اهلين شيف الغفله
انا طباخه عليمية... و اعتقد اني ممكن افيدك بما أني مو بعيده عنك
الشوربه اللي سويتها و أحس اني مبسوطه منها: شوربة بطاطس .. تملى المعده من جد
بالتفصيل الممل:
إذا كنت حاب تسويها على دجاج... اشتري ظهر الدجاج اللي يبيعونه في التميمي سيفوي (عظامه دجاجه)
خذ الظهر (بما انكم خمسه حط اثنين) و حطها في قدر و اغمرها بالمويه
حط معاها ورق غار + حبات هيل+عود قرفه+مسمار(عويدي)
اتركها تنسلق على النار قد ما تبي. بس لا تخلص مويتها
بعدين هات لك ثلاث حبات بطاطس كبيره و قشرها و قطعها... بعدين حطها مع الدجاج.. و خلها تنسلق لحد ما تصير طريه مررررررررررررره
بعدين تسكر النار... و تصفي المرقه (يعني تصبها في قدر آخر عن طريق ملعقة الغرف و الملعقة اللي زي الشبك أو "المشخله" تغرف من المرقه و تصبها من خلال المشخله في القدر الآخر)
خذ حبات البطاطا و اهرسها سواء بالشوكه أو بآلة الهرس و بعد ذلك تضيف البطاطا المهروسه للمرقه المصفاه و تخلطهما سويا
أضف بعد ذلك الفلفل الأسود و ملعقة صغيرة من الملح.. إذا كنت تحب قطع الدجاج مع الشوربة يمكنك أن تقطع فيليه الدجاج و تطبخه مع المرقه الأساسيه(من البدايه) ثم تضيفه على الشوربة مع البطاطا المهروسه
الحلى مع القهوة
أمس سويت كيكة التمر لزوجي و أعجبته.. بس كانت تشبع مره
كاس تمر(عجوة) + كاس موية مغليه تحطهم في الخلاط مع ملعقة صغيرة بيكنج صودا
كاس و ثلث طحين (ممكن تخلط الأبيض مع الأسمر) و ثلاث ارباع اصبع زبدة + بيضة واحدة+كاس جوز مكسر(جوز أي عين جمل)
بعد ما تحط التمر في الخلاط مع المويه و البيكنج صودا تصبه في سلطانية مع الطحين و الزبده و البيض والجوز تخلطهم بملعقة الخشب...خلطا جيدا
(ممكن تضيف البهارات التاليه : مسمار مطحون و قرفه مطحونه رشة فانيلا و رشة جوزة الطيب)
بعدين تصب الخليط في صينية الكيك المعدة مسبقا(يدهن قاع الصينية و جوانبها بالزبدة) و توضع في الفرن المعد مسبقا
(يجب إحماء الفرن بدرجة حرارة 180) تبقى في الفرن مدة 25إلى 30 دقيقه أو إلى أن تنضج
تعرف انها نضجت إذا ادخلت فيها عود الأسنان الخشبي و أخرجته و لم يعلق به أي عجين
فيه حلى ثاني... مررررررره سهل و لذيذ بس يؤكل بالملعقه:
هات علبتين من بسكويت الشاي اولكر كسرها و حطها في سلطانيه+ علبة قشطه +علبة حليب مركز
اخطهم سوى و بعدين هات لك حبة سنكرز و حبة جالكسي و تكون ذايبه..حطها مع شوية مويه في قدر صغير لمدة قصيره.. بس لا تطول عليها بعدين تحترق
بعد ما تحط خلطة البسكوت مع القشطة و الحليب في الصحن المعد للتقديم.. صب فوقها الشوكولاته بشكل خطوط متقاطعه
أما السمبوسه و الفطاير ... انا اقترح انك ما تسوي لأنها غثى
بس لو كنت مصرررر فيه عجينه سهله للسمبوسه زي عجينة البف ... كوب طحين و علبة قشطة (بالنسبه لك اتوقع لو تضاعف الكمية افضل)تخلطهم سويا و تضيف رشة ملح و بعدين ممكن تقطع من العجينه بيدك و تكورها بعدين تضغط عليها (ذكرتني بحصة الفنية وقت الصلصال
)لحد ما تكون مسطحه و دائرية و بعدين تحط الحشوة في الوسط و تسكر عليها العجينه بحيث تكون نصف دائرة.. و الأطراف تقفلها بانك تضغط عليها بطرف الشوكه.. عشان يصير شكلها حلو
الحشوة الأسهل انك تحط جبنة بيضا و معها بقدونس أو جبنة حلوم و معها نعناع
هذا النوع من الفطاير يقلى بالزيت
الطبق الرئيسي: ممكن أعطيك خيارين
1. البرقر البيتي اللذيذ:
نص كيلو لحمه مفرومه
3 فصوص ثوم مفرومه
ملعقتين طعام زيت زيتون
2 ملعقة صغيرة ملح
ملعقة و ربع صغيرة فلفل اسود
ملعقة صغيرة ريحان basil إذا ماكان موجود في بيتك بتلاقيه في السوبر ماركت مع البهارات في علبه صغيره
و لا تنسى خبز البرقر تلاقيه في السوبر ماركت... أنا احب هرفي اللي يكون عليه سمسم
تخلط المقادير خلطا جيدا.. ممكن بيدك بس البس قفاز
و بعدين بيدك برضو سوي خمس كور متساوية و خذ كل كوره و اضغطها لحد ما تكون بشكل البرقر... اشويها على الشوايه البيتيه لمدة اربع دقائق على كل وجه
و إذا ما عندك شوايه بيتيه... مو لازم تطلع برا.. إذا عندك التاوة حقت المراصيع حطه عليها أربع دقائق و بعدين اقلبها على الوجه الثاني ... مررررررررره لذيذ
____
2. باستا الروبيان و الكريمه
نصف كيلو روبيان مقشر
علبة مكرونة التاقيلتي (تلاقيها زي الشرايط المعقوده مع بعضها و مكوره) احسن نوع بتوني علبتها حمرا و فيها صورة بيض
علبة كريمة الخفق .. احسن نوع اللي فيه ربيان على علبته
فطر طازج (علبه واحده)
4 فصوص ثوم مفرومه
شريحه صغيره من الزبده.. أو ممكن تاخذ مكعب بس انا ما احب اكثر الزبده
اول شي تسلق المكرونه لمدة 6 دقائق(تحط المكرونه في قدر و تحط عليها مويه مغليه و شوي ملح و شوي زيت) و تتركها على النار لمدة 6 دقائق
هات قد و حط فيه شوية زبدة و شوي زيت زيتون (عشان ما تنحرق الزبدة) و تكون مجهز الربيان المقشر و المقطع.. تفتح النار(هادية) و تخلي الزبدة تذوب و بعدين و من غير ما تطول تحط الربيان. و معاه الثوم.. و غطي القدر..
الحين اغسل الفطر كويس.. و قطعه شرائح طوليه
حطه في قدر الربيان
اتركهم عشر دقائق مع التقليب... و تغطية القدر(عشان تشوف المويه اللي تطلع منهم)
بعدين تاخذ المكرونه المصفيه من المويه و تضيفها على قدر الربيان و الفطر و اتركها عشر دقائق لحد ما تحس انها تشربت الطعم...
بعدين تكون مسخن الفرن180 درجه و تجيب الصينيه و تحط في كل قدر الربيان و المكرونه و تحاول انك توزع الربيان و الفطر على اجزاء الصينية
بعدين تصب على الصينية كريمة الخفق.. لحد ما تحس ان الكريمة وصلت لكل الأجزاء بس من غير ما تغرقها
حطها في الفرن لمدة 20 دقيقه و بالهناء و العافيه
بالنسبه لمقدار الباستا(المكرونه) صراحه ما اعرف لأني دائما احط مقدار شخصين و بالنظر
ألف عافيه على قلوبكم
بالنسبة للسماك ......... أنا اعتقد ان المقصود منه هو السمّاق لونه احمر على عنابي و طعمه لاذع يستخدم دائما مع الفتوش... أكيد انك قد شفته
الله يسعدك و يهنيك.. و يسخرك لزوجتك
و يسخر زوجي لي
25-09-2006, 06:10 PM
طلعت حاطه لك معلومه خاطئة.. الله يصلحني... 
ضوابط المشاركة
العرض المتطور