السلام عليكم ..

من يومين افكر بالانفصال لكن ابيه بالتراضي من الطرفين .. لان تعبت من زوجي .. له ايجابيات و له سلبيات مره زين مره شين مايخليني اكرهه ولا يخليني احبه .. مدري كيف يعني مثلا قبل كم يوم مرضت و اخذني يعالجني لكن لما شاف تكاليف العلاج و ان التأمين مايغطيه رفض يجيبهم مع انه مبلغ بسيط مايوصل 300 يعني اقل بكثيرررر وهو راتبه فوق ال12 الف < لكنه يتحجج بالقروض والاقساط ومصاريف البيت والعيال والخ .. جلس يمزح قال باقيليك علاج حقه ثلاث ميه لو تموتين ما احطهم عليك .. طبعا متزوجه من سنتين ونص تقريبا عندي طفلين الحمدلله بس ولا مره عطاني مصروف بيدي .. ولما اقوله ليش يقول كل ما استلم راتبي اطلبيني واذا طلبته يقول وش ناقصك واذا قلتله اللي ناقصني يقول خرابيط مو مهم والخ .. ابي اكرهه بسبب رفضه العلاج لانه بخل علي بمبلغ بسيط وهو مقتدر .. لكن افكر من جهه انه يهتم بصحتي و هو اللي يحجز لي مواعيد ويذكرني فيهم والمستشفى بعيد واذا رحنا نقضي نص يوم هناك وكله تعب وقتها احبه واقول يهتم .. نجي لنقطه ثانيه مضايقتني هو اني اشتغل بالبيت ليل نهار ومع هذا مايشوف شغلي ويقول ماسويتي شي انتي بارده ..! طيب انا اشتغل على قد طاقتي عندي طفلين جبتهم ورى بعض مقدر اشتغل وهم قاعدين اصير اخطبوط بالبيت والله ومع هذا مايقدر ولا شي .. ماني متعوده على كذا ابد ومع هذا بديت اتأقلم عالشغل وصرت ما اجلس .. المهم قبل كم يوم نقلنا الغرفه اخيرا < كتبت عنها موضوع قبل ان عجزت فيه يضبط البيت .. لما نقلنا وصار تبديل بين الغرف وكذا وطلعت حووووسه ياكثر والنقل صار مفاجئ والعمال رموا الملابس بالارض وكل شي حوسه بالشقه كلها ماتقدرين تمشين خطوه .. وهم ينقلون قال لي عشان الحين تغسلين ملابسي كللللللهم .. عاد والله ملابسه ماجاها شي الا بعضها بس قلت طيب راح وجا بعد ساعتين ونص لقاني مغسلتهم قال ليش لسا الحوسه ماضفيتيها !!!!!! قلت وش اضف كنت اغسل ومنها اعزل الاغراض عشان نقط اللي مانبيه وملابسي انا وعيالك مع بعض لازم افرقهم و و والخ مرت اخوه شافت الحوسه قالت تبين اساعدك دقي علي .. وراحت وقلت له و رفض قال خلصي شغلك لحالك .. وضليت يومين اشتغل وخاصه مع وجود عيالي الشغل صعب وهو كل ماجا هذذذذا لسا ماخلصتييي انتي بارده والخ ... الشي الثالث اللي يقهر انه بس يهددني يتزوج علي والله صرت اسمعها باليوم عشرين مره وبدون سبب مقنع .. ياخي تبي تتزوج تزوج وانت ساكت ارحم من التهديد والله وكثيرررر مواقف مثل كذا طيبت نفسي منه وتعبت من هالعيشه هذي .. ممكن تشوفونها اسباب تافهه بس لو تعيشونها بتحسون فيني .. ويكفي من ضمن المواقف انه مره كنت عند اهلي بعد النقل .. وماكويت ثيابه الا واحد عشان اذا احتاجه و ما ادري انه توسخ وجا يبي غيره ومالقى مكوي وكتب لي ثاني مره تكوين كل ملابسي .. ولما رجعت وتناقشنا وقلت تحملني فوق طاقتي يكفي غسلت كل ملابسك وش كثرهم وهم نظاف قال كيفي عاد والحين انزل ثوبي هذا نظيف لبسته نص ساعه و ابيك تغسلينه ! طبعا مو جد مجرد استفزاز لي حسيت كني خدامه عنده وهالشعور مو جديد بس والله تعبت اعيش بضغط نفسي قوي ماعاد فيني صبر والله

__________________
تم تغيير النك .. < ريتاج2016 سابقا

ماشفت سبب يذكر لتشتيت اطفالك اللي هم امانه عندك
نصيحة خارج الموضوع
استمتعي بطفولة ابناءك قبل يكبرون و لا تحسسين انهم مهمة صعبة لانك جبتيهم على بعض ،، العمر يمضي بسرعه فاستمتعي به😊

الله يشفيك ويعافيك ويخليك لاولادك يا اختي طنشي خليه يتكلم لين يتعب عليك بالطناش لالاتشتتين اولادك وظروفك لاتسمح بالطلاق الله يسخره لك وعليك بالدعاء بالتسخير
ومعلومة ترى اللي يتكلم بالزوج كلام مايتزوج الساكت هو اللي يتزوج

__________________
اللهم اني استودعك اولادي وبناتي دينهم وآمانتهم اللهم جنبهم الخمر والمسكرات والمخدرات والزنا واللواط والفتن ماظهر منها وما بطن يامن لاتضيع ودائعه

هو شأفة تتأخرين بكلامه فقاعد يزيد منه اكثر

يا انج توقفينه عند حده بأسلوب لبق ومحترم

او تحقرينه وتبينين استيائج من كلامه بطريقة غير مباشرة

ولا تبررين ابدا ابدا

قالج باردة او ليش ما خلصتي عطيه نظرة استغراب واسكتي عنه

هو حاس باهمية كلامه بالنسبة لج المفروض يحس العكس


والله يا بعض الرياييل مال خيازرين منقعة بماي وملح

__________________
لا اله الا انت سبحانك اني كنت من الظالمين

اول شي بكلمك من بعد تجربتي في الطلاق...
لما الانسان يكون غاضب مايشوف الا الشي الاسود في الطرف الاخر...
صحيح زوجك غلطان لما قالك هالكلام لكن ماتوصل للطلاق..
ثاني شي اليوم اللي بتطلبين فيه الطلاق راح يعتبرك عدو...واقعدي عاد راكظي في المحاكم..وبعد تبين مصروف للعيال...وش دراج وقتها كم بيعطيكم...
نصيحتي لك اذا عندك شهادة روحي دوريلج شغل اذا ماعندك سويلك مشروع من البيت...وخلي هالدخل لك وحدك...
لانه عمر الطلاق ما كان حل لمثل مشكلتك

ترى الدنيا مو صافية لأحد ):

حطيتي الفكرة براسك وقت زعل وتمسكتي فيها .. يعني خلاص انتهت الحلول ؟

بالنسبة لموضوع تهديده بالطلاق وسالفة العلاج .. صارحيه بهدوء انه هالشيء يضايقك ويأثر عليك ...

و الشغل .. اذا نت بشقة وين التعب بالموضوع ! .. رتبي كل شغلة اول بأول صدقيني بترتاحين 👍🏻
و سوي لك جدول اسبوعي
اليوم الفلاني غسيل .. ويوم للمطبخ ويوم لغرفتك وهكذا

وطالما انتِ قايمة بواجباتك لاتعطين كلامه أهمية (بعض الشخصيات تحب الانتقاد عالفاضي لما تطنشينه يمل ) و حوسة مكان الجلوس والعابهم طبيعية فلا ترهقين نفسك بالمراكض وراهم اهم شيء المطبخ وغرفتك قفليها عنهم 😂

كلام الاخوات قبلي صحيح...
مشكلتك لا تستدعي الطلاق اطلاقا ...
ابحثي عن الحلول الحياتية الاخرى ، و لا تفكري في الطلاق ابدا .

__________________
أشهد أن لا إله إلا الله و أشهد أن محمدا رسول الله صلى الله عليه و سلم

الموضوع لا يستحق الطلاق..

إذا زوجك مو راعي حريم عظي عليه بالنواجذ : )

__________________
{ اللهم صلي وسلم على محمد وآله وصحبه تسليما كثيرا }

انتي ام وزوجه مو شغالة عنده .. فهميه ان هذا من الشرع ومن حقك يحط لك شاغله او يساعدك او عالاقل يصبر عليك

لازم تعرفي حقوقك عدل ولا تنازلين عنها ومدام يقول بيتزوج معناه يقدر يدفع لشغاله او يودي ثيابه المغسلة !