السلام عليكم حبايبي لي فتره عايشه في هم وغم لي ثلاثة اسابيع تقريبا ومو عارفه شسوي او شلون استوعب شنو اللي صار
انا الله يسلمكم انخطبت تقريبا قبل 6 اشهر وملجنا وتم العرس وخططنا لشهر العسل وين نبي نروح المخطط كان على اوروبا 3 اسابيع وكنت متحمسه جدا وفرحانه
المهم رحنا على المطار بعد ليلة العرس ثاني يوم كانت طيارتنا المسا وكنا ناوين ناجل الدخله لي اوروبا يعني اول ليله بس كنا نسولف ونمنا من تعب ليلة العرس
المهم نزلنا في فيينا وكانت اول وجهه لنا في اوروبا
المهم اول ليله الحمدلله خلصنا .....
ثاني يوم بعد ما تمشينا ولفينا في فيينا رجعنا على السكن عشان تعبنا ونبي نرقد يعني هاي ثالث ليله لنا تقريبا
المهم تقريبا كانت الساعه 12 بالليل عندنا وفي بلدي كانت الساعه عشر تقريبا الفرق ساعتين نحن متقدمين يعني بساعتين ..
في هذا الوقت اتصل علي نسيبي زوج اختي .
جلست اكلمه وعشان اوضع لكم الصوره نحن متعودين ان نسايبنا ازواج اخواتي من اخوانا يعني نطلع معهم نسولف معهم ونتكلم تلفون وكل واحد يسال عن الثاني يعني في حدود الادب يعني شي عادي .
المهم تكلمنا تقريبا نص ساعه . زوجي انزعج من الوضع وكان معصب حيل ويقول خلاص سكري الخط كنت ااشر عليه شوي واسكر ماعليش كان يسال عني وعن احوالي وهيك يعني نحن متعودين عادي كلن يسال عن الثاني مثل الاخوان . وانا بصراحه استحيت اقول له يسكر من غير سبب شو بيقول .
المهم زوجي طلع وراح يقعد في الصاله يوم قفلت المكالمه بعد تقريبا نص ساعه . سالني منو هذا اللي تكلمينه . قلت له هذا نسيبي علي . قال على اي اساس تكلمينه في ها الوقت المتاخر ومنو هو حتى تكلمينه . قلت له نحن نسايبنا مثل اخوانا متعودين في بيتنا نكلمهم ونطلع معهم وكان يسال عني بس . قال اليوم تسوين بلوك على رقمه انا هذا الاسلوب ما يمشي معاي نسيبج هو نسيبج وبس ما يتعدى ها الشي كيف تقولين بحسبة اخواني .
قال لي المهم انا قلت اللي عندي والحين روحي نامي ورانا جدول باكر وانا بنام بالصاله . انا عصبت من ثالث ليله يبي ينام بالصاله . قلت له انا ما سويت جريمه عشان تعاملني كذا واحنا تعودنا على هذا الوضع ولو بغير ما بغير بيوم وليله .
المهم قال روحي نامي الله يرضى عليج . بصراحه انا مو مستوعبه شو الغلط في الموضوع اذا نسيبي يتصل علي ويسال عن احوالي وهو صار له 3 سنوات من اخذ اختي والوضع عادي مادري ليش زوجي مكبر الموضوع .
المشكله انه في رابع ليله اتصل علي وانا احترت ارد والا لا .. قلت لو ما رديت اخاف يحاتوني هو يعتبرني مثل اخته ودايم اذا تصير مشاكل معه ومع اختي يتصل يستشيرني ..
المهم انا ماعرفت شسوي قمت رديت عليه ولاحظت انه زوجي خلاص معصب ع الاخر وانا احاول انهي المكالمه بس سالفه تجر سالفه الى ان قال لي عطيني زوجك ابي اكلمه .
قلت لزوجي فلان يبي يكلمك . تم ياشر علي يقول قولي له نايم نايم . بس انا قايلة له قبل انه مو نايم فكيف اكذب عليه شو بيقول علينا . المهم زوجي استلم التلفون ويكلم نسيبي من غير نفس ..
اللي زاد الطين بله ان نسيبي يسولف مع زوجي ويقول له ترا مو طولون ترا فلانه لها وحشه في البيت ( وقال اسمي بطريقة الدلع ) والبيت فاضي بدونها مافيه اكشن .
انا مادريت الا عقب ما سكر زوجي المكالمه بشو اللي دار بينهم من كلام .
المهم زوجي قال بعد ما سكر انه نسيبك يقول كذا وكذا فيا تتصلين الحين له وتقولين ترا زوجي مو عاجبه الوضع ولا تتصل علي مره ثانيه او من بكره ارجعك بيتكم وكان شي لم يحدث . انا بصراحه انصدمت ماعرفت وش اقول وما توقعت اصلا انها بتصير صدق عبالي فتره عصبيه وتعدي . المهم انا قلت له ماقدر الحين عطني فرصه على الاقل لين نرجع وافهم اختي بالموضوع وانا اصلا مو مقتنعه .. قال لي ماعلي من قناعتج هالشي غلط وانا لا يمكن اني اتقبله .. فقلت له مو مشكله يصير خير لين نرجع بعد ها الثلاثة اسابيع .
فخامس يوم انصدمت انه يرتب اغراضنا وشنطنا وكان من الليله اللي قبل يرتب حجز العوده عن طريق النت في تلفونه ونا مادري .. فقال لي جهزي اغراضك وعلى بيتكم طوالي . نا اهني تنرفزت قلت له اولا اللي اسويه مو حرام ولاعيب ونحن متعودين مادريت عنك معقد .. من قلت له معقد . قال لي اي صح انا معقد وانتي طالق من الحين ..
انا انربط لساني ماعرف شنو اللي صار وشلون ابين لاهلي وللناس . اشلون تونا في بداية الطريق ماقلنا بسم الله ويطلقني ..
انا الان من رجعنا لي اسبوعين والحين في الثالث مو عارفه اشلون ها الشي صار .. ولاني قادره اقول لاهلي شنو السبب . قلت الهم حنا ما نصلح لبعض والرجال معقد بس ماقلت شنو المشكله بالضبط ..
ما صار اي تواصل بيني وبينه .. الا في اول اسبوع من رجعنا امه ( عمتي ) اتصلت علي وتسالني عن الاسباب .. قلت الها والله يا عمتي ماعرف شنو السبب بالضبط اسالي ولدك اهو اللي طلقني مو نا اللي طلبت .
الحين موعارفه شسوي ومالي غيركم افضفض .
اتمنى تشورون علي ربي يخليكم

(مستجدات الرد119)

http://66n.com/forums/showpost.php?p...&postcount=119


(مستجدات الرد175)

http://66n.com/forums/showpost.php?p...&postcount=175

(مستجدات الرد260)

http://www.66n.com/forums/showpost.p...&postcount=260


(مستجدات الرد325)


http://66n.com/forums/showpost.php?p...ount=325<br />

(مستجدات الرد350)


http://66n.com/forums/showpost.php?p...&postcount=350

(حلت الرد390)

http://66n.com/forums/showpost.php?p...&postcount=390

اسفه مادريت اني كتبت كثير .. كنت اكتب بدون حاسيه اعذروني ماعرفت اشلون اختصر

(مكانه الأنسب)

__________________
الحمد لله بلا سبب ولا طلب..
الحمد لله في حياتي وبعد مماتي..
الحمد لله دائمآ وأبدا..

الله يهديكم ..أختي زوجك أولى تدارين خاطره أكثر من زوج أختك..ولما شفتيه معصب كان حاولت تلينين معاه..وهو بعد تسرع بالطلاق بس من شدة غيرته ماتحمل الوضع حاولي تصالحينه لان أشوف الحق معاه يعصب غلط أنه تتواصلين كذا مع زوج أختك حتى لو القصد والنية طيبة لازم يكون في حدود ضيقة حاولي تتواصلين معاه وخليك هادية أظنه الآن ندمان بس ينتظر منك اعتذار على اللي صار ..وحتى كلمة معقد غلطتي فيها لانه مو معقد هو صادق أن التواصل بينكم غلط ووضحي لأهلك وأختك السبب حتى تتفادين مشاكل التواصل مع أزواج أختك مستقبلا.

__________________
سبحان الله وبحمده..سبحان الله العظيم

برايي لازم تقولي لاهلك ولاهله عن السبب عشان تنحل المشكلة .

اما سكوتك فعند العرب ماله الا تفسير واحد ... شاف عليها شي يمس شرفها او حصلها مو بنت .. وهو يستر عليها ما يقول السبب وهي ساكته

ولنتو متفقين من هناك انك تبلغي اختك عن موقفه تجاه علاقتك بزوجها يعني ما راح تكوني تفشي باسرار الزوجية .


شو وجهة نظرك بخصوص تكتمك عن السبب ؟؟ ليش مو حابه تقولي ؟؟

بس احنا متعودين على هذا الوضع وحتى انا ما اشوف ان هذا الشي غلط .. كل كلامنا عام مافي اي شي من قلة الادب !! واخاف لو قلت الهم اختي تزعل بعد ويزعل زوجها لانه ما صار بينا اي شي يستاهل كل هذا .. انا محتاره مو عارفه شنو اقول وشنو اخبي ..

والله مو عارفه شنو اقول لاهلي .. بس قلت الهم هو ما يبي بكيفه ..
ابوي اتصل له بس ما رد عليه
وانا كنت عادي لما نرجع كنت افاتح اختي بالموضوع بس هو ما اعطاني اي مجال .. بصراحه سبب لي جرح مو مستوعبه اللي صار ..
وتكتمي حتى ما ازيد الطين بله واجرح اختي و زوجها واهلي رايح يستغربون منه وراح هم بيقولون عنه انه معقد

سكوتك عن اخبار اهلك مو في صالحك..الناس بتظن زي ماقالت خالة بيتا الموضوع فيه شرف ويبدا القيل والقال على الاقل خبري ابوك وامك وخليهم يتفاهمون بهدوء مع زوجك واهله غلللللط سكوتك الناس ماراح تشوف سبب للطلاق غير الشرف بالذات في اول ايام زواج ورجوعكم من السفر.

__________________
سبحان الله وبحمده..سبحان الله العظيم

متعودين أو مب متعودين ..
الوضع غلط وعيب ..
وهو لا معقد ولا شي .. إنتو اللي عايشين غلط ..

والله مادري انتم خوفتوني اكثر الحين .. احس الموضوع متلخبط ومو عارفه من وين ابدا .. انا بحاول اكلم ابوي .. لانه امي مستحيل تتفاهم او تتفهم الوضع .. تقول لي ندور لك واحد ثاني وين المشكله وهو ما يستاهلك .. بس ابوي اقدر اتفاهم معاه .. بس مادري شو اقوله .. يعني كيف بقول له انه زعل لاني اكلم نسيبي وهذا الشي مو غلط . وطلقني عشانه .. انا محتاره