السلام عليكم ورحمة الله
اتمنى يكون الجميع بصحه وعافيه
الاخوه الاعزاء رجل الرجال ولماذا نتزوج
مادري كيف ابدى بصراحه ..انا عمري 32سنه متزوجه من اربع سنوات وعندي بنت وولد عمره اقل من شهرين ومن رجعت بيتي بعد الاربعين وانا بحاله يرثى لها ومادري وش اسوي
زوجي انسان بخيل وعنيد اناني حتى النخاع كذاب بامتياز غير ناضج سريع الانفعال ومايعترف بخطاه لو ايش ماكان ويقلب الموضوع على اللي قدامه يحب يعيش حياته لوحده طلعاته ووناساته مايبي يشيل مسؤوليتنا ودايم يرميها على اهلي زوجي باختصار شخصيه سيكوباتيه
عنده ايجابيه انه ماعمره سبني او سب اهلي ابد وهالشي دايم يشفع له عندي
من تزوجته عشت صدمة الحياة الزوجيه اللي ماتوقعتها كذا وحياة صعبه نفسيا ،، مافيه بيني وبينه انسجام دايماً كان فيه شي يعيق تقربنا لبعض ومن اسبوعين بس عرفته
اذكر اليوم الثاني من زواجنا قال لي وهو يسولف :باحط لك بيت لحالك انتي وعيالك بيت لفلانه "اللي هي انا " وعيالها قلت ليه وانت وينك قال انا فيه هالكلمه ذبحتني وعكرت علي ايامي كنت اظنه بيتزوج علي وانه فيه وحده في باله يبيها والحين وبعد اربع سنين بس عرفت معنى كلامه
ويوم حملت كان مره فرحان قلت له تحب الاطفال قال لي وهو يضحك الحين انتي معي طول العمر
كانت تصرفاته تدل انه مايعرف يحب احد ابد و كانت كل طلباتي مرفوضه مهما كانت صغيره بس كنت اصبر نفسي واني انا مستقله ماديا عنه وانا راح اجيب كل اللي ابيه لنفسي ومو محتاجته
المهم بدت السالفه يوم كان يوريني صور زواج اخوي في جواله وفجأه سككر الجوال قلت له كممل ليش قفلته عصب علي وتنرفز وانفعل قلت بنفسي ليش ردت فعله كذا اكيد فيه شي
حاولت بعدها افتح جواله وفعلا ً فتحته وشفت صورتين خليعه وعجزت اكمل شفت صور وارقام جوال للتواصل وشفت صوره لواحد جنس ثالث وعليها تعليق وكلمه دلع تمشي لاسم زوجي
انصدمت وسككرت الجوال وبدت الشكوك وقررت اني ما افتحه مره ثانيه ولو كان فيه شي مابي اشوفه بس كانت شكوكي تزيد مع تصرفات تدعمها
وبعد ما رجعت بيتي بعد الاربعين شفت شموع وبقايا ورد ذابل وماله يومين في غرفتي ويوم رتبتها شفت غرض نسائي على الكمدينه وكانها منزلته قاصده تعلمني انه فيه احد دخل غرفتي بعدي
وبعد كل هذا وانا لسا احط له الاعذار ومستبعده انه يخونني او انه من هالفئه
ومن بكرا كان جواله عندي وانا فاضيه وبحركه عفويه صرت ادخل الرقم السري وفتح معي الجوال من ثاني محاوله وسكرته مافي بالي شي ودي اشوفه
ورجعت فتحته مره ثانيه وشفت الطامه محادثات ومراقص وخيانه بالصور ومكالمات في اكثر من مدينه ومن دوله وصور بذيئه لنساء و اللي ادهى وامر لبزران وناس شاذه
ماصارحته بشي ابدد ماعندي جرأه حسيت اني اهين نفسي لو بس قلت له
من الصدمه اتخانقنت معه وهو مايدري وش السبب وقلت ليه ماطلقتني ليه تظلمني معك وليش وليش وقلت له انت حاطني ديكور قدام الناس انت ماتحبني وقلت له بعد ابيك تصارحني وش فيني عيوب قال اابد ما فيك ولا عيب ابدد قلت مايصير كل انسان فيه عيب قال انتي مافيك ولا عيب ابددد ابددد وهو مايدري وش السالفه يقول احد حاشي راسك علي كنت يالله ماسكه نفسي حتى قلت له افتح جوالك وتدري وش فيني وعقب تعذرت باسباب سخيفه وقلت له سالفة الورد اللي في غرفتي هي اللي مزعلتني قال لي تشكين فيني يعني ابجيبه لغرفتك وعلى فراشك مع اني ماقلت له شي بس قلت له من اللي معطيك ورده
الصدمه علي قويه قويه مره الحين عرفت ان كل كلامه عن نفسه وتصرفاته كذب بكذب هو ذكي جدا ويعرف يصنف الناس ويوم تزوجني بدا يرسم الشخصيه اللي تعجبني انا واهلي وبدا يمثلها علي من صلاة وقراءه قران واحترام كان يوريني فيديوهات ل اللي يسافرون ويخربطون ويقول اعوذ بالله الله لا يبلانا كان يمثل علي ليلة الدخله صدمتي فيه قويه ولسا لي اسبوعين ماصحيت منها خلاص هو بالنسبه لي مات كرهت عياله بيته وحياتي وماني عارفه وش اسوي
اسفه للاطاله وهذا مع الاختصار
انا الحين محتاره مادري هذا اللي فيه طيش ويكبر ويعقل والا مرض ما منه شفاء?
خايفه على نفسي وعيالي من الامراض هل اصبر مع هالعذاب ،، زياده على سوء الشخصيه فساد اخلاق
اخاف اصبر ويجيني شي ماقدر اصبر عليه ،،اليوم دخل خرابيطه بيتي بكرا يسويها قدامي ولا يهمه انا خايفه اظلم نفسي وخايفه انجرح زياده
ماني حاسه بالامان خايفه على عيالي منه اخاف يسوي فيهم شي هو شخص مايحب القوانيين ويحب يخرقها بكل شي بالحياة وخصوصا انه يسوي بعض الحركات في بنته انقد عليه فيها
هو الحين مايدري ايش فيني وخايف اطلب الطلاق وتعدل شوي سلوكه بالسهر والسفر بس احسه يرجع لنفس نظامه اول شوي شوي
انصحوني انا ما عندي خبره بشخصية الرجال وتفكيرهم ودي اتطلق منه واتركه ودي يتزوج وحده كفوه تشربه من نفس الكاس اللي شربني منها وتخونه على فراشه
بنتي تموت فيه وانا اعرف الاب ايش يعني للبنت ولا ودي بنتي تعيش من غير ابو الا اذا كان بيوذيها لحظه ماراح اسمح بهالشي
هل فيه امل يتركهن ويرجع لبيته ويتوب هل فيه طريقه اسويها تساعده انه يستقيم واحافظ على اسرة عيالي حتى لو كان على حساب سعادتي وحياتي اللي تمنيت اني اعيشها بجو عائلي و بحب ووفاء
انا اهملته حاليا لا اراديا ومادري كيف اتعامل معه وهل هالشي بيزيد المشكله او لا
افكار متزاحمه ومشاعر متناقضه فيني ولا حول ولا قوة الا بالله
حسبي الله ونعم الوكيل

وعليكم السلام ورحمة الله وبركاته
اعانك الله على مااصابك من حيرة وصعوبات في الحياة الزوجية

موضوعك يحتاج لوقت طويل

وانا للاسف لااملك هذا الوقت

لذا ياريت ياتنتظري والدنا رجل الرجال

او تضعي موضوعك في العام (قسم المتزوجون ) وقتها ممكن اشارك بجزئية بسيطة ان سمح لي الوقت

الله يعطيكي العافية ويوفقك ويهدي زوجك

نصائح على السريع :
1- حددي وجهتك بناءً على اهدافك وقيمك في الحياة
2- توكلي على الله وامشي نحو وجهتك متسلحة بالصبر والعلم والتثقف في الحياة بشكل عام وبالحياة الزوجية بشكل خاص

اوضح وجهتين الان:

أ- تكملي مع زوجك - تصبري عليه - تغيري من نفسك عشان هو يتغيّر

ب- تنفصلي عن زوجك - تصبري عن تشتت اولادك - تبدأي حياة جديدة (ان وجدت)

والله الموفق

__________________

جزاك الله كل خير يارب على ماتفضلت علي فيه من وقتك
فعلا هم وجهتين وكلهم محتاجين صبر وتضحيه

الله لا يحرمك الاجر وجعل اياديك ماتمسها النار

ابنتي الكريمة
أسأل الله العلي القدير أن يفتح على قلبك وقلبه بخير فتح يرضيه وير زوجك للحق رداً جميلاً.
بداية هذا الرجل لم يتزوج لينشيء أسرة بل تزوج ليقطع الطريق على من ينتقد تصرفاته ويقدم لهم غطاء وواجهة أسرية جميلة اسمها زوجة وبيت وأولاد وينطلق لما حب وكأنه لا يعلم بأن الله يرى .
ولا يصحوا هذا النوع إلا بسبب قوي كحادث له أو لمن يحب أو غير ذلك مما يجعله الله سببا لعوده.
قوة هذا الصنف بتستر زوجته عليه حماية للأاسرة وتماسك البيت ويدعم هذا أمومة الزوجة فتحترق من جهتين هل أواصل واتعذب أم اتوقف مطلقه بولدين وأحلاهما مر.
كما يدعم قوته أمل الزوجه بطهارة قلب أن يدرك ما تعاني وما تحتاجه أسرته منه ليبادر بالإصلاح لنفسه وهو يسخر كل مواهبة للعب على خطين ملذاته وانتظام صورته المجتمعية بهذا الصورة الجميلة التي تدعمه فيها الزوجة.
هذاا الصنف يخاف ما (يختشيش) على قولة أخوانا في مصر .
العلاج هو كشفه أمام من يخاف على سمعته عندهم أو يخجل منهم أن يروه وخاصة أشد الناس انخداعاً فيه.
ولتعلمي هذا النوع فهو لم يقدر نفسه ودينه وذريته ليقدرك.
أنظري لصلاته أولاً ثم قرري هل ترين نفسك قادرة على إعادته للصواب بأي وسيلة مثل ما ذكرت لك من تخويفه أو فضحه أو غير ذلك.
وإن وجدتي غير ذلك فقرري ما ترين.

__________________

لتوفير الجهد والوقت للجميع :
1- كتابة الوقائع ثم المشاعر ثم المطلوب.
2- ما أقوم به هو التعامل مع عقل صاحب أو صاحبة المشكلة وشخصيتهما ونظرتهما للحياة لترقيتها للأفضل بإذن الله على ضوء ما يكتبان هنا.
3- لا بد أن تكون لدى صاحبة أو صاحبة الموضوع الرغبة في القبول بالنصح والرغبة في التغيير لا طلب الدوران معه على محور شكواه والبكاء معه.
4- لا يمكن بعد الله أن أعدل من ظروف الكاتب أو من شخصيات أطراف العلاقة في مشكلته إلا بتواصلهم معي هنا شخصياً.