بسم الله الرحمن الرحيم...
أخواني أعضاء منتدى عالم الزوجية السلام عليكم
أنا شاب عمري 20 سنة في السعودية (مهم).. اسمي عبدالله
من المعروف عندنا في السعودية التحفظ الشديد وهذا معروف (الحمد لله) واللهم أدمه علينا
أنا يا أخوان وأنا في سن 16-17(سنة واحدة) اجتمع الأهل وأعمامي في استراحة بمناسبة عيد الفطر.. تعرفون الواحد صغير وبسن المراهقة خاصة مثلي وكانت هناك وحدة بنت عمي عمرها ذاك اليوم 15 سنة أي أصغر مني بسنة تعرفون أمور المراهقة كيف تكون شوفه عبر (الدريشة) النافذة مرة ومرتين في نفس اليوم المهم وأنا أشوف فيها وهي بعدي تقريبا 7-8 أمتار التفت لجهتي وشافتني وأنا أشوفها تعرفون البنت صغيرة وحنا صغار لكن أمور المسلسلات الهابطة وغيره لها دور .. المهم شوف ونظرة إلى ما انتبهت لي (وهي نفسها أعتقد حست أن فيه واحد حبها..أو مو حبها يعني يحس فيها وينتبه لأمرها وهي من بين تقريبا 4 بنات ) وبعدها بعد العشاء رجعن البنات لمكانهن الأول وكان فيه ولد عمي عمره اقل مني ذاك الوقت بثلاثة اشهر فقط وكان جزوم الولد أما أنا ..أوووووه.. خجول مرة ( وهو مهستر) كان جالس عندي قلتله (عن مزح) من تبي تزوج إلى كبرت اخترت أحد الخمس (البنات الي كانن جالسات ومن ضمنهن بنت عمي) قال وهو يمزح فلانه بعدها قالي وأنت قلتله فلانه وأقصد بنت عمي.. المهم قالي ايه تحبه.. قلت لا لا.. قال إلا أشوفك تناظره من الدريشة قبل شوي ومنشغل عنا قلتله لا يبن الحلال وشبك أنت؟؟؟
ومع الضغط (هو خبل) علي قلتله إيه : قال وش فيها؟ قلت: جمال وثقل وممتازة على صفه وعاقله..من هالأمور
قال : زين... اصبر
راح ونادي أحد البنات الي جالسات وقال روح قولي لفلانه (الي تكلمت عنه) أن عبدالله يحبك .. أنا حسبته يمزح .. وبعدها طلع الأخ صادق وراحت وبعدها أنا فشلت أو خجلت ذيك اللحظة ما أدري؟؟؟ وقمت وغيرت مكاني عنها.
بعد اسبوع تقريبا تجمعنا ببيت جدتي وكل العالم جو.. وبعد وقت من الزمن جت لي البنت (الي قالها ولد عمي روحي وقولي لفلانه أني أحبه) هي نفسه جت وأعطتن ورقة فيها كلام عذب شوي وعن حب وغرام وقالت هذه من فلانه(حبيبتي) وكانت هالبنت هي (ساعي البريد) بيني وبينه أنا أعطيها وهي توصل بالخفاء يوم وراء يوم ومرت 4 شهور وحنا على المنوال هذا .. وإلى يوم عرفت امي بشأن المراسلات هذه جت لي وانصحتني وقلت لها ابشري خلاص.. لكن ابليس (أعوذ بالله منه) رجعت مرة ثانية ودرت امي مرة ثانية...
قلت لأمي ليش طيب؟؟...

قالت يا عبدالله الزواج (دخلت بالموضوع مباشرة) كذا وكذا وهذه البنت بنت عمك فيه مشكلة بيني وبين امها..
وتصوروا المشكلة إيش؟
المشكلة أنه يوم من الأيام راحت أمي لعرس زواج في أحد القصور المهم كانت أمي جالسة على أحد الكراسي ومرت أم بنت عمي من عندها ولا سلمت عليها ومشت وراح وقعدت في مكان ثاني(مع العلم أنها ما تقرب لأمي بأي صلة) هذا كلام الوالدة...انتهى
وبعدين الوالدة كبرت السالفة وقالت هذولا مغرورين هذولا كذا وكذا.. ومن كلام الحريم المعهود.
ولكن اشوف والله العكس خاصة ببنات عمي كلهم طيبين محافظين لكن يمكن الوالدة يوم مرت عليها ذيك السالفة اجمعت البنات مع أمهم...
.. وبعدها مع الأيام على ما صار عمري 20 سنة..(وقسم بالله يا اخوان) أني حلمت ببنت عمي معي وحاطت أيدي على كتفها وقاعدة تسولف وتضحك معي (اقسم بالله) وبعدها ذاك الحلم وانا أفكر... وهذا الحلم قبل ما أكتب هذا الكلام بيومين
والآن أنا أبتزوج منها وابيها هي بس والله لو يتدخل العالم كله ما راح أخطب إلى هي...
لكن أمي ما تبي ورفضت...
يا أخوان ساعدون بالقضية هذه... وأنا افهم أن طاعة الوالدين أهم.. يا أخوان والله العظيم واقسم بالله أني ما أحب إلى هي بس..

لكن.. هل أكون أنا وبين عمي ضحية مشكلة قضية أنها ما سلمت علي؟؟؟؟؟ أو أنها مغرورة وكلام الحريم الطويل؟؟؟؟
وكيف أقول لامي أن البنت ما لها أي ذنب بالي صار بينكم ليلة العرس الماضية كيف؟؟؟؟؟
وكيف اقنعها بأني أحبها... أو أكلم الوالد...
مع العلم أن الوالدين الله يخليهم لي ويخليكم والدينكم ما أطيب منهم معي ولا عمرهم ابدا ابدا رفضوا طلب لي وانا أبر بهما ,احبهم حب شديد ..

وموضوع ثاني يا اخوان... اخاف انه احد يجي ويخطبها شخص ثاني .. كيف الحل؟
أتمنى والله انكم تعطوني حل خاصة كيف أني أضمن أنه ما أحد راح يخطبها غيري أرسلها رسالة ..كيف؟؟؟؟؟؟؟
أكلمها بالتلفون؟؟؟؟؟؟؟؟ ما أدري ؟؟؟؟؟
أو أكلم ~أبوها وأنا بالسن هذه؟؟؟؟؟؟ راح يقول توك على الزواج أنا بعد أخجل كثيرا .
أبي حل مقنع ابي حل ايضا أنه كيف أخبر بنت عمي أنا ماراح اتزوج إلا هي كييييييييييف يا أخوان؟؟؟؟؟؟؟
يا اخوان ساعدوني..
وتقبلوا تحياتي ..
عبدالله

مرحبا اخوي ابو صالح
الصراحه من وجهت نظري يفظل انك تخبر الوالدك عن حبك لبنت عمك بما انها اقرب أنسانه ممكن تفهم عليك فتحلها قلبك وخبرها عن حبك لها وخليها تتصرف بطريقتها الخاصه
هاي وجهت نظري
تحياتي لك

أسمع أخوي ......

أولاً: أنت لا تدري أين الخير يكون ولا حتى نصيبك ...... صلي ركعتين واستخير الله قبل كل شي ... لأن هذه حياة وليست فترة بسيطة ..


ثانياً:

عندي لك فكرة :

لما يخرج الوالد من البيت لحاله في أي مشوار روووووووووووح معاه وإذا قال لك ليش ؟ .. قوول طفشان ابي اروح معاك ......

وفي الطريق قول لأبوك أن عندك موضوع مهم مرة ، وأحتاج مساعدتك ، (ترى الأب حتى لو كان قاسي تراه من أول ما يسمع هالكلام من ولده علطووووووول يفتح أذانيه ويستمع له ) ..... على فكرة ترى هذي الأمور بيد الرجال ..... المهم كلم ابوك وقوله اللي في قلبك وقوووول (والله العظيم واقسم بالله أني ما أحب إلى هي بس) ... الحق يا ابوي وكلم عمي في الموضوع لأني ما ارضى أي واحد ياخذها لأني بذبحه !!! ....

وقتها ابوك حيعرف ان الأمر جد ويناقشك واذكر له كل الكلام اللي دار بينك وبين امك لأنه عارف هو السبب وأمك قالت له ....

الأمر الثاني: من ناحية أمك .... ترى الأم تحب ولدها ولا ترضى تشوفه زعلان أو حزين ...... يعني ظبط لك تمثيلية محبوكة أمام أمك ( يعني لازم تشوفك) ومن الأفكار اللي حتغير رأيها :
* لما تجلس للغدا معهم خليك غير طبيعي وكأن في شي مضايقك وكأنك مسرّح ... وإذا حطوا الأكل قدامك كل شوي وبثقل وقوم من على الأكل (طبعا بيقولوا لك ما تغديت ... رد عليهم : ما لي نفس -بطريقة يعني ترو عندي شي مضايقني- ... وستبدأ التساؤلات خصوصا الأم ...... وإذا جاءت لك وسئلتك .... قولها : أنتي لا تريدين فرحتي وخليتيني حزين من بين كل زملائي... والله لو اعرف ان لك امنية تتمنيها وهي مهمة في حياتك والله ما اتردد وانفذها لك .... ( طبعا رتب الكلام االلي بتقوله بحيث يكون اجابتها براحتك ) يعني انت ادرى بأمك وكيف تخليها توافق معاك ... سوي نفسك أنك مجروح من بين زملائك وصدقني انها حتغير رأيها ... وأول ما يصير هاكلام علطووووووووووووووووووووول كلم أبوك واستغل الفرصة بسررررررررررررعة واخطبها .....

وإذا كان ابوك موافق فكلمه يروح علطول لعمك ويكلمه حتى لو بالجوال .......

تحكم في نفسك ...... أنا فاهم شعورك زيييييين لأن الأمر والله مو سهل تخسرها لأنها ما تتعوض ..

وممكن تخبرها بانك ستتقدم لها حتى تسهل هي امورك ايضا..

والله يوفقك...

__________________
بارك الله لكما وبارك عليكما وجمع بينكما على خير

مرحبا اخوي ابوصالح

بصراحه اللهجه القصيميه وااااااضحه عليك مره

ومن ناحيه المشكله اللى طرحتها


مافيه شي احلى من الصراحه

يعني لاأوصيك كلم الوالد وروحوا اخطبوها قبل لا ياخذها غيرك


الله يوفقك والجميع


اخوك

عاشق الندى,,,