مجروحه

انا لو قلت لاي شخص او حطيت في بالي انه هذي اخر فرصه رح أكون دقيقه جداً في تعاملي واكون حذره وقرفانه
وهو اما يعاند او يحاول ومقهور وإلا مايطلع منه شي يقهرك وانتي بما انه عندك مجهر للفرصه الاخيره رح تمسكيها عليه

قرار الرجوع للحياه الزوجيه مايبغاله شي اسمه فرصه اخيره لانه هنا تعتبر عقاب مو اصلاح

لو قلتي فرصه جديده ومستقبل جديد لصالح بناتنا قبل كل شي
هنا تبعثي في روحكم التفائل وتشجعيه ع اسعادكم
والفرصه الجديده ماتتفعل الا لما تنفضو غبار الماضي وتصفو قلوبكم من اجل البنات الي من حقهم يعيشو بين أب وأم ...

مجروحه غيري اسلوبك مع زوجك وتحملي وتعوذي من الشيطان لانه يحب يفرق بين الزوجين

نوافذ البيت كل فجر افتحيها كلها الى الساعه 7
اشتري ورد طبيعي ووزعيه في كل غرفه وخاصه المطبخ
ابواب الحمامات دائماً مغلقه
هذي الامور تساعد ع خروج الطاقه السلبيه في البيت

وبرضه شغلي سورة البقره تساعدك ع هدوء نفسك وسكينتها

ههههههه
سبحان الله سلوبك نسخة من سلوب زوجتي الله يحفظها
اذا بغت شي تسخدم نفس الطريقة..ومارد لها طلب سبحان الله
الاسلوب لة دور بحياة الزوجين
بصراحة ردك اختصر جميع الردود وحل جذري ولكن يحتاج الصبر
وخاصة مع زوج الاخت مجروحة لانة سلوب جديد
الله لايحرمك الجنة على ماكتبتي

__________________
سبحان الله وبحمده سبحان الله العظيم

السلام عليكم
اشكركم جميعاً على الردود. .
بصراحة كلامكم جعل مابداخي امل وفرصة جديده. .
طبعاً قررت اكلم زوجي من بعد رجوعي ..
وفكرت بطريقة ماتخليه يعصب او تنعاد المشاكل من جديد ..
والفضل لله ثم لكم..
فكان زوجي طالع مع اصحابه وبناتي نايمات وقلت هذا وقت مناسب..
فجهزت نفسي وتجملت وبخرت البيت واشعلت كم شمعه ..وجلست انتظره..
وطال انتظاري وعصبت .. وتضايقت ..
وارسلت له رساله وسألته مطول انت ..
ورد وقال مادي ليش وش عندك..
قلت بس اسال ..
وجلست انتظر وانتظر وانتظر واصبر نفسي ومعصبه ورجعت ارسلت له ..
وقلت له انا انتظرك بكلمك بموضوع
رد خير ان شاالله. .
وطال انتظاري لين جاء ..
ودخل ابتسم وسلم ورديت السلام ..
وبدأ يسولف شوي بعدين قال وش الكلام الي بتقولينه. .!
وهو يهز برجله و يفرك يدينه وياخذ شهيق وزفير ..
سالته .. وش فيك ؟
رد ولا شي ..
قلت الكلام الي بقوله يمكن شي مو جديد علي ويمكن سمعته من قبل ..
وابغا اتكلم بدون ماتقاطعني ..
قال تفضلي. .
قلت له انا اهم حاجه عندي احترامك لي ..
وانا فكرت اعطي نفسي فرصه واعطيك فرصة. .
وانا مافكرت ارجع لاسباب كثيره ..
من اهانه وغيره لاكن لجل تكون فرصة أخيرة. .
وكلام كثير مع انه قاطعني كثيير وبدأ يلومني ويوعد بانه القادم افضل..
وافقت الرأي لاكن بينت له انه كرامتي فوق كل شي.. وشي محد يستحمله..
طبعاً لما جاء بكره قالي انا بطلع انا والبنات للاستراحة مع خواتي وامي
جاوبته ان شاالله وانا مبتسمه ..
ولبست البنات وقلت له انا بروح بيت اهلي. .
اخذ ينظر لي وكأنه مستغرب وفي داخله شي ..
ويسألني .. يقول .. ليش ماودك اروح قلت لا عادي الله يحفظكم ..
بدأ يفكر وكأنه وده يقول شي..
حسيت انه يبغاني اغار عليه ..اوشي من هذا القبيل..
انشاالله اكون قد عرفت اتصرف معاه ..
وان شالله الاقي الاسلوب المناسب معاه..

اشكرك لردك جزيل الشكر اخي محب السنه
وللجميع. .
لي عوده..
🌹🌹🌹

ايوووووه كذا خذي راحتك معى زوجك وكوني صريحه باسلوب رايق وطيب وخليه يأخذ راحته يروح يجي يسوي الي يبيه واعطيه مجال في نفس الوقت للحديث معك وفتح باب للنقاش والحوار
اعتقد انك عرفتي تتأقلمي بسرعه واعتقد انها بدايه موفقه (اهنيك يأختي على اسلوبك الراقي والجميل معى زوجك الله يسعدكم )

__________________
تمنيت حبـاً يدوم طويـلاً .. فـدام الحب وَ رحل الحبيب.

جزاك الله خير وفعلا الاسلوب له دور في الحياة الزوجية ،، والحياة الزوجية برمتها يبي لها صبر،،

__________________
اللهم أسألك أن تحقق لي ماأتمناه عاجلا غير آجل .. وأن تحقق لأختي "المنسية" راحة وسكينة وعافية ..

ممتاز أخت مجروحة ،، حطيتي رجلك في الطريق الصح ،، الان خلاص قفلي على الماضي ابدأي مع زوجك حياةجديدة ،، انتِ ناقشتيه ووضحتي له اللي في خاطرك واللي تبينه منه ،، رسالتك وصلت له ،، الان اشتغلي على وتر انوثتك وكيد النساء وصدقيني راح تاخذي اللي تبي ،،


الله يسخر لك زوجك يارب

__________________
اللهم أسألك أن تحقق لي ماأتمناه عاجلا غير آجل .. وأن تحقق لأختي "المنسية" راحة وسكينة وعافية ..

ماشاء الله تبارك الله مستجدات مفرحه

وباين الراحه والنفسيه الحلوه بكلماتك
الله يتمم لك امورك علي خير يارب
زوجك فيه خير ان شاء الله
وباين انه حاب يتغير عشانك ( يعني يحبك )
استمري بمحاولات تغيره باللين والاسلوب الحلو

بآنتظار جديدك

__________________







بين منطُوٓقّ لم يُقصَد ،
ومٓقٓصُود لمُ يُنٓطق ،
تٓضِيٓع الكٓثِيرٓ مٍن المحٓبة . . .


هديتك لخطيبتك ، النظره الشرعيه ، ليلة الدخله
تدخلات الاقارب ، اختيار شريك الحياه ، نصائح ذهبيه
تجهيزات وترتيبات شهر العسل ، مكالمات ولقآءت الملكة
هديتنا للمقبلين والمقبلات علي الزواج

مفضلة المقبلين على الزواج 2014

الحمد لله على هذه البشائر الطيبة

الله يحفظكم لبعض

وبإذن الله ستنجحين و ستنالين ما تسعين له

إستعيني بالله توكلي على الله

وستجدين نفسك كل يوم أفضل من اللي قبله

أسأل الله أن يفرج هنا وهمكم وييسر أمرنا و أمركم

السلام عليكم ورحمة الله وبركاته. .
اشكركم جميعاً للرد..
احب اوضح انه الشي الذي فعلته ليس بالجديد..
انا سويت له قبل افضل من كذا وحاولت احتوية ..
يعني الي يقولون لي ممتاز وعرفتي له احب اقول هذا الأسلوب ليس جديد علي ..

ولاكن اشعر اني في حلقة قاعده تعيد نفسها..

زوجي بداية اليومين الي رجعت له كان تمام يعني بدون مشاكل وينتظر مني الاحسان والحب و الدلال..

طبعاً مابخلت عليه .. بحكم اني بديت معاه صفحه جديده.
وسمعت كلامكم وطبقته...
حتى ماصرت أكثر طلبات ولاحظت كل ماقلت له في شي ناقص بالبيت تضايق..

فحاولت ابتعد عن الي يضايقه أيضاً. .
يتضايق لما اسأله وين رايح ..

فصرت ما اسأل وارحب فيه اذا دخل..

مع اني مشغوله بالبنات فصرت ما اقدر اودعه عند الباب.. بس ارحب واهلل اذا جاء..

ما اقصر من طبخ وتنظيف وتبخير البيت..

ولما يدخل المطبخ ويلاقي صحن اوثنين يبدأ يتكلم ليش المطبخ وصخ ماتظفين.. مع اني اطلع منه يلق لق .. والله شي بسيط مايستحق انه يتكلم فيه..!!

رتبت الشقه وحاولت اغير ترتيب بعض الاثاث وفجأه صار عندي شد عضل برجلي بالكامل ..

ومع هذا ماريحت نفسي قمت وطبخت وجبت له الشاهي والقهوه ..

وكنت تعبانه كثير وبنتي عندها روضه وكنت بحممها وارتب ملابسها..

ويناديني اشيل الشاهي فقلت مااقدر... رجلي بعد اشوي ويناظر لي بسخريه..
ماعطيته اهتمام.. قمت على طول تجنب المشاكل ..
وقالي هذا انتي قمتي شيله تحلمين اشيله عنك..
وشلته تجنب للمشاكل وانا الله اعلم بحالي..

ورحت و حممت البنات وخلاص ماعاد فيني طاقه جاء وقال .. تبون شي انا طالع قلت له ياليت تعطي مريول البنت الكواي لاني تعبانه ..
رد قال .. ليش كواي عندك مكوى واكويه انتي.
مارديت وسكت ومشيت الامر مع ان اسلوبه ينرفز وانا الي ادلله وارحب فيه واراعي رغبته ويرد علي كذا ..

المهم..
رحت السوق مع اختي وسألني معك فلوس فقلت معي 200 ريال وما اظن تكفي احتياجي قال مامعي شي انا انتظري اخر الشهر اعطيك..
سكت ومارديت ..
ولما جيت انزل مد لي مية ريال ويناظر لي وكأنه معطيني مية الف .. ينتظر مني ردة فعل قويه..

فهمت اهو وش يبي وتشكرته و قمت بالواجب..

رحت السوق وشريت بعض الاغراض من ظمنه كريم جسم وعطر جسم كنت ناويتهم لي بس جاتني فكره وانا اشتريهم وقلت ليش ما اشتريهم له ..
واقدمها هديه له لعل نفسه تهدئ ..
وشي بداخلي يقول نفسك اولى يافلانه تفكرين فيه وهو مافكر فيك و يمد لك مية ريال..
ونسيتي ايش سوا .. وتقصيره هو المفروض الي يهديك مو انتي ..
وارجع اقول بداخلي يمكن هذا الي قدر عليه.. حسني النيه و عشان خاطر بناتك وتعشين بسلام ولو كنتي كارهته والسعاده ليست محصوره على زوج..

واتوكل على الله .. واحط معها باقة ورد صغيره ..
رجعت من السوق عند اهلي وجلست انتظره وماجاني الا الفجر ..
تضايقت كثييير ولاكن على طول جيت ونمت عشان لا ابين له اني متضايقه ..
مع اني اتفقت معاه على موضوع السهر ..
ولاكن ....!!!!
المهم قمت الصباح وصليت وابتسمت في وجه وصبحت عليه ..
وبعد حديث خفيف سألته ليش تأخرت امس عسى ماشر ..
قال انا ارتبطت مع رجال ولا قدرت.. ويتكلم بعصبية شوي ..
طلعت ورجعت له وانا بيدي الهديه له و باقة الورد..

ابتسم ابتسامه عريضة و فرح كثير ورجع سالني قال انتي متضايقه عشان تاخرت عليكم جاوبته ايه ..
فرجع يوضح لي انه ارتبط بواحد من اصحابه.
شكرني على الهديه ومدحها ..

كنت في جهاد مع نفسي اني اقدم له الافضل وما استطيع عمله ..
وهو اشعر بوده للمشاكل وخلافي في كل شي حتى الأكل وانا ماقول غير ..

حاظر تامر امر طيب الي تبيه يصير ....

طبعاً بحكم انه مدرس بقريه فهو مايقدر يودي البنت للروضه ..
فسألني من بيوديكم قلت له ابوي بيودينا عنده خبر ..
قال لا السواق حق امي وخواتي يوديكم ..
قلت مايمدي الوقت ..
وعصب وبدأ يتكلم انه انا ابوها وانا الي اقرر
وانتي عشان السواق لامي وخواتي ماتبينه وبدأ بموال مسكرينه..
سكت ومارديت ابد وقلت يصير خير ..
طبعاً الوالد وداني ..
واصر علي عن الرجوع انه سواق مرت ابوه واخوانه من ابوه هو الي يجيبني للبيت وافقت..
مع ان ابوي كان ينتظر اتصالي عشان يرجعنا وهو في دوامه..
لما رجعت للبيت اتصلت على ابوي واخبرته اني جيت مع السواق..
قالي انا كنت انتظرك .. سالني عن اموري مع زوجي ؟
جاوبته ب الحمدلله ..
سالني اذا انه لازال يضايقني ..
جاوبته ب الحمدلله..
..........
اليوم رحت اشتري اغراض للبنت بالوضه باصرار من بنتي مو مني وراح معنا ..
متنرفز يبحث لزله كما كان ..
يضع اللوم علي فجأه ويقول ليش متضايقه هاه خير انشاالله. .
وانا طبيعيه جدآ مع اني كنت اضحك واسولف مع بنتي ..
وبعدها مسكت بيده بقوه وماتركته خمس دقائق و افلت يدي بحكم انه يسوق..
دخلت السوق وقال يله خلصينا خوذي الي قدامك جاوبته انه غير مناسب بكل هدوء
نظر لي نظرة السخرية ..
قال.. وش يعجبك انتي .
رحت للمحل الثاني وكان زحمه وحر وماتحملت فطلبت مقاس للبنت قال زوجي للعامل نبغى المقاس الفلاني
جاوبه العامل مافيه..
العامل مادور ولا شي .. فحرصآ مني سالت العامل الثاني وجاوبني مافيه..
وعصب علي وقال انا سألته ليش انتي ترجعين تسألين..!!!
هذا استنقاص من قدري انتي ماتشوفيني رجل ...
واصر علي باخذ اي شي قدامي وخذيت الي قدامي وقالي اطلعي للسياره يله..
انا احاسب واجيك..
طلعت للسياره. .

ركبنا السياره ورحنا للكوفي وقال انزلو
نزلت وانا عادي ولابينت له اني متضايقه من اسلوبه خصوصا اننا في مكان عام والمحل كان مليان..

وكنت اشوف الناس المتافهمه كيف يشترون لاطفالهم سوا ويشاركونهم الفرحة ومتفاهمين..

جلسنا في الكوفي تقهوينا بدأت اسولف عن اي شي امامي حتى لا اعقد الامور وعشان يشوفني عادي وفرحانه معاهم..

رحت بيت اهلي وجلست عندهم شوي ..
رجعنا للشقه..
لما جيت انزل من السياره .. نادتني بنتي وقالت ماما شوفي الهديه بالسياره التفت وابتسمت وسالته لمين هالهديه جاوب اي هديه والتفت وسكت شوي بعديت قال ايه تذركت هاذي هديه من واحد من اخوياي لي توه جاي من السفر ...
قلت اه كنت احسبها لي بمزح ..
ونزلت..
جاني في الغرفه.. واعطاني علبة مناظر سالته وش هذا .?
قال افتحيه ..
فتحته لقيت نظاره ..
قلت تتهنى فيها يارب نظاره متازه ..
وسكرت العلبه واعطيته اياه
قالت هاذي من خويك ..
جاوب ايه ..
بعدين رد علي بعصبيه وقال افتحيه شوفيه زين انا البس هالشكل..
رجعت وفتحت قلت له وش اشوف..
رد بعصبية وقال هاذي لك هديه..
قلت هاذي خويك الي شاريه صح
قال ايه وانا اعطيتك اياه هديه وانتي هاذي ردت فعلك ..
انا اقدر اعطيه خواتي لاكن قدمته لك هديه..

جاوبته .. وانا اعلم الغيب !! انا ماكنت ادري ان النظاره مقدمه لي هديه ولا ادري لمين كنت اظن بتاخذ راي عليه .. وانه لك..

قال هو جايب لي 3نظارات رجاليه و وحده نسائيه.. وانتي منتي كفو الواحد يجيب لك هديه .. وانا ماسك اعصابي عليك وانتي مستحيل تتغيرين ..
وانتي تدورين المشاكل من رجعتي وانتي تبين تمشيني على كيفك...
وتبين كلمتك هي المنفذه..
و و و و

انا ساكته ويعصب ويقول ردي علي انا اكلمك لا تجاهليني ..

جاوبته ماعندي رد ..
قال اعترفي انك اخطيتي اعترفي ..
قلت انا ما اخطيت ..
قال .. انتي تكابرين هاذي مشكلتك. وماتعترفين بخطاك ابد .. انا ساكت ومتحملك وانتي تدورين الشر . ..!!

قمت ورحت غرفة بناتي ..
رجع يلحقني ..
جلست على سرير بنتي جنبها
وبدأ يسألني انتي تبين تنامين هنا وبعصبيه
جاوبته مادري ..
سالني . من بيودي البنت الروضه بكرى ..
جاوبته .. اذا قمنا يصير خير مادري..

خرج ...

بعدين رجع
وقال .. انتي تتحملين نتيجة تصرفاتك والي يبي السعاده يسعى لها.....!!!!!!!!!!!!!!!!!!!


اترك لكم التعليق

انا بحال الله يعلم فيه ..
انا بضيقه منه ومن تصرفاته ..
اشعر بألم في قلبي ليس الم وهمي ..
اكتب وعيناي تذرف دموع قهر وحسره وقلة حيله ..
رجل لايرحم رجل مريض بشي اسمه الرجولة
يخاف من اي شي ينقص من رجولته..
رغم ثقتة العمياء والغير طبيعيه بنفسة ..

يصفصف الكلام جيدآ ليخرج نفسه مثل الشعره من العجين..
ثم يجعلني الخطأ الكامل واني هذا ما اريده..
يتجاهل كل امر طيب مني..
ويقول عكس ماكنت افعل معه ..!!

وينبش بالماضي ليجعلني الخطأ..