المشاركة الأصلية كتبت بواسطة عـــاشـــقـــه

انا قاعده اقرا ردودكم ومو عارفه شقول او شرد عليكم ..
انا غلطانه .. طيب شسوي الحين .. ؟
ليش هو ما تواصل معي ليش اخته وامه بس .. اكيد انه ما همه نرجع لبعض ..
طيب انا غلطت واهو لازم يسامحني اذا غلطت مو يطلقني ويحقرني ..
كله تلوموني انا بس .. طيب هو ما غلط ابد ..
طيب هذه كله مو مهم .. انا ابي نصيحتكم لي ... مابي تقسون عليه .. انا اعترف اني غلطت يوم عاندته وما سمعت كلامه بس ما توقعت ولا واحد بالميه انه ممكن او حتى مافكرت في شي اسمه طلاق .. خصوصا ان في ايام الخطوبه كنا سمن على عسل وكان متفاهم معاي جدا
مادري شنو اللي صار علينا بعد العرس

المشاركة الأصلية كتبت بواسطة عـــاشـــقـــه

السلام عليكم حبايبي لي فتره عايشه في هم وغم لي ثلاثة اسابيع تقريبا ومو عارفه شسوي او شلون استوعب شنو اللي صار
انا الله يسلمكم انخطبت تقريبا قبل 6 اشهر وملجنا وتم العرس وخططنا لشهر العسل وين نبي نروح المخطط كان على اوروبا 3 اسابيع وكنت متحمسه جدا وفرحانه
المهم رحنا على المطار بعد ليلة العرس ثاني يوم كانت طيارتنا المسا وكنا ناوين ناجل الدخله لي اوروبا يعني اول ليله بس كنا نسولف ونمنا من تعب ليلة العرس
المهم نزلنا في فيينا وكانت اول وجهه لنا في اوروبا
المهم اول ليله الحمدلله خلصنا .....
ثاني يوم بعد ما تمشينا ولفينا في فيينا رجعنا على السكن عشان تعبنا ونبي نرقد يعني هاي ثالث ليله لنا تقريبا
المهم تقريبا كانت الساعه 12 بالليل عندنا وفي بلدي كانت الساعه عشر تقريبا الفرق ساعتين نحن متقدمين يعني بساعتين ..
في هذا الوقت اتصل علي نسيبي زوج اختي .
جلست اكلمه وعشان اوضع لكم الصوره نحن متعودين ان نسايبنا ازواج اخواتي من اخوانا يعني نطلع معهم نسولف معهم ونتكلم تلفون وكل واحد يسال عن الثاني يعني في حدود الادب يعني شي عادي .
المهم تكلمنا تقريبا نص ساعه . زوجي انزعج من الوضع وكان معصب حيل ويقول خلاص سكري الخط كنت ااشر عليه شوي واسكر ماعليش كان يسال عني وعن احوالي وهيك يعني نحن متعودين عادي كلن يسال عن الثاني مثل الاخوان . وانا بصراحه استحيت اقول له يسكر من غير سبب شو بيقول .
المهم زوجي طلع وراح يقعد في الصاله يوم قفلت المكالمه بعد تقريبا نص ساعه . سالني منو هذا اللي تكلمينه . قلت له هذا نسيبي علي . قال على اي اساس تكلمينه في ها الوقت المتاخر ومنو هو حتى تكلمينه . قلت له نحن نسايبنا مثل اخوانا متعودين في بيتنا نكلمهم ونطلع معهم وكان يسال عني بس . قال اليوم تسوين بلوك على رقمه انا هذا الاسلوب ما يمشي معاي نسيبج هو نسيبج وبس ما يتعدى ها الشي كيف تقولين بحسبة اخواني .
قال لي المهم انا قلت اللي عندي والحين روحي نامي ورانا جدول باكر وانا بنام بالصاله . انا عصبت من ثالث ليله يبي ينام بالصاله . قلت له انا ما سويت جريمه عشان تعاملني كذا واحنا تعودنا على هذا الوضع ولو بغير ما بغير بيوم وليله .
المهم قال روحي نامي الله يرضى عليج . بصراحه انا مو مستوعبه شو الغلط في الموضوع اذا نسيبي يتصل علي ويسال عن احوالي وهو صار له 3 سنوات من اخذ اختي والوضع عادي مادري ليش زوجي مكبر الموضوع .
المشكله انه في رابع ليله اتصل علي وانا احترت ارد والا لا .. قلت لو ما رديت اخاف يحاتوني هو يعتبرني مثل اخته ودايم اذا تصير مشاكل معه ومع اختي يتصل يستشيرني ..
المهم انا ماعرفت شسوي قمت رديت عليه ولاحظت انه زوجي خلاص معصب ع الاخر وانا احاول انهي المكالمه بس سالفه تجر سالفه الى ان قال لي عطيني زوجك ابي اكلمه .
قلت لزوجي فلان يبي يكلمك . تم ياشر علي يقول قولي له نايم نايم . بس انا قايلة له قبل انه مو نايم فكيف اكذب عليه شو بيقول علينا . المهم زوجي استلم التلفون ويكلم نسيبي من غير نفس ..
اللي زاد الطين بله ان نسيبي يسولف مع زوجي ويقول له ترا مو طولون ترا فلانه لها وحشه في البيت ( وقال اسمي بطريقة الدلع ) والبيت فاضي بدونها مافيه اكشن .
انا مادريت الا عقب ما سكر زوجي المكالمه بشو اللي دار بينهم من كلام .
المهم زوجي قال بعد ما سكر انه نسيبك يقول كذا وكذا فيا تتصلين الحين له وتقولين ترا زوجي مو عاجبه الوضع ولا تتصل علي مره ثانيه او من بكره ارجعك بيتكم وكان شي لم يحدث . انا بصراحه انصدمت ماعرفت وش اقول وما توقعت اصلا انها بتصير صدق عبالي فتره عصبيه وتعدي . المهم انا قلت له ماقدر الحين عطني فرصه على الاقل لين نرجع وافهم اختي بالموضوع وانا اصلا مو مقتنعه .. قال لي ماعلي من قناعتج هالشي غلط وانا لا يمكن اني اتقبله .. فقلت له مو مشكله يصير خير لين نرجع بعد ها الثلاثة اسابيع .
فخامس يوم انصدمت انه يرتب اغراضنا وشنطنا وكان من الليله اللي قبل يرتب حجز العوده عن طريق النت في تلفونه ونا مادري .. فقال لي جهزي اغراضك وعلى بيتكم طوالي . نا اهني تنرفزت قلت له اولا اللي اسويه مو حرام ولاعيب ونحن متعودين مادريت عنك معقد .. من قلت له معقد . قال لي اي صح انا معقد وانتي طالق من الحين ..
انا انربط لساني ماعرف شنو اللي صار وشلون ابين لاهلي وللناس . اشلون تونا في بداية الطريق ماقلنا بسم الله ويطلقني ..
انا الان من رجعنا لي اسبوعين والحين في الثالث مو عارفه اشلون ها الشي صار .. ولاني قادره اقول لاهلي شنو السبب . قلت الهم حنا ما نصلح لبعض والرجال معقد بس ماقلت شنو المشكله بالضبط ..
ما صار اي تواصل بيني وبينه .. الا في اول اسبوع من رجعنا امه ( عمتي ) اتصلت علي وتسالني عن الاسباب .. قلت الها والله يا عمتي ماعرف شنو السبب بالضبط اسالي ولدك اهو اللي طلقني مو نا اللي طلبت .
الحين موعارفه شسوي ومالي غيركم افضفض .
اتمنى تشورون علي ربي يخليكم

المشاركة الأصلية كتبت بواسطة خاله بيتا

عاشقة ..
في امكانية انك تكلمي زوجك وللا زوجك مقفل طرق التواصل بينكم ؟

اذا في مجال اتصلي عليه وبلغيه بانك ادركتي غلطك لما ما فهمتي درجة تأثره بالموضوع وظنيتي انه متفهم طبيعة علاقتكم بنسايبكم خاصة انه عرف عن هذا وقت الخطوبة .. لكن انتبهي وما تتكلمي كثير بتبرير موقفك .. قولي هالكلمتين عالسريع وخلي اغلب كلامك عن فهمك الجديد لحدود التعامل مع زوج الاخت وبانك بحثتي عن الحكم الشرعي وعرفتيه ... واعتذري لانك ما اعطتيتي لرأيه حجمه اللي يستاهله وبانك مقدرة بانه الشور له ورأيه هو الصح وبان كلمة معقد مش مقصودة بمعناها وزلة لسان ..
وبالاخر عاتبيه على تسرعه بصوت هادي عتاب احبه انه كيف هنت عليك وكان ممكن تعطيني فرصة اكبر حتى استوعب الحياة الجديدة واتاقلم معها .. وانت استاذي اللي يعلمني بهداوة مو بطلاق .

حاولت يا عاشقة اختار الفاظ معينة بحيث ما تستفزيه . فحاولي تنتبهي لاختيار كلماتك حبيبتي

وخبرينا ايش نتيجة المكالمه حتى نشوف الخطوة الجايه