رد: رجعت لطليقي ومعة زوجة والح
أهلين عزيزتي مصونات ...يعز علي إني ألقاك طول الوقت منتظرة الاعضاء يكونوا متواجدين معاك ....هنا ياأختي محد داخل لمجرد سوالف وكلام الأغلب بيدخل يشارك برأي او حل ويطلع وإذا شاف مستجدات يرجع يشارك ....أنتي مو قاعده تنزلي مشكلة وتنتظري رد انتي متعلقة انه الكل يرد عليك ويواسيك عشان كذا بتزعلي لما مانرد وتعتقدي محد يبغاك ...
لازم مصونات تساعدي نفسك وتقنعي نفسك بنفسك الناس ماراح تكون متواجده معاك على طول هو متعب بشكل عام حتى لو إنسان ماعنده مشاكل انه يغير فكره او قناعته فكيف لما يكون الشخص تعرض لصدمات ...بس صدقيني الصدمات هذي مو لانك مالك نصيب بالعكس هذا ابتلاء من الله وعشان نصير اقوى ونستفيد من الدروس .. الله يبتلي عباده الموؤمنين عشان ماتتعلق قلوبهم بالبشر ....اشد الناس بلاء هم الانبياء ثم الصالحون وكل مؤمن يبتلى بقدر إيمانه ....كلنا نمر بلحظات يأس وقهر وحزن وليش يارب انا يصير فيني كذا لاننا ناس ضعفاء لكن الواحد لازم يذكر نفسه بالله ويقنع نفسه إن أمر الله كله خير
بالنسبة لوظيفتك حتى لو هذا الشخص هو سبب توظيفك وإنك مو على قدر الوظيفة فهذي نعمه إن الله سخر لك احد يتوسط لك بوظيفة في ناس تتمنى ابسط شيء
لاتفكري برأي الناس فيك لان آرائهم خذلان فوق خذلان والناس كل يوم برأي
اهتمي بنفسك بتطوير ذاتك قارني مصونات هذا العام بالعام الماضي ايش تطور فيك ايش استفدتي من التجارب وكل سنة حاولي تنافسي نفسك بنفسك
الحزن موجود بالقلب لكن لاتوقفي مهما كنتي حزينة ...ونصيبك من الزواج الحمدالله على قضاءه الرجل اعادك لعصمته بعد ماكنتي مطلقة مع ان غيره ممكن يتعقد منك انك ماصارحتيه بالبداية عن مرضك فهذي نعمه الحمدالله
اما الحمل لاتشغلي نفسك فيه لانك راح تزيدي بسوء نفسيتك تأخيره إذا الله اراد لك بيكتبه لك عليك تدعي الله وانتي محسنة الظن فيه واتركي الامر لله
لاتعتقدي إننا ملاىكة او عايشين احسن عيشة بس الحمدالله كل سنة الإنسان يوصل لقناعات ماكان مقتنع فيها من قبل والحمدالله الله يفرج همك وييسر امرك يارب ..