السلام عليكم ورحمة الله وبركاته
تحية طيبة الى أعضاء هذا المنتدى 🌷

بدخل بالموضوع من غير مقدمات

انا متزوجه وعندي ولدين ولله وحياتي مستقره وناجحه مع زوجي ولله الحمد وادرس بالجامعه
ومشكلتي اهي < امي > ايه نعم امي مع الأسف...

من يوم كنت طفله كنت اشوف اُسلوب التفرقه بيني وبين خواتي يمكن عشان امي تمنت الولد وطلعت انا بالدنيا بنت عكس اللي تتمناه وهذا الشي اثر على نفسيتي كنت دايما أتمنى لي ام تحضني، مستحيل تمدحني
مثل خواتي قدام الناس
قلت خل اجرب انا اللي احضنها ماتحب ابد اني احضنها تبعدني عنها تقول مااحب ..
طبعاً انا قريت في اغلب المنتديات يقولون هذا اثر نفسي في الام حصلته يمكن واهي صغيره

نجي لجوهر المشكله
((((((امي وتفرقتها مع عيالي وعيال خواتي )))))))


طبعاً خواتي ماشاء الله عليهم متزوجات وموظفات وموقاصرهم اي شششي
امي من زمان وانا اشوفها شلوت تفرق عيني عينك
في العيد تعطيهم وعيالي ماتعطيهم يجي ولدي المسكين يقول ليش جدتي ماتعطيني زيهم صرت اكذب اطلع من عندي وأقول هذا من جدتك
في ولادتهم في عيالهم تعطيهم وانا ماتعطيني شي لعيالي
تمدح في عيالهم وانا عيالي تذم فيهم ( سبحان الله زي ماكانت تعاملني وانا صغيره صارت تعامل عيالي نفس المعامله )
تعذر جداااا لخواتي وماتبي منهم ولا رياااال وإذا عطوها ترفض مع انهم موقاصرهم شي وحده مديرة فرع بالبنك والثانيه موظفه في ارامكو
وانا دايما تبي مني حتى مكافأتي تبيها ليش يعني !!


وأبوي مو مقصر معاها من سفره الى سفره وأي شي تشوفه امي من صديقاتها او اهلها يوم ثاني شاريه مثله


ابوي الله يحفظه مايبي يخلي شي بخاطري يجي يعطيني مبلغ كل فتره وفتره عشاني طالبه وزوجي موظف بس على قده ، لما يعطيني المبلغ تجي تاخذه مني تقول انا ابي اعدل في البيت او ابي اشتري شي اشياء تقولها ماتجي على البال ليش تسوي كذا !!
والله ياكثر اني اشوفها تلعب بالفلوس لعب
اجي اسكت وأعطيها مااقدر اقول لها يمه ترا انا محتاجه
لاني جربت مره قلت لها وتحسسسفت
قامت تقول كلام يغث ليش زوجك مايعطيك شكله يعطي اهله ومايعطيك ومن هالكلام اللي يغث


صارت امي تتعمد قبل لأمشي شقتي لازم تغثني بأي شي حتى لو السالفه عن عيالي

اكبر غلط المقارنه بين عيالي وعيال خواتي هذا اللي بس تتكلم فيه ترا مو عدل اللي تسويه


اشياء تافهه بس تغثثثث ولدي صغير عمره 3 سنوات معاه عيال اختي في الروضه
تخيلوا تجي من الحيررررره تقول كذا
قبل لأمشي يوووووه يعدون ولدك يطق في في فلان وفلان

بالله عليكم هذا كلاك ينقال !!!

اذكر مره كنا قاعدين ويجي ولد اختي عمره عمره 5 سنوات عطا ولدي كف قوي على وجهه
انا انقهرت دايما اتجاهل عّن حقي او عن عيالي بس هالمره قلت ليه تضربه مالك حق تضربه على وجهه يلا قول أسف طبعا ماقال
جات امي قالت لاتكلمينه الحين يصيح !!! يعني ولدي انضرب وقام يصيح عادي بس ولد اختي خافت عليه انه يصيح !!!؟؟؟؟

ليه كذا امي ادري اشياء تافهه بس اسلوبها يجرحني
وهذا أنا اكثر وحده احترمها وإذا غلطت علي اسكت واسكت

والله العظيم صرت اكره الويكند بسبب افعالها
عيال اختي ماشاء الله دايما تبيهم يجلسون بالأسابيع عندها واعترف عليهم ياكلون ويقطون اصواتهم عاليه ومع ذالك تتقبلهم. !!!!!!!!!!!!

وانا لو اقول بروح مشوار وودي اخليهم تقول لا خديهم معك
مع اني بس عندي ثنين واحد عمره 3 سنوات وهادئ دايما على الايباد
والثاني صغير عمره 6 شهور
ليه كذا امي ليييييييه

زوجي ولد اختها في الأساس وانا بنتها ليش تعاملني كذا وتعامل عيالي
كنت مره جالسه مع خواتي في العيد جا ولدي عطاني عيودته جلست بحطهم في محفظتي جات قالت جدته عطته قلت اي عطته قالت اكيد عطته 5 ريال وقَعَدت تتمسخر قلت لا عطته 50 ريال وبالفعل عطته 50 ريال قالت يوووه غريبه كيف طلوعها قلبها ((( ترا هذا أختها وماسلمت منها ))

اللي ماجرب التفرقه ماراح يحس بالكلام اللي اقوله


شالحل تكفون عطوني حل تعبت وربي تعبت
لاتقولون تقربي منها اهي ماتحب احضنها تبعدني تقول مااحب وخري!
امي صارت ماديه بشكل غريب صارت دايما تتهزئ بغيرها واهي اللي دايما صح
تعايب على غيرها والمشكله اهي اللي تسوي العيب
صار اسلوبها كلها مقارنه بمقارنه
شالحل ياجماعة الخير😞

انا حاسه فيك امي كذا اسلوبها معي و مع اختي المتزوجة وعيالها عكس عن الباقين
لدرجة اختي صارت ما تزورنا الا بالشهر مره

صدقيني مالها حل أبدا الا الدعاء


لهذا احترميها لوجه الله و أدي حقوقها عشان ربي ما يغضب عليك

ابحثي عن السبب الرئيسي اللي خلاها تعاملك كذا واذا عرفتيه حاولي تحلين المشكلة حتى لو كان سبب نفسي او ردة فعل لها حل

__________________

طعنة العدو تدمي الجسد،وطعنة الحبيب تدمي القلب

اتوقع ما في سبب لامك انها تعمل كدا
ممكن سبب نفسي او عدم تقبل منك
مالك إلا الصبر والتجاهل التام حتى نفسيتك لا تتأثر

انا لله و انا اليه راجعون....
اولا اود ان اشكر افعالك السامية مع أمك ، احتسبيها لله ، عسى ربك يجعلها لك مدخلا يسيرا للجنة ، امين
ثم ان ما ذكرتيه هو ظلم واقع حسب قولك ، لذا فدعواتك مستجابة باذن الله تعالى ، فاسألي الله من فضله ، عسى ان يغير الله حالك و ينقلب من هذا الى اخر تقر به عينك
و اخيرا ، اود ان اواسيك بان الدنيا لم و لن تكتمل لبشر ، فاحمدي الله على ما اصابك ، فالمصائب تتفاوت في حدتها ، و اني اراك افضل من كثيرين ، ....
فرج الله همك و رفع عنك .

__________________
أشهد أن لا إله إلا الله و أشهد أن محمدا رسول الله صلى الله عليه و سلم