السلام عليكم ورحمة الله
أخباركم ؟!

أنا متزوجة من 8 سنوات ، حملت بسرعة بعد الزواج و بعد ما ولدت أختربت علاقتي مع زوجي ، مع الوقت فهمت أنه أستاء من زيادة وزني بالحمل .. رغم اني ما أعتبر سمينة ، يعني متعافية ع قولتهم ، المهم اخذت وقت عشان انزل وزني بس بالنهاية وصلت للي يرضيه ويرضيني .. والحمد لله زانت علاقتنا ومشت الأمور .


قبل فترة لوحده بدون يشاورني قرر انه يترك المانع عشان أحمل ، وفعلًا حملت وولدت بالسلامة ربي لك الحمد قبل شهرين ودوبني رجعت الشقة من يومين ، ما صار بيننا علاقة بسبب نوم العيال وكذا ..

المهم كنا طالعين نتسوق ف دخلت محل نعومي " لانجري وملابس نوم " وكالعادة هو ما يدخل معي ينتظرني برا ، اشويه الا اتصل سرعي اطلعي بنمشي .. قلت اوك حاسبت وطلعت

الا يقول لي أبفهم ليه داخلة هالمحل !!
ضحكت وقلت له جننوك العيال ؟ .. ومشينا

بس ركبنا السيارة الا ويعيد السؤال وهو معصب ليه داخلة هالمحل !! قلت له وش يعني ليه ما ادخله ؟
قال تدخليه إذا عدلتي جسمك ، ما ابي أشوفك لابسه شي منهم ، لا تغثي كبدنا !!


ما اعرف أوصف لكم الصدمة !! سكتت ما قدرت أقول شي !
انا ماعندي مشكلة ومتفهمة انه يبيني اضعف ، بس شهالأسلوب !
خصوصًا ان دوبني شهرين من ولدت ، اكيد بحتاج وقت عشان ارجع نفس قبل !

وبصراحة علاقتنا من قبل كانت روتينية جدًا جدًا ، كنت ناوية أجدد علاقتنا وأتجرأ معه ، بس بعد هالكلام غثني غثني وكرهني في العلاقة بكبرها !


أحاول أكون هادية وكأني ما سمعت شي ، بس قهههرني والله !

فعلا ماعنده أسلوب
وأعرف كلامه يقهر أي أنثى ويهز ثقتها بنفسها
لكن أباكِ تفكري بعقلك هو قال هذا الكلام ومافكر بعواطفه أو إنه ممكن يجرحك، قال اللي يعتقده صح وبس وبدون تفكير بالعواقب .
إنتِ كمان فكري بعقلك و عامليه بهدوء و امسكي نفسك مصيره بيجي يسألك أيش فيكِ متغيّرة ؟!
وقتها صارحيه و حاولي وقت المصارحة ماتستخدمي كلمات عاطفية استخدمي كلمات عقلانية ومو بس تشتكي ، أعطيه اقتراحات لأساليب إذا شاف شي ماعجبه كيف يعبر.

يعطيك العافية خيال ع التعليق
بسبب تجربتي معه في حملي الاول صار معي تبلد من رايه ما عاد يهمني
وبالعكس الحمد لله انا واثقة من نفسي وهو شايف وعارف هالشي ..
خصوصًا أن تصرفاته عكس الكلام اللي يقوله وقت عصبيته
بس هذا ما يعني اني راضية بكلامه وقت عصبيته ، لأن فوق ما انا سكتت و عديت السالفة .. هو بعد عداها وجاني ولا كأن صار شي ولا اعتذر ولا شي .. !
وهذا اكثر شي ينرفزني فيه .. يقول الكلام وقت العصبية ما يعمل حساب لشي ، و وقت يهدأ ما كأن صار شي .. زعلت ولا ما زعلت ما تفرق !
بالعكس اذا زعلت بيرمي الغلط علي و اطلع انا النفسيه !


بعدها بكم يوم كنا نسولف سوالف عاديه وضمن الكلام قال لي انا ودي يرجع جسمك نفس قبل ، قلت أكيد بيرجع انا شغالة ع نفسي ، بس اكيد احتاج وقت مو معقول شهرين من ولدت وتكلمني بهالطريقة !
و هم ما اعتذر ، عطاني بوسه وان تمام دامك مهتمة !

أدري تبي اعتذار صريح
لكن راعي اختلاف الناس في الاعتذار
مو الكل يعتذر بشكل صريح
اعتبري تلطفه معك بعدين والبوسة اعتذار
هذا طبعه تقبليه و ركزي على ايجابياته