السلام عليكم ورحمة الله وبركاته..
لي موضوع كتبته قبل عدة أشهر هنا
http://www.66n.com/forums/showthread.php?t=262648
لما عدت أتصفحه قبل قليل إكتشفت أن إحسان الظن
المبالغ فيه أكبر خطأ ممكن يرتكبه الإنسان في حياته والحمدلله على كل حال..
تزوجت برجل مطلق له ولد وبنت من بداية زواجي وبعد عقد القران بأسبوع قام بإرجاع زوجته
رغم انه منتهي تمامًا وقال مستبعد أيضًا إرجاعها..وكان ناوي يتخلى عني ويطلقني لولا
أن والدتي قدمت له التسهيلات واني سأصبر حتى تتحسن ضروفه المادية وتهدأ زوجته الأولى.وللاسف ليتنا لم نتساهل
الرجل كان طيب معي واخلاقه طيبة لكن توجد امور اعجز عن فهمها وتصرفات غريبة
لا اجد لها تفسير الا حبه لزوجته الاولى واني شخص تعجل في خطبته واراد التراجع بعد ماارجع زوجته !
ما سكنت في شقتي الا بعد ما رضت هي وضبط امورها واكتشفت بالصدفة انه مسافر بها مكة وبعدها بشهر او اقل سافر بها تركيا وبيتي موقفه ماكمله وعلى بالي الوضع ظروف مادية لكن اكتشتفت انه عشان سفرتها ..كل هذا وانا في بيت اهلي !
يقول لي لما اكتشفت كل شي إنه ماظلم وانه عادل وانه كان ياخذني بفنادق داخل الديرة الي حنا فيها قبل نسكن بمبالغ وقدره لكن ماحصل هالشي الا قليل حتى لو كان المبلغ الي صرفه
علينا نفس الشي ! وجلس يبكي يترضاني ارضى ويحب راسي وانه مانساني بيسفرني لكن بعد وشو !
هل يعقل يسافر بها لتركيا وانا العروس الجديدة جالسة فبيت أهلها على أمل بيسفرها
بعدييين لما ترجع طليقته له راضية وتستقر الأمور..كانوا في مكة يصور فنجال عليه اسمها
في كل مكااااان لقيت فوق الخمس صور يترزز فيها بإسمه..هل كل هذا حب ؟!
هذا غير صور لها شخصية مصورتها هي بالسناب وحافظ لها هالصور !
شي يقهر القلب ويدميه
بالوقت الي انا تعبانة فيه وداخلة المستشفى من سوء الوضع الحالي انا جدا تعبت لما عرفت
بسفراتهم مهما يكن هي ام عياله أبقى أنا مالي ذنب ولاطقيته على إيده حتى يخطبني ..
اخشى انه ماخذني تأديب لزوجته لأنه كما ذكر لي مافيه اهتمام منها وشكلها متطلبة وكثير دلعها وانا شخصية كما ذكر عاقلة وقنوعة وهادئة ومنطقية..
ما انكر انه يودني وممكن يغليني نوعا ما لكن الحب تترجمه الأفعال ماقصر في البيت لما سكنا من اكل وشرب ومصروف لكن مواقفه الاولى كانت جرح لي وحسيته ماحبني الا مع العشرة او يحبني بنسبة أقل
اما هي حبها باقي وثابت وانه طلاقهم كانوا مايبونه كلهم وانه يحبها لكن ممكن عاندت او شي تافه الي وصلهم الحال هذا الي هو الطلاق..مع انه يقول لو تتتزوجين غيري ذبحتك
انتي وياه واني مابي الدنيا من غيرك ! وانك لو تموتين يمكن ألحقك مقدر اصبر بعدك على الدنيا..وانه مابعدي زوجة ابدا ولا يبي بعدي احد واني لو ادور الدنيا مالقيت مثلك ولما نويت
اطلع ابتعاث قال لا مابغى وماودي وماتحمل بعدك قلت الآن ماتفرق لو انك مارجعتها
اقول ممكن صعب اروح واتركك وصعب جدا اصلا اروح لكن الآن عندك زوجتك وعيالك ماتفرق
قال الا تفرق ولو ماتفرق قلت روحي الله يساعدك وجلس متنكد كم يوم
لما جبت طاري الإبتعاث والغربة.
المهم مرت الأيام نوعا ما كويسه كان يحتويتي ويحبني ويعبر عن هالشي ويقول انتي نعمة كبيرة علي احمد ربي عليها كل يوم وانك غالية واحبك حب عظيم واني ماحسيت بالحب الحقيقي الا معك واني اخاف افقدك وكان دائمًا يردد انه يتمنى اني اكون ام اولاده وانه مشتاق لأولادي جدًا ..واتمنى ايضا انها
ماكانت مجاملات او غيره..لأن موقفي الذي سأحكيه الآن سيثبت انه لم يحبني يومًا ما !
ذهبنا قبل كم يوم لأهله وكان واعد اهله انه يعشيهم فلما جلسنا وتقهوينا جابوا أطفال أخته الصغار سيرة اولاده وزوجته انا تنرفزت تحسست من الكلمة جدًا وتمالكت أعصابي
ماضايقني الإسم ولا أعتقد اني تافهة لهذا الحد عشان ازعل من اسم لكن هالإسم هذا
يحمل وراه معاناة كبيرة لي ومتعبني ومادريت هالفترة اني فترة وحم والنفسية حساسة تجاه اي شي..المهم لما طلع يصلي العشاء وحنا عند أهله ارسلت له رسالة إني برجع البيت
رد علي ليش سلامات ياقلبي ؟ قلت اترك المجال لام فلان والعيال !
قال ياقلبي وش ذنبي انا هذا بزر ومدري ايش ..قلت انا برجع يافلان البيت..ومارد على رسالتي.
جلست شوي لما رجع من الصلاة وجلس شوي طالعته ابغاه يفهم اني بقوم ويسوي نفسه
مو فاهم..لحد ما اخذت عبايتي وقمت استأذنت منهم وسلمت على الجميع وطلعت كلهم قالوا
ليه ومدري ايش واجلسي بنتعشى وننبسط قلت خيرها بغيرها إن شاءالله والله تعبانة شوي.
المهم طلع زوجي وراي وقال ليش يالعنود كذا ارجعي وخلينا نجلس قلت انا بروح.
دخل عند امه وسمعتهم يتساسرون ثم طلع ورحنا البيت وطول الطريق ساكت ماتكلم
لما وصلنا البيت قال انزلي بدلي ملابسك وتعالي نبي نتعشى قلت مابي ومالي مزاج اطلع
قال تعوذي من ابليس وتعالي قلت طيب..رحنا نتعشى بالطريق وانا مالي نفس وما اكلت ونزلنا نمشي بالممشى وكان يسولف عادي ثم رجعنا البيت وكان الوضع طبيعي..لما صحى راح
ليوم بيته الثاني ولما جاء يومي من بعد بكرى دخل شخص آخر مااعرفه جاف وجاد حاولت كالعادة احتويه واسلم عليه سلام حار لكن قابلني ببرود قلت بنفسي ممكن ظروف خاصة براحته..تغدا وهو نفسه جدا سيئة وساكت وراح ينام وقبل ينام عطيته منشفته لما غسل
ومشى وخلاني واخذ مناديل وهذي اول مرة يسويها !!
قلت له وش فيك قال مافيني شي خليني انام..تركته ولما صحى العصر يصلي ورجع وقفت
ولزمت عليه اعرف وش فيه ؟؟ قال المصيبة انك ماتدرين !! قلت لا ماادري وانه طالع من عندي
عادي مافيك شي كيف رجعت لي كذا !!!!
قال لاني حاولت ارقع الموضوع الي عند اهلي وماقدرت للاسف ارقعه ! اعتذرت وقلت له
انت اخطيت والسبب مب بزر الي استفزني السبب الاسم الي انت سببه لأنك فضلته علي وعذبتني..قال هذا ماضي انسيه قلت طيب ماضي لكن انت غرست سكين بقلبي صح انك شلتها لكن الأثر مازال باقي !
قال انتي سودتي وجهي قدام اهلي وفشلتيني واني رايح مفتخر فيك واخر شي كذا تسوين
تقومين وتستأذنين ماستحتي على وجهك وانا قاعد .
قلت طيب انا ممكن أخطأت والمفروض اسكت واصبر لكن الان اقول وش يرضيك ؟
قل لي وش يرضيك ترا ماتحمل اشوفك صاد وزعلان علي قال مااصدقك ! لو اهمك ماسويتي
الي سويتيه تركته ونام هالليلة ومن الصبح طلع ماشفته انا تعبت ٣ ايام مايكلمني وهاجرني
ويدري اني تعبانة ماسأل عن صحتي وعارف اني ممكن اكون حامل وماهميته !
اتصلت على امي بالليل ابكي انه ضايق صدري من الجفا ومن التعب واني اتوقع اني حامل ونفسيتي تعبانة..وابغى اجي عندكم طبعا رفضت وقالت لا بس لما شافتني ابكي قالت طيب
قولي له اني تعبانة وبروح لاهلي يودوني المستشفى..ارسلت له اني تعبانة جدا ودني
لأهلي قال تجهزي وجهزت شنطتي ونزلت..لما ركبت نفسه سيئة وقال وش تبغين المستشفى ولا اهلك قلت اهلي..وداني لاهلي ونزل بدون وداع او مايسأل عن صحتي او وش فيني !
من بكرى كلمته امي قالت عسى ماشر؟ قال اسألي بنتك قالت بنتي قالت لي كل شي
لكن مهما يكن الموقف مايستاهل كل هذا ثلاث ايام هاجرها ولا سألت وحتى لحظتك هذي
ماسألت عنها ! قال لاماهجرتها ابد ثلاث ايام قالت امي قصدي انك ماسألت ولا تكلمها
قال ايه (وتبشر بالأردى بعد ) !! فشلتني عند اهلي وتقوم بدون ماتقول زوجي قاعد مع اهله قالت امي لا لا تبشر بالأردى ولا غيره كل واحد عند اهله بدون تجريح..قال يالله مع السلامة
عندي اهلي جو ماقدر اتكلم طبعا اسلوبه بصوت عالي ومتنرفز وسكر السماعة !
ارسلت له امي اعتذار وانه بنتي اخطت ووبّختها لكن تراها راضتك وانت تسكتها وماتبي تسمعها !! رد عليها : النقاش معك غير مجدي واحذركم ان يوصل لأمي شي الي فيها مكفيها وان بنتك خدعتني تقول تعبانة ولما جيت اتفاجأ انها مجهزة شنطتها تبي اهلها!!
أحشفا وسوء كيلة !!
قالت امي ماخدعتك والبنت فعلا تعبانة وانا قلت لها جيبي شنطتك حتى ترتاح عندنا وانت اصلا ماهمك وجودها وماطلعت الا معك وبرضاك ورحنا المستشفى وحللت وطلعت حامل مع اننا
للاسف تمنيناه بظروف افضل من كذا ! لكن الحمدلله على كل حال. لكن كلمتين هي اخر مابيننا اعتذاري انا اسحبه الآن لأنه في غير موضعه والبنت اخطت نعم لكن هذي شرارة من نار الي صار لها قبل منك ليش مانسيتها مثل مانست هي الماضي؟
لكن الآن الي تبغاه سوه خاصة الي كنت تبغاه اول الزواج من طلاق وكرهناه حنا..سو الي تبي..ولاراح تسمع منا زين او شين الا لو سفر وكنا نبي نستأذنك لأنها مازالت في ذمتك فقط.
ومارد على هذي الرسالة..
انا الان في بيت اهلي ٣ ايام وقبلها ٣ايام عنده ماسأل عني حتى لما عرف اني حامل !
ارسلت لعمي الي هو والده حتى لايتوقع ان الطلاق ان حصل فهو طلاق بسبب هالموقف التافه
انما من تراكمات ومن خطأ تافه امام اخطائه وشرحت له كل شي..قال لا ماراح يطلقك وتأكدي انه يحبك ويغليك ويثني عليك وأنت أهل للثناء وومكن اشغال ومسؤوليات الي اشغلته ونسي
واجباته وانه الرجل قد يقصر في واجبه احيانا وهذا طبيعي..قلت لا ياعمي غير طبيعي
بأول زواجي هدم فرحتي وبأول حمل لي يهجرني ولايسأل عني ويقول احبها !
الحب افعال والسؤال ماراح يقطعه عن اشغاله ٣ ثواني من ٢٤ ساعه لا اعتقد راح تعطله.
المهم أكد لي حبه لي وانه مستحيل يطلقني قلت ماتفرق عندي انا خاطري طايب لأني في
اشد حاجتي للسؤال منه مافكر فيني مهما كان خطأي لكن الآن انا الي ابغى اننا نتفرق ويغن الله كل من سعته..تضايق عمي وقال لا ابد هذا مب حاصل ان شاءالله واني بعالج الموضوع
بطريقتي..قلت ياعم استودعكم الله وارتاح انا مابي اكدرك لكن حبيت اضعك في الصورة فقط.
انتهى الى هذا اليوم وماسأل عني..وبدأت افكر جديا بالطلاق لولا اني تمنييييييييييت
اني ماكنت حامل لكن قدر الله وماشاء فعل..ارشدوني من المخطيء ؟
27-02-2016, 08:18 PM
ضوابط المشاركة
العرض العادي
