مرحبا ..

بدخل ع طول بالموضوع .. فيه امور كثيره متراكمه من شهووووور بيني وبينه .. لكن هالفتره زاد معي .. مثلا لي اكثر من سنه صابره ع دوامه والجامعه كان يشتغل ويدرس وكنت ارحمه بالطلبات والطلعات ومع هذا كان كل فتره يطلعني .. من جبت ولدي ماطلعنا نهائي و قبل اسبوعين مدري كم خلص الجامعه وفرحت كنت اعد الايام متى يخلص عشان يتفرغلي .. بس من خلص وماخذ اجازه من الدوام يعني فاضي 24 ساعه من يفتح عيونه يروح تحت لهله ومايجي فوق الا اذا كان يبي يبدل ملابسه ويرجع يطلع ومايجي الا لماا يجيه النوم وعلى هالحال واذا يبي اطبخ يخليني احسب حساب اهله وينزله كله تحت و اذا يبي ياكل فوق يجيب مرافقين معه اخوانه صغار او عيال اخوانه وقلييل ناكل لوحدنا .. هالفتره سبب المشكله ان يشوف عيال خواته فاهمين ويعرفون كل شي ويجي يقول بنتك غبيه بنتك ماتفهم شوفي فلان يعد كل شي ويعرف الحروف الانجليزيه و و الخ قلت له فلان كبير يوم امه جابته انا ماني حامل وماحملت الا بعده بكم شهر < يعني ولد اخته عمره فوق السنتين يمكن ثلاثه .. وبنتي توها سنه واربع شهور حتى سنه ونص ماوصلت .. قلت له قارنها باللي بعمرها و عصبت عليه لان له فتره يمدح ولد اخته ومن جا امس وفتح هالموضوع انفجرت عليه وجلس يقول قصري صوتك ولاتتكلمين و والخ مايبي يسمع الصدق .. المهم ضل بيننا حزازيات ويقول لاتعطينها الجوال قلت عادي اعطيها اذا كنت ابي الهيها مو دايم قال لا لاتعطينها نهائي هذا كلام ناس دارسه وفاهمه مو كلام ناس ماعندها ماعند جدتي ( يقصد اخته الفاهمه وانا ماني دارسه ما افهم و اول مره يعايرني بهالشي ) قلت اختك كانت تعطي ولدها الايباد وهو عمره 4 شهور تخليه يشوف طيور الجنه ولما صار يمشي من يدخل عندنا يطالع بالايباد ومايفارق ايده والخ .... بعدها جلس يتكلم عن ولدي راسه مايل والخ واهله اللي قالوا له لان كان عندهم وبعدها صار يكتب لي واضح احد يحقن بعقله .. ولما فتحنا هالموضوع بنفس الليله قلت يعني اهلك مايدرون ان الراس مصيره يتعدل بس يبي له شهور مو يوم وليله ليه هذا اول طفل عندهم ؟ مايعرفون للصغار ؟ قال مالك دخل بعيالك واهلي يامرون عليك والخ وكانت هذي الشي الثاني اللي بلعته بعد موضوع الدراسه .. وكان الوقت فجر قال قومي سويلي عشا قلت وش تبي قال كبسه قلت طيب ورحت طلعت الدجاجه والخ ( اخته تطلقت لان زوجها قالها سويلي كبسه الفجر ويحسب ردي يكون مثلها ) انجلط لما قلت طيب المهم دخلت الحمام وطلعت وانه يقول ليه ماتغسلين ؟ قلت اغسل بالمطبخ و دايما تجي وتشوفني اغسل بفيري لان الصابون اللي هنا اتحسس منه مليان عطور والخ قال انتي وسخه وخلاص لااتطبخين سديتي نفسي قلت انت اصلا منت جيعان وماتدري كيف تلغي الطلب تحسبني مثل اختك والخ .. المهم ثاني يوم قعدت لقيته طالع وارسلت له الى متى ع هالحال ماشوفك ومتزوجه بس بالاسم و من زمان ماطلعنا و و. الخ طلعت اللي بقلبي مع ان كلام مكرر ياكثر اقوله له ،، وكلمه مني وكلمه منه وقال ندمت اني اخذتك كل الجماعه نصحوني ما اخذك والخ وجلس يتكلم ع اخواني وهذي ثاني مره يتكلم عليهم بس هالمره اكثر وتمادى كثير وقلت له انتوا عارفين هالشي قبل تخطبوني ليش خطبتوا وانتوا عارفين اخواني ؟؟؟؟ و جلست اطلع عيوبهم واقوله لاتعيب ترى الله يبتليك ويمكن اخوانك الصغار يطلعون مثل اخواني و اردى قال لا حنا غير و و الخ منها صرت ما اكلمه صارلي يومين .. ولما قلت له بروح لهلي وكذا وقت المشكله قال ان رحتي انسي عيالك. قلت عيالي لي والخ .. مدري وش اسوي افكر اكبرها و اوصل كلامه لخواني واخليهم يجونه يوقفونه عند حده و مرات افكر اكلم ابوه واعلمه ومرات افكر اروح لهلي بلا رجعه .. لكن ودي اكلم ابوه واعلمه بسوالف ولده .. ماعمري وصلت شي لاهله بس كارهه عيشتي معه واخاف اسوي شي واندم .. وش تنصحوني فيه

__________________
تم تغيير النك .. < ريتاج2016 سابقا

الحل تغيرين اسلوبك في الرد عليه وتفرضين احترامك باحترامك له

يمدح ولد اخته: مهما قال وعلق خلي ردك مختصر ،، ما شاء الله الله يبارك لاهله فيه عقبال بنتنا يا رب

رأس ولدك مائل: اساليه كيف ممكن يتعدل واوعديه انك تبحثين عن الموضوع ،، ماله داعي اهلك ما يعرفون ... الخ

الجوال: قولي تم وابشر وفعلا اثبتت ضرر الاجهزة خاصة للاطفال تحت عمر سنتين ،، ماله دخل اخته وش سوت مع ولدها اعطته ما اعطته ضره ما ضره

لغى طلب الكبسة: ردك طيب وخلاص ماله داعي ايه تحسبني مثل اختك و و و وكأنك تعيرنه باخته

باختصار لا تجبين طاري اهله حتى لو بدا هو بالمقارنة ،، حتى ما يتمادى معك و يسب اخوانك ،،
خلي ردك مختصر ومو لازم كل شيء تجادلين عليه ،، امور كثيرة ممكن نوقفها بكلمه لطيفة

طبعا ما يعني ان زوجك غير مخطيء ،، لكن انت اللي تسالين هنا واعطيتك شيء ممكن يساعدك في تقليل الخلافات بينكم على اشياء (تافهه)
وتذكري قول الرسول صلى الله عليه وسلم ﷺ انا زعيم بيت في ربض الجنة لمن ترك المراء وان كان محقا >> المراء الجدال

مو لازم كل رد يجي في بالك تقولينه ،، فكري قبل اي كلمة تقولينها وش باستفيد،، اذا الفايدة اني ارد واثبت خطا كلامه فالافضل انك تسكتين واحتسبي اجل كف الجدال

ردك عين العقل .. انا كذا والله قبل فتره اول مابدا يمدح ولد اخته كنت اتفاجئ و اذكر الله و اقول حتى بنتي بس توصل عمره ان شاء الله تصير احسن منه .. وبعدها يمدح بنت اخته بعمر بنتي اقوله ماشاء الله لانها تختلط كثير ومن شفتها قلت واضح تطلع ذكيه والخ .. كنت كذا بس الى متى ؟؟؟؟؟؟ تعبت طلعت روحي .. الشي الثاني لما قال سوي كبسه كان يختبر صبري لان نومت ولدي وكنت انوم بنتي وهو عاارف ان انتظرهم ينامون لاني اتعب معاهم حيل وانتظرهم يغمضون عشان اغمض .. حب يختبر صبري وقال من تنام سويلي عشا ولما نامت رحت سئلته وش تبي قال كبسه قلت طيب .. وماجبت طاري اخته الا لما قال ماعاد ابي ..

__________________
تم تغيير النك .. < ريتاج2016 سابقا

روووح انتي عارفه وش قاعده تسوين



تخيلي زوجك كل يوم يقولك نفس الكلام من سب وشتم بالله بتحبيه وبتسوين اللي يحبه ويطلبه منك

روح حبيبتي غيري اسلوبك
واذا عصبتي طلعي غضبك بعيييييد عن زوجك والله انك بسالوبك هذى تكرهينه فيك

روح انتي قاعده تكرهين زوجك فيك وتبعدينه عنك

__________________
أيّــــها الحـاملُ هـمــاً .. إن الـهم لا يدوم
مثـــلما تــفــنى السعـــادة .. هكذا تفنى الهموم

ياحبيبتي .. الله يعينك.. اسلووبك كويس ما شوف انه غلط بالعكس انتي ما تخلين له درب على طلاقك او انه يهاوش .. حتى لو صار ماصار الله لا يقوله ما تلومين نفسسك .. مع اني اقول لك((( اللي بغى الفراق .. بيلقى للفراق اسباااااب))

بنتك قولي اصلا لكل شخص قدرات ... وكل شخص يختلف من الثاني هذا غير انه اكبر .. وقول لا تقارن لان المقارنه تقتل الشخص وتحبطه يعني انت مثلا اكيد ما تحب اقارنك باحد وكذا

بالنسبه لانتقاااصه لاخوتك .. انتفضى عليه .. وقولي له (( البلاء موكلٌ بالقول )) ولا تبينين انك متفشله عادي قولي اش عندك .. لو قال طالق قولي ابرك ..اللي يبيك بيرحمك واللي ما يبيك بيشوف انه متمنن عليك بجلستك في بيته ..

وليس الفتى من قال كان ابي .. ان الفتى من قال هذا انا .. انت اش شفت مني ردى .. ولا تقابل طيبي بردى

بصرااااااحه اذا قال كل شيء عدّي لكن اذا ناقش في اخوانك قابليه بوجهه عريييييض وتكلمي

لكن بيتك بيتك لا تطلعين منه

والله يسخره لك وبصراحه انقهرررت

__________________
أعلل النفس بالآمال ارقبها .. ما أضيق العيش لولا فسحة الأمل

ردي عليه
لكن باحترام تخليه ينحرج منك
لا تنزلي ابدا لمستواه
زوجك واضح متعلق باهله وكل مشاهداته وملاحظاته من اهله فمافيها شي
كانه يقول لك قريت دراسه او شفت بتلفزيون
بالنسبه للطلعات والروحات تطلبي منه تطلعوا
لو نص ساعه كوفي تغيرو جو
لا تحنين انا ماطلعت انا انحبست والى غير هذا
يخليه يعاند او يطلعك بدون نفس
قولي خلنا نغير جو مع الصغار واتوقع ماراح يعاند

والله اسلوبي مايصير غلط الا اذا وصلت حدي .. الحين لنا كم يوم مانتكلم الا للضروره .. انا صرت اكلمه عادي بنفس بس يكون شي ضروري وهو للحين يرد من ورى خشمه وبدون نفس .. قهرني لما تكلم ع اخواني وانا عارفتهم زين بس ما اتفشل منهم ابد لان اخواني ظاهرين للناس بعيوبهم اما هم من تحت لتحت .. وقلت له اخواني صحيح كذا بس قلوبهم نظييييفه و اكرم منهم مافيه وهم ع قد حالهم .. اما انتوا تدسون فلوسكم و تبخلون حتى ع انفسكم وبس تكرمون ناس وناس ( يكرمون الاغنياء بس عشان السمعه ومدري وش ) انا احب اخواني بعيوبهم ومايهمني من يتكلم عليهم .. بس اللي هامني ان ماطلعت معه من زمان و انه من يصحى يطلع ومايجي الا وقت النوم .. والحين مجافيني يبي انا ابدأ كالعاده .. لين متى اتنازل ،، يكفي الى الان جالسه بالبيت وماسكه نفسي غصب .. حتى لهلي مابي اروح اول خميس يمر علي ماروح لهلي لان لو رحت اعرف نفسي راح انفجر عليه وما ارجع .. تعبت من جفاه والله تعبت

__________________
تم تغيير النك .. < ريتاج2016 سابقا