بالعكس أرى أن هذه هي فرصتهم لتوثيق علاقتهم حتى لو كان مخاض ذلك التوثيق صعبا ...

وأملي كبير يا هيا وأتوقع وأشعر بأنه بعد انتهاء المشكلة ستكون علاقتكم أفضل بمرات من قبل العملية ويمكن من قبل المشكلة الأولى .

__________________

وضح قصدك أخي وأوافقك 100 % بارك الله بك .. خاصة نقطة الشد والرخي ... فأحيانا يأخذ صاحب المشكلة بنصيحة المستشار بأن يشد وبالرغم من تغير الوضع وتغير حالة شريكه إلا أنه يظل على نفس المنوال ..

__________________

اعجبتني مداخله الأخ الكريم
Saif _KSA

السلام عليكم ورحمة الله وبركاته
الحمدلله اوضاعنا في تحسن مستمر برغم من وجود بعض التراكمات فعلا في نفسي ونفسه ولكن بشكل عام اصبحنا اكثر صبر وتحكم في الاعصاب والالفاظ000
اليوم اخته تكلفت بجلب كيكه وباقة ورد وهديه منها لي وله وهي عباره عن عزمها التكفل بتذاكر سفر لأي دوله نريدها بعد ما يقوم بالسلامه وقالت الهدايا اللي بينكم اجلوها لوقت ثاني يكون وضعكم فيه افضل
طبعا كلامها هذا كان وقت الغدا علشان لا نتحمس ونجهز ونخرب تجهيزاتها وهي للأمانه ما حضرت حفلتنا
واكتفت بتوصيل الكيك والورد برغم انه اتصل فيها وطلب منها النزول عالاقل لتقطيع الكيك لكنها رفضت
وقالت هذا يوم خاص فيكم وانبسطوا سوا بدون اي عذول
المهم انا انتهزتها فرصه ولبست وتكشخت وهو انجن مسكين قال ان كيدهن عظيم وانا مريض تلبسين كذا
وانا بصحتي ما تلبسين كذا00قلت لا والله كنت البس واتكشخ لكن اعمت بصيرتك بنت الذين
هو سكت بعدين قال لا تخربين فرحتنا اليوم قلت ما خربتها ولا بخربها لكن كمان انت لا تظلمني انا من يومي
البس واتسنع واتكشخ فليش تقول توني بديت اعمل كذا؟!
المهم ماكبرنا السالفه وسولفنا وتكلمنا وضحكنا وتذكرنا يوم العرس ومواقفه الحلوه وانتهت الحفله بينا مثل ما خططت له وتركته نايم وجيتكم
وقريت كل ردودكم وللمعلوميه اغلب اللي تنصحوني فيه اكتبه بورق خارجي واحتفظ فيه لانكم بصراحه اساتذه
وانا ممنونه لكم وبالنسبه للأخ الرسمي كلامك صحيح ميه بالميه وهذا سبب تحملي لكلامه وسبه الله يهديه
وانا للمعلوميه ما اجلس عنده كثير لنفس السبب علشان كذا اخدمه واروح الغرفه او المطبخ او اطلع عند اخته شوي وان جلست عنده احاول اشغل نفسي بشي او اتقصد نشوف مسلسل او برنامج علشان لا نتناقش
ونقاشنا يزيد ونتهاوش من جديد خصوصا الان انا اهم شي عندي ان البلاك بيري في دولابي
ومافي تواصل بينهم وجواله اشوفه والله اغلب اليوم مايكلم فيه ولا يلمسه حتى احيان يطفي وهو مايدري
على فكره امس اكتشفت شي عن ماضيه مابيوم حكاني عنه ولا اعتقد بيحكيلي عنه
واضطرت اخته تحكيني بعد موقف سار امس00لان اخته قالتلي جيبي العكازات حقته وخليه يتعود يمشي
عليها بحيث يساعد نفسه لو عالاقل يمشي بالبيت بدل الجلسه قمت انا وجبتها وجلس يصرخ يقول لو ثاني مره
جبتيها انه بطلاقك
وصرخ على اخته وكانت صدمه لي اول مره يعملها امامي
المهم عدا الموضوع وتركناه بالمجلس بعد ما تعشينا ورحت انا وهي الصاله واعتذرت لها بالنيابه رغم انه اعتذذر لها لكن حسيتها شالت بخاطرها قالت لا عادي وهو اخوي ووحيدي ولا يمكن ازعل عليه حتى لو ماكان مريض الان وانا عاذرته واعرف سبب كرهه للعكاز انا هنا استغربت قلت ليه؟ كيف يعني؟ وش سبب كرهه
قالت ليه هو ما حكاك؟
قلت عن ايش ؟
قالت عن ظهره؟
قلت قصدك العمليه اللي بأسفل ظهره قالت ايه
قلت انا اكتشفتها بشهر العسل وقلي انه تعور وهو صغير وبس
قالت اخوي مو صاحي من جد ما علمك القصه؟
قلت لا اي قصه
المهم قالت اللي كسرله ظهره هو عمي وهذا سبب كرهه له بالاضافه انه كسرله ظهر بالعكاز
وحكتني كل الحكايه قالت بعد وفاة اهلي خذانا عمي عنده بالديره انا جلست سنه وما ارتحت ولاني اكبر
اصريت اروح عند جدتي ام امي وبالفعل رحت اما هو لا كان عمي متحكم فيه ويخليه يخدم زوجاته الثلاث
ويجيب لهم اغراض من البقاله وينظف الحوش وكذا00وكان معذبه بالضرب والشتم وهو كان ايامها معه عكاز
المهم بيوم خالف كلامه وتضارب معه قام ضربه وكسر ظهره بالعكاز كسر له ثلاث فقرات اثنين تجبروا لحالهم
ووحده لا تكسرت تكسير جامد لكن ربي رحمه ان الحبل الشوكي سلم وماجاه شي مجرد انضغط فقط
قاموا خوالي جابوه الرياض وقرروا تسفيره للخارج لان حالته تدهورت وتأثر عنده الاخراج والاحساس من اسفل السره وتحت فقال الطبيب لازم يسافر وبالفعل قررنا تسفيره لكن عمي رفض بحجة انه ولي امره ورفض يعمله جواز سفر ويكمل باقي اوراقه وبعد وساطات وتدخل كبار بالعائله وافق بمقابل مادي وتم الدفع له
من قبل خوالي والحمدلله سافر وتعالج من ظهره وساقه بنفس الوقت ورجع بدون عكازات وصحته افضل بكثير
وبعدها بفتره لمن كبر طالبنا عمي بورثنا ورفض فقام زوجك ورفع عليه قضيه واخذنا ورثنا وشرينا بيت
وسكنا فيه انا وهو وجدتي00
انا بكيت عليه لاني ماكنت اعرف القصه هذي واثرت فيني قالت لا تعلميه اسكتي يمكن هو بيوم يعلمك
وقالت هذا سبب كرهه لعمي ولا يطيقه حتى بزواجكم ماكان بيناديه لكن انا اصريت قلت علشان ارحامك
يكون عزوتك والناس مالها الا الظاهر00
انا بعد ما راحت جلست اسأل نفسي سؤال واحد نفسي احد فيكم يقلي
هل علاقتي فيه طبيعيه؟
يعني هل في زوج يخبي عن زوجته قصه مثل هذي؟
معقوله توني اعرف عنها؟
وحابه اشكر الجميع بيتا وروح الطير والرسمي وجرين وابوحكيم وجراح الماضي وسيدة الموقف وللحياة الوان وللكل

عذر للاخ سيف لا تواخذني
غلطت وكتبت اسمك الرسمي
ماني صاحيه معليش اعتذ ر

اعوذ بالله من الظلم
والله اني بكيت من الي سواه عمه فيه حسبي الله على كل ظالم
اكيد انه يأثر في نفسيته الظلم ماينسي والله ماينسي
وظلم ذوي القربى أشد مضاضة . . على المرء من وقع الحسام المهند
اماسؤالك ليش ماعلمك ؟
بعض الرجال مايحب يتكلم عن اي ذكرى مؤلمه بحياته
زوجي صار عليه حادث قبل زواجنا وجلس في العنايه المركزه اكثر من شهر
ومره ذكرت لي والدته قصة حادثه وبعدين سألته ليش ماعمرك ذكرته لي قال ماحب اتذكره

__________________
اللهم اجعل خير عمري آخره و خير عملي خواتمه و خير أيامي يوم ألقاك فيه

هلا بجراح الماضي
سلامة زوجك والله يخليكم لبعض
انا استغربت لاني بكل عيد اخاصمه واقله روح زور عمك ومايسير وصلة الرحم ومن هذا الكلام
وهو يرفض ويزعل وتصير هوشه بينا بسبب عمه والله بكل عيد نتخاصم بسببه
ولا مره علمني سبب كرهه هذا
علشان كذا انا قلت بنفسي لو عملني خلاص ما بجبره ثاني مره يزوره