انا تعبااااااااااااانه تعبانه وايد نفسيا وعقليا وجسديا..
ابى ارجع بنت ابى ارد لحياتي السابقة متناسيه هالزواج وكأنه حلم مزعج ما تعودت عليه لين الحين...

ادري كلامي محبط ويرجعنا للبدايه بس انا ما اقدر امثل ولا اتفاءل تصنعا
عشان جذي اكتب كل شي يصير وبعفويه
شفتوا لما تحسنت فتره كيف كنت سعيده ومو قادره اخبي سعادتي
وكلماتي تعبر عن ذلك...

ولما اتضايق اكتب كل شي يصير بالتفصيل
منه تنفيس لما بداخلي ومنها بحثا عن حل يجبر بخاطري...

غبت عنكم يوم ولا يومين لاني وصلت مرحله كرهت فيه الكلام واللوم
بس اللي رجعني اني محتاجه للبعض منكم اللي فهمني صح
ويجهد ليجد الحل لي ويتابع مشكلتي وشايل همي
الله يسعدكم ويفرج همومكم..

.....

احس اني ابى ابدأ اشرح من جديد....احس في شي غلط وناقص بسلسلة المشاكل
مو مخليتكم تجدون الحل الانسب لي..
اشكر كل من ذكرني بحقوق الزوج فأنا لست عنه بجاهله...
اذا ليش ما اطبق؟.... لاني امممممممم
يمكن لما اعصب (وهالصفه صرتوا متأكدين منها) وارجوا انكم ما تقولون اني حاطه شماعه اعلق عليه اخطائي
لان فعلا عصبيتي ما تحتمل انا نفسي اتعذب منها...
وارهق تفكيري بمواضيع صارت ومضى عليها الدهر وبمواضيع قاعده تصير وحارقه اعصابي عليها
وبمواضيع ما صارت وقاعده تزيد وتؤجج المشاعر السلبيه فيني مثل ما قالت بسمه

بالله بشوي تفكير ما تشوفون اني اعذب نفسي اكثر مما اعذب زوجي؟!!!
انا احزن على نفسي اكثر من زوجي واظن اني اقسى على نفسي كثيرا
يمكن لاني كل اللوم يجيني على تصرفات زوجي...
ومحد يلومني على أذيه نفسي.. اللي لو حليتها وحميتها من هالعصبيه اعتقد راح احل كل مشاكلي الزوجيه..

زوجي انسان طيب وحنون ويعرف الاصول ومصلي ويعرف حقوق الناس .... اوكي ما اختلفنا عليها..
هذي الصفات اللي الكل يشوفها ويعرفها من خلال لقاء للشخص او الكلام عنه بشكل عام..
بس في صفات فيه محد راح يعرفها الا بذكر مواقف صارت بيني وبينه او حديث جرى بينا..
هنا راح تطلع سلبياته فهو ليس انسان كامل واكيد به سلبيات كثير
ولازم تذكرونها بدل ما تحاولون انكم تظهرونه بصورة ملاك ومظلوم...

فأنا لست ظالمه والا ما ذكرت اخطائي وندمي وايضا صفاته الحسنه...
بتقولون شو اللي رجعنا للبدايه
بذكر لكم آخر الاحداث يمكن تفيدكم بشيء...

...........


افضل اذكرها بمشاركه جديدة...

هلا ومسهلا ببسمه والله
سعيده لانك موجوده وراح تسمعين الاحداث الجديده فرش...

آخر الاحداث صارت قبل يومين..
بدايه كان المفروض يجي بوظبي يوم الثلاثاء ولكنه مرض وما قدر...
جاء يوم الاربعاء اللي هو البارحه...

وصل 2و ونص الظهر تقريبا وانا كنت توني واصله البيت خليته يمر علي عشان اروح معاه الشقه
نرتب اغراضنا مع بعض ... والحقيقه عشان اشوفه لاني اشتقت له...

بعد ما رتبانا وجمعنا صارت الساعه 4 ونص هنا نزل عشان يجيب واحد يحمل الاثاث
عرف انه ما يقدر ينزل الا بورقه...

جاء وقالي السالفه... قال اوووووووف شو هالحاله ضارب خط وجاي عالفاضي!!!!!
يعني شوفته لي ما همته؟!!! وانا من قبل ما يجي عرفت بس كنت اقص على نفسي..
لانه ولا مره من راح قال ابى اشوفج ولا اشتقت لج وانا عاذرته لاني ما اقوله..
بس انه يقول فويهي جذي... اعتقد قهر صح ولا لاء
ردة فعلي كانت هاديه... وطنشت كلامه... قلت له شو رايك انزين نطلع مكان نقعد مع بعض؟
تدري مو شايفين بعض من زمان....

قال لالالالالالالالالالالا لازم ارد دبي عشان وراي كليه .... قلت له مو لو كنت نقلت الاثاث كنت ما بتروح...
قال لا تعرفين عندي ماده مهمه ولازم حضرها والامتحانات قربت...
تضااااااااااايقت واااااااايد وقلت له ... والله بكل هدوء... كيفك...

وشي بعد عشان ما انسى كان المفروض تجي السياره 5 بس هو أخر اشوي يعني لين 6 ونص
قلت له انت قلت ما تقدر؟ قال لا عادي ...
تدرون ليش أجل؟... مو عشان سواد عيوني... عشان ادري مو المفروض اذكر بس بدينا بصراحه وراح استمر فيه..
أجل عشان نفسه لانه كان يبى اللي كل ريال يبى من حرمته؟!!!
كرهته لانه مرتب كل شي مثل ما هو يبى وترضي مصالحه..

المهم بعد ما نزلنا ما اشتغلت سيارته ... قلت له احسن يمكن الله يبانا نقعد مع بعض...
رد كعادته ... وبسخريه؟... والله....
وراح المحطه القريبه منا و... المهم شغل سيارته ورحنا عشان يوصلني البيت..

فالطريق حاولت ادلعه واتقرب منه .. قعدت العب بشعره وامسح على ويهه واقوله اني كنت اباه يقعد اكثر..
تخيلوا شو رد... دق تليفونه ورد عالمكالمه ولا صبر حتى اكمل كلامي...
بتقولون الريايل جذي .... بقولكم لا انا اعرفه لما في سالفه مهمه ولا لو نتكلم عن دوامه واهله يطنش المكالمات..

وتدرون شو كانت سوالفنا..
عن دوامه الجديد وانا اسمعه لاني اعرف انه مستانس بدوامه الجديد.. وانا اصلا دايما اسمع سوالف دوامه
ولا مره فشلته ولا بينت اني متضايقه من سوالفه الممله عن الدوام...
بالعكس اسأله وابين له اني مهتمه...

بس تدرون شو اللي قال عن دوامه... بدل ما يقول لي دوامي مريح ومدير والموظفين وهالخرابيط..
يقول تعرفين ربيعي شو يقول... حظك بايخ لانك تحط بقسم كله مطلقات؟!!!!!
يعني هاللي لاحظه فالدوام؟؟؟!! هاللي لفت نظره؟!! هاللي عجبه؟!!!
اوكي ما قلت شي رياييل وهذي سوالفهم .... بس ليش تقولي انا؟!!
انا مو أختك ولا ربيعتك عشان تسولف عن الموظفات....
ولا تقولون وادافعون عنه ... ادري بتقولون يحاول يثير غيرتك... بس هو الله ثم والله ما يقصدهالشيء..

مو اول مره يسولف عن بنات الدوام دايما وكل مره يدخل موقف صارله مع بنت ولا شي صار ويا البنات بشكل عام..
يعني بتقولون مو جديده اشمعني الحين...
بقول لان نحن صار لنا فتره مو شايفين بعض والمفروض نسولف عن شي يخصنا.
او حتى يسولف عن الدوام بس يقول يعني شو مميزات دوامه عشان يقنعني ويخليني اقبل بدوامه..

انا قلت له صدق حظك بايخ طحت ويا بنات كلهم خربانات... اسفه والله ما اقصد الاهانه ولا اقصد ان كل المطلقات...
سلوكهم شين ... بس قلت هالشيء من قهري...

قالي لالا اخت ربيعي اسمها فاطمه لما شافتني استانست وودتني عند المدير
وقالت ما اوصيك فيك فيه ترى هذيل اهلنا وجيرانا... ما شاء الله عليه متذكر كل شي بالتفصيل...!!!..
حتى قال بعدين هي ضحكت حليلها هالبنت وايد طيبه ما شا الله عليها!!!!!!!!! ألف علامه تعجب ما راح تفسر تصرفه

وانا كله اسمعه وما اقول شي على امل انه يخلص وادخل فموضوع يخصنا...
بس هو مسترسل عن مغامرته ومواقفه اللي ما تنسى ويا الموظفات...
انا عن نفسي طلعت بهالتفسير... هو من اهل دبي وهم اشوي منفتحين ... فتعاملهم مع الموظفات عادي...
وانا اعرف هالشيء...
بس حد يعطيني تفسيره عن سوالفه عن الموظفات... حتى السوالف الخاصه...
والقهر انه يحلل لهم كل شي وعادي عنده كل شي ... بس انا يعلق على كل تصرف اسويه ...
خصوصا اني في فتره تدريب... وانا الصراحه كنت اقوله عن كل موقف يمر مع اي واحد عشان ارد له الحركه..
او حتى اخترع وأألف شي من عندي .. لاني ما احب اصارحه بهالشيء عشان ما يفسرها غيره...

المهم لما قربنا نوصل قلت له لو سمحت ابى فلوس ... عشان اجيب لبس وهو يدري عنها...
قال والله ما عندي شوفي وقعد يشرح كل فلس وين بيروح....
قلت له اوكي خلاص ما ابى.. قال اول ما يصير عندي بعطيج .... كالعاده ولا يجي شي..
بس هالمره ما شددت عشان نصايحكم...
المهم قبل لا انزل عطاني مختصر عن سير عمل الشقه..

قلت له بعد كل القهر اللي اكلني منه طول اليوم...
ترى شوف انا مو اكيد حسمت قراري في اشياء لازم نناقشها عشان اقتنع واجي
قال اوكي وانا فالدرب رايح دبي بكلمج....

اتصل بديت معاه الموضوع وحاولت اكون ذكيه (اونه يعني) وافتح الموضوع برويه..
فكان التالي....

قال: ها شو قلتي؟!!!
قلت: انا لحقت افكر...
قال: اوكي ليش ما تبين تيجين..
قلت: انت ليش تباني اجي؟
قال: شو ليش؟ شو هالسؤال كل ريال يبى حرمته تكون معاه..
قلت: اوكي وصلنا والريال شو يبى من حرمته وليش يباها حوله؟؟...
قال: بس لاني اباج وياي!!!!
قلت: انا اللي اعرفه الريال يبى حرمه تراعيه وادريه وتهتم فيه وتسأل عنه وتخدمه..
قال: صح..
قلت: اوكي ليش انت ما تقول هالكلام... ليش ما تحسسني ان انت تباني لانك محتاجني ...
قال: يعني الريال ليش يبى حرمته..
قلت: بصراحه انا ماخذه فكره انك تباني بس عشان تسكت الناس وما ياكلون ويهك..
قال: طال عمرج انا ما اخاف من حد ولا يهمني كلام حد..
وانا اعرف هالشي يهمه وانه قاعد يكذب...
قلت: انزين انت تعرف اني حامل وتعبانه وما اقدر عالبيت بروحي
قاطعني
قال: من كبر بيتنا يعني..
قلت: انت شفت شقتنا اهني كيف صارت لما اهملتها اسبوع واحد وانا ما راتاح فبيت وسخ..

وانا اتكلم فعز الكلام ... قال... خليني اكلم بوعبدالله واشوفه وصل الكليه ولا لاء؟!!!!!
قلت: انا اكلمك بموضوع مهم يخصنا وانت ما همك ...
قال: بشوف الريال وصل...
قلت: يعني بتضيع بدونه؟
قال: برد اكلمج...
قلت: له شوف انا مو فمدرسه وعطيتني ورقة رحله وتبى موافق ولا غير موافق.... نح نلازم نتناقش..
قال: اوكي دقيقه بكلم الريال وبكلمج..

تخيلو ما كلمني وطنشني وانا رحت نمت... والمفروض يخلص 8 بس كلمني الساعه 10..
قلت له وينك قال اختربت السياره عند باب الكليه.. عشان جذي ما كلمتج .. هذا وهو راد البيت والدرب طويل
وسولفنا مره ثانيه عن الانتقال...

طولت وايد بذكره بالرد اللي بعده...

المكالمه.... بذكر المهم بدون تفاصيل لانه تقريبا اعاده لما قلت..

قال لي ليش ما تبين تيجين ..قلت له ما بكلمك عالتلفون عشان ما تقاطعني
تبى تعرف تعال عندي وكلمني...
قال لا ما بقاطعج ....
قلت له سالفه التعب والحمل لانه ما خلاني اكمل قبل ..
قلت ابى وحده تساعدني وتيجيني يومين ولا 3 بالاسبوع.. قال ليش بيتنا شو فيه...
قلت انا ما اقدر اتحرك وايد انا تعبانه... وصدق انا اتعب بسرعه...
قلت: انت تقدر على مصاريفها ولا لاء؟ قال أقدر... قلت شو يعني؟ قال يصير خير..
قلت ابى رد أكيد.. قال خلاص بنشوف...

قلت له بعد ان هو بيوديني اهناك عشان الاحسن ولازم يزيد مصروفي...
قال صعبه لان الواحد ما يتطلع مره وحده.. قلت اللي يسمع ما ادري كم طالبه..
وهالشيء محد يحاول يثنيني عنه لاني ما راح اتنازل عنه...

وصارت تفاصيل طلعت منها بنتيجه اني مو اكيد بروح له
لاني ما اظمن الراحه اهناك عالاقل لين ما اربي
والقرار مو اكيد وقلت له هالشيء
قلت في اشياء مو عاجبتني فيك من رحت اهناك...
وبشوف اذا غيرتها ولاحظتها بفكر بعدين واذا لاء انا ما راح اجي
سألني شو هي؟
قلت انت فكر انا ما بقولك..

وانا اقصد ابى اشوفه بيهتم فيني و لالاء
لان لين الحين ما صار فرصه عشان اختبره لانه كان لازم يكون بينا اتصالات
عشان الشقه والاثاث وغيره

واليوم اول يوم من نقل الاثاث بس ما كلمني طول اليوم الا قبل اشوي لما اتصلت
قلت له ليش ما كلمتني..
قال كنت مشغول وانقل وهالخرابيط.. قلت 5 دقايق بيأخر كل شي...

لا تقول ان عالاقل يسأل ونحن ريايلنا ما يسألون عنا وان هالشيء طبيعي
كل واحد وحسب ما هو متعود من زوجه وانا متعوده انه يسأل واسأل عنه...

وبس تعبت من الكتابه..