أحيي فيج مرونتج ورغبتج الصادقة بإصلاح الأمور ..
ربي يهدي زوجج ويريح بالج وغن شاء الله ترجع العلاقات بأفضل مما كانت ..
مثل ماقالت زهرة الجاردينيا .. أعرفي كيف تتعاملين مع زوجج بطريقة ماتبخصج حقج ..

على فكرة روح ..
بذكر لج موقف صديقتي .. قبل اسبوعين تقريبا أو يمكن أقل .. عشان تعرفين إن فيه ناس مروا بنفس موقفج :

صديقتي هاذي أول زواجها سكنت ببيت أهل زوجها .. بغرفتين وحمام بداخل البيت نفسه، يعني تدخل من بابهم وتمر بصالتهم وتستخدم درجهم وباب غرفتها يطل على الصالة اللي بثاني دور .. كانت جدا مستاءة لأنها تبي بعض الخصوصية .. تقول لو ترجع من السوق يعرفون إنها راحت السوق .. لو زوجها يشتري من مطعم لازم يحسب حسابهم لأن عيب يشوفونه داخل بالكيس ومايعزمهم .. وأهلها ينحرجون يزورونها .. وغيره الكثير من فقدان الخصوصية ..
بعد كم سنة ربي وفقهم وطلعوا بشقة وهي تساعدت مع زوجها بالايجار والمصاريف .. انضغطوا ماديا لكنها ارتاحت نفسيا لآخر درجة .. وبعد سنوات من الاستقلال والراحة زوجها فجأة قرر يرجع بيت أهله ..
جلس معاها وشرح لها ظروفه وإن الضغط المادي مسبب له أزمة وإنه خلاص قرر ومافيه رجعه.. وبما أن ملحقهم خلاص أخوه قعد فيه .. واساسا صغير مايكفيهم ولا فيه مطبخ .. راح يبني ملحق فوق السطح .. يعني ثالث دور ..
هي زعلت كثير وقالت حاولت معاه ومافيه فايدة هو مقرر وخالص ومافي أذنه ماي ولا بيتراجع أبدا .. بنى القسم اللي لهم واختار الأرضيات والحمامات والمطبخ وهي ما اختارت معاه .. كلما سألها قالت كيفك حط اللي تبيه .. وانتقلوا في وقت قياسي وألحين المسكينة نفسيتها متعبة من التغيير الجذري بحياتها .. وتقول أرضية المطبخ ماتناسب خزاين المطبخ .. وأرضية الغرف رمادية مب حلوة .. قلت لها لو إنج مطيبة الخاطر ورضيتي بما كتبه الله لج .. ورحتي مع زوجج برضا وأخترتي اللي تحبينه كان أفضل من الزعل اللي زعلتيه .
وبعدين صاحبتي وجودها في بيت أهل زوجه افيه ايجابيات .. ليش الواحد يركز على السلبيات وينسى الايجابيات ؟
أولا ماديا راح يرتاحون .. وهي من زمان ودها تسافر وعشان المادة مايقدرون ..
لو ابن لها مرض أو أثناء اجازة المدرسة تقدر تخليه بالبيت وتروح العمل وهي مطمئنة عليه بيكون عند جدته وأهله ..
ترجع من شغلها تلاقى غداها هي وزوجها وعيالها جاهز مايحتاج ترجع من العمل تعبانة وتدخل المطبخ تطبخ .. والكثير من الايجابيات .. يكفي إن زوجها بيكون مرتاح نفسيا .. واحنا كلنا نعرف كيف نفسية الرجل تاثر على حياته الزوجية بشكل عام ..

آخر يومين شوي تحسنت نفسية صديقتي وتقبلت واقعها وتاقلمت مع وضعها الجديد .. وإن شاء الله يطلع لهم بيت حكومي قريب ..

براءه جربت طريقة الاقتضاب بالردود

بس مااستقدت غير ان يمسكها على سنتين جدام

ويروح عند أهله ويقول هذي بس تزعل ونفسيه

زين فكر اشوي ليش صرت نفسيه اكيد من شدة الظلم اللي وقع !!!

زهرة الكاردينيا

اعترف اُسلوب المراوغه عمري ماجربته وماعندي دهاء نهائيا ولا كيد

وااااااضحه وصريحه

ماأعرف اسلوب السياسه والمراوغه

اللي عندها طرق تعطيني.

بس من داخلي أكره هالتعامل ماعرف ألف وأدور

تصدقين وانا اكتب تذكرت مره زوجي قالي مع السوالف

اذا كان عندك حاجه عند الكلب قوله ياسيدي

اكره هالقناعه ماأحب

فا إي نعم المراوغه ماجربتها

ماأعرف 😭

مسز داني اهلي داااايما يتدخلوووون بس ماكو فايده ومو ساكتين الا انهم خايفين يتدخلون ويخربوووون الزواج بس الحين احس في تغيير فيهم

وانا بديت اخاف بصراحه ان يجبروني على الطلاق عن طريق الضغط

لأَنِّي شفتهم مجتمعين ذاك اليوم بالديوانيه في غير يوم جمعتهم

ووصلني كلام ان مو عاجبهم الوضع

وممكن راح يتصرفون

وكلمت اخوي اجس النبض قالي ليش ماتتطلقين وتاخذين أحسن منه !!!!!!!!

سكت ماعرفت شنو أرد ؟؟؟؟

وقالي اذا رفض نسوي خلع

😳😳😳😳😳

مريم حبيبتي مشكوره على كلامج اللي انتي كاتبته

وايد ريحيني

وأحس نفسي مقهورة من نفسي ليش ست شهور ماعرفت ازعل نفس الحريم أسكر جوالي وماأخليه يشوفني ولايطلع معااااي

كنت لا عادي يدق أرد يسولف ويضحك ويقول احلا كلمات الحب والرومانسيه

ويوميا عياله يروحون سوبر ماركت معاه وألعاب ويكلمنا مكالمة فيديو على طووول

صج طول هالست أشهر انا عمري ماأتصلت!!
اهوا اللي كان يتصل يعني اقصا زعل عندي اني كنت ماأتصل بس استقبل مكالماته

كل يوم دوام وترك يمر دوامي بس عشان يطرش لي يا قهوه من ستار بوكس او آيس كريم او اي شي احبه كل يوم وترك يوصله ليما دوامي

ولما نطلع يعشينا بأغلا المطاعم ( يحب اي مكان جديد اول من يدخله زوجته وعياله )

ويشتري لي كل اللي ابيه

ولما افتح موضوع الرده اهوا اللي يلف ويدورور ويقول لي لما تقبلين بشروطي !!!!

ست شهور بينت له ان مهما تفعل ماراح اقبل بشروطك

بس أمس لما وافقت بس عشان ابي هالاطفال يرتاحون يقولي ماأضمن ...

تعبت نفسيا وأرهقت

صعب صعب

خواتي أحب ابين ملاحظه ان زوجي يقولي وقت الغضب ان الكل يدري اني طاردج من البيت لانج عنيده وقويه ولازم اكسرج

"لازم أكسرج"

طول هالست شهور اهوا يردد هالعباره لما يعصب

وانا مصدقه ان أهله يدرون ان طاردنا من البيت

عشان يربيني ويأدبني

الملاحظة الثانيه اللي أحب اذكرها

من خلال تعاملي بالحياه اي شخصية رجل مشااااابهه لـ زوجي يشوفني قويه جدا

وينزعجون من هذا الشئ

ليش لان هذا النوع من الشخصيات يعتبر الوضوح خلق الرجال مو النساء ( وزوجي منهم ) وان المرأه لازم ماتكون واضحه وصريحه بطلب حقوقها لازم تلف وتدور وتطبق المثل الخليجي

"أتمسكن ليما أتمكن "

خواتي انا فعلا شخصيتي قويه ، بس مو قوة رجل

يعني انا ناعمة وهاديه ... بس واضحه وقويه عند طلب حقوقي



(((((((( فضفضه ))))))))))

أيه صح هاذي غلطتج ..
كان المفروض تبينين له زعلج ..
مايصير يطردج وإنتي عادي عندج ماعطته حقه وتضحكين معاه وتطلعين معاه ..

المهم اللي راح راح ..
آخر موقف بينكم فرصة لأنج تبينين له إنج تعبتي من هالوضع وإنج ماترضين لنفسج أكثر ..
كلميه ووضحيله إنه لا يتصل فيج مرة ثانية وإذا يبي شي يخص اليهال يرسل لج مسج ..

الزوج مايحب الزوجة القوية ..
بس الصراحة أحيانا الزوج بتصرفاته هو اللي يخلي المرة تصير قوية ..
وإلا بينهضم حقها .. أنا أأيد قوة الزوجة .. لكن بنفس الوقت ماتبين له إنها أقوى منه وإن اللي تبيه يصير غصبا عنه ..
لازم يكون عندج ذكاء ومكر .. شنسوي .. هم يجبرونا نصير جذي .. وإلا إحنا ودنا بالطيبة والوضوح والقلب الأبيض ..

انا ثابته على موقفي وماراح ارد على الاتصالات ليما يعدل الوضع هذا