السلام عليكم ورحمة الله وبركاته

انا الان عند اهلي زعلانه و زوجي يحاول الاصلاح من اسبوعين ...
انا مقتنعه جدا بالانفصال وهو رافض ويطلب فرصه اخيره ..

افكر بالعودة ولكن بشرط
لو حصل خلاف بيننا وصار انفصال تكون حضانة ابني لي مدى العمر
عمر ابني..سبعه سنوات
سؤالي
كيف اضمن ان حضانة ابني تكون لي ؟؟

اسألي محامي افضل
واصلا حضانة الولد لك الا اذا تزوجتي

اذا ولد يخير واذا الولد يبيك بتاخذينه ..

فلا تشترطين شيء وريحي بالك

وبيتي في بالك النيه الزينه انها بتزين معه وحااولي انتي قد ما تقدرين انها تزين معه

__________________
أعلل النفس بالآمال ارقبها .. ما أضيق العيش لولا فسحة الأمل

الله يكون بعونك ويصلح امورك ويهدي زوجك 💕
سؤال واعذريني ان كان خارج موضوع
كيف حال زوجك هل تغير؟؟هل مازال يتواصل معها؟؟

__________________
اللهم اغفر لي ولوالدي واخواني واخواتي الاحياء منهم والاموات .. اللهم نسألك حسن خاتمه يارب .. لاتنسوني من دعواتكم

8

للاسف زوجي اعطاني وعود وبحلف لك ع المصحف واكتب لك ورقه وصدقته و رضيت ..ولما كلمت ابويه قال انا ما راح اقوله يكتب لك ورقه الواحد اذا ما بيصلح حاله ويعدل نفسه ما بترده مية ورقه مكتوبه

رجعت له بدون شروط
عجزت النيه تزين الواقع مر
لو عندي وظيفه حكوميه مستحيل ارجع

اه اه لو تدرين وش صار فيني حزينه ع العمر اللي بقضيه معه بدون مشاعر

اكبر غلطة غلطتها بحق نفسي اني رضخت له واستسلمت لحد ما ذليت نفسي له وطردي اكثر شي احزن عليه هذي الفتره

اول مرا اكتشفته وصدقته انه تاب بعدها بفتره قالي مابيك روحي لاهلك ورحت جلست اسبوع واعتذر ورجعت ..بعدها طلقني مو عشان رديت عليه لا عشان هي طلبت من كذا وجلست عنده توقعت انه رجال وبكبر بعينه اني ماعلمت احد لا زاد بطشه وظلمه وبعد واكتشفت المرا الثانيه ووكتبت لكم هنا ايامها
........
ذحين بقولك وش صار بعدها استمر معها للاسف وانا كان يعاملني معامليه سيئه وكان مو طايقني ويطالعني باحتقار كنت ادري انه معها بس استسلمت للذل والمهانه الين قريت مرا رساله بجواله يكلمه قريبه اني افكر اخطب وكذا وصارحته وجلست ابكي ولا اهتم وحجيت معه توقعت بيتوب بس كان مو طايقني حتى بالحج افتكر موقف يعور قلبي كثير اذا تذكرته كان معي مظله والعسكري قالي قفليها عشان يمديك تمشي بين الباصات وانا ما قدرت قلت لزوجي خذ قفلها دفني وقال فاضيلك وراح بعيد عني واخذها العسكري قفلها..
وانا كنت بهذي الفتره احاول اتقرب له بأي شكل بس كان يصد كنت ابي اعيش معاه ومع ولدي باي شكل مهما كلفني الامر بهالفتره حتى ماكنت احط لقمه بفمي وكان يشوفني الين جاء يوم وقالي خلاص روحي لاهلك انا ما ابغاك انا جالس اظلمك انا وانت مختلفين انت مستحيل تفهميني قلت له وانا بكي بكون زي ما تبغى بغير اللي تبغاني اغيره قال الموضوع مو انك تتغيرين انت مافيك شي ويمكن ربي يرزقك بواحد يحبك انا مو مرتاح معاك بعدها مسحت دموعي وقالي بخلي ولدك معك بس بشرط ماتعلمين احد اني كنت اكلم وحده قلت له طيب وفعلا رحت لاهلي وجلست اربع شهور وهو من اليوم الثاني ندم وكان يرسل ع ابويه ناس وتعالج عند شيخ قاله حسد وهذا السبب اللي خلاني ارجع له ..وبعد رجوعي اكتشفت انه يتوسل للبنت انها ترجع تكلمه وهي ما اعطته وجه ..
واخر مشكله اللي نزلت موضوعي عشانها انه ضربني كف عشان كنت اتحمم ومقفله غرفة النوم خرجت وانا لسى ماكملت الشاور عشان افتح له ولما فتحت كف وجلست عند اهلي اسبوعين كنت مصره ع الطلاق بقوه لاني صرت ما احمل له اي شي بقلبي وحتى لو سوا شي جميل ما يحرك فيني ساكن ولا كلامه الحلو والعلاقه ما اتقبلها واجامل فيها ع حساب نفسي لكن رجعت له لان ابويه قالي اذا تبغين الطلاق ومصره الولد مع ابوه انا ما بجلس في مشاكل معاه انا عمري بالسبعين ولافيني حيل يابنتي و ولدك احسن يعيش مع ابوه انا ما اقدر اجيب و اودي للمدرسه بكيت عند ابوي وقلت له تتخلى عني ذحين قالي والله ما تخليت لو زوجك بيخلي الولد ما بمنعه لكن انا بحطك بصوره عشان لايجي يوم وتندمين ورجعت لزوجي بعد ما اعتذر
........
الان بعد كل شي صار انا ما احمله اي مشاعر ابدا يعني لو قالوا لي مات اتوقع ما راح تنزل مني دمعه انا عايشه معاه مصالح فقط حتى لو طول لسانه عليه واقول كلام جارح صرت ابدا ما اتأثر احس فيني تبلد حتى الناس صرت ابدا ما اهتم يعرفون شي عن حياتي او اذا زعلت صرت ما اخبي عادي الكل يعرف رغم كل شي بس حبيت شخصيتي الان صرت احس اني قويه اكثر واقدر اعيش بدون رجل بس ناقصني اتوظف واخذ لي سياره عشان اقوم بولدي ولا احتاج مخلوق بالكون
........
هههههههههه سالتيني سؤال وقلبتها فضفضه

فديتك ربي يكون بعونك ،عجبتيني ويحق لك تحبي شخصيتك خليك قوية
تفائلي القادم اجمل ان شاء الله ولا تشلي هم ابنك اذا حصلتي وظيفه
تعلمي سواقه واعتمدي ع نفسك ^^ ولاتنسي الدعاء والاستغفار وقيام الليل لازم تواضبي عليها تفرج الهم وتبعث الطمانينة وتحقق الاماني

__________________
اللهم اغفر لي ولوالدي واخواني واخواتي الاحياء منهم والاموات .. اللهم نسألك حسن خاتمه يارب .. لاتنسوني من دعواتكم