السلام عليكم ورحمة الله وبركاته

للنساء يهمني ردكن كـ أخت لم يكتب لي الله رزقها
للرجال يهمني ردكم كـ أخ يهتم لأمر اخته ...

لي 3 شهور متزوجه .. اول شهرين تمام ..
كنت اشتاق اهلي كثير خاصه امي وكنت اتمنى لوا زرناهم بشهر العسل..
وكان زوجي مو مقتنع نروح لهم اثناء شهر العسل.. والآن بنروح لهم كنا متفقين أننا نروح سوا ونرجع سوا ..
بس الآن تغير كلامه ...
قبل فترة قالي خلينا نروح نقعد شهر عند اهالينا ...
انت عند اهلك وانا عند اهلي انا ضحكت وغصب دمعت عيوني ولفيت وجهي قلت ونبدا نتغلى ع بعض زي ايام الملكة المهم ماحطيته ع بالي ع انه مزح ..
الان قال بنروح لاهلك انزلك عندهم وارجع 15 يوم قلت بس حنا متفقين نتمشى قال
انتي اجلسي عند اهلك انا ماني جالس استحي ..واكيد اشتقتي لامك وتبين تجلسين عندها وانا بروح لاهلي وبروح لاخوي وعياله وبعدين اجي اخذك
غصيت بدمعتي لهالدرجه مال مني ..
تعودت عليه وعلى بيتي ماخذه راحتي ، مدري شقول لكم انا مالي خوات وصديقاتي كلن لاهيه بحياتها وبالمنطقه اللي ساكنه فيها مالي احد فيها..

امي عندها حريم اخواني بنفس البيت صدق مشتاقه لامي ولهم بس ماكنت ابيها كذا ابدا
اول مره نروح لاهلي بعد زواجي وودي يجلس ونرجع سوا ونتمشى بالايام الباقيه زي اتفاقنا اول
مدري
قالي منتي مشتاقه لاهلك وودك تجلسين معهم عزت علي نفسي لمن قال هالجمله
حسيته يبي يصرفني قلت اوك تمام بكيفك قالي بكيفك انتي قلت انا برأي نقعد عنددهم كم يوم ونطلع نتمشى بجده ومكه انا ماابي افوت اجازته وبعدين عادي اروح لاهلي طيران بس هو مو فاهمني او بالاصح مو مقتنع بكلامي طبعا زوجي بالفتره الاخيره صار غامض معي
ويطلع ويجيب معه اعشاب وادوية من قراء ومشايخ ويطلع مع واحد من اخوياه ويقول هو اشترى لي كذا اخذ لي كذا والاحظه احيانا متضايق مرات مااهتم لاني اعرف طبعه مايحب احد يلح عليه ومرات اقوله خاطرك مو عاجبني
واليوم بالذات طلع الظهر اول ماصحى ورجع بعد ساعه ويوم جا ماافطر زي دايم وخاطره ضايق
هو يكابر وانا مااضغط عليه بس احسسه اني الاحظك ....
مااساله وين رحت اذا ماقال لي ولا احقق معه واذا طلع ماازعجه ولا اراسله لين يجي من حاله..
ومصر هالشهر لازم يصير حمل ولازم مايفوت ايام التبويض
وشارح له خويه ايام التبويض متى، وناصحه اني مااقوم ع طول واحط تحتي وساده عشان الحمل واصله انهم متكلمين عن حبوب اللقاح ومدري ايش
زوجي طبعا مايكلمني بصراحه بهالشي بس يقولي خويي قالي عن اللقاح او مدري ايش تعرفينه انتي ! لأيش يؤكل ؟ هو ياكله
وانا افهم اسلوب زوجي بس مااوضح اني فاهمتك اقوله اللي اعرفه عن هالشيء بعدين اقول ليه وش جاب سيرة هالشيء حتى تسولفون وليه خويك يقولك عنه ؟ عاد هو يسكر الموضوع واطنشه ..
ممم بالنسبه للحمل دورتي الحمدلله منتظمه واعتقد ان وضعي طبيعي ..
بس زوجي احسه مدهر من وراي ليه مدري ؟ ..
بالنسبه للعلاقه الحميمه مدري
استحي اتكلم ع العام بس مافي تغيير انا مااعرف واستحي منه وهو مايعطي مجال انه يعلمني ودايم اساله مبسوط يقولي مبسوط ومرتاح ..ولوا العكس كنت قلت لك ..
بس يطلب نغير واحاول بس مااعرف ..
في شيء نفسي استفسر عنه ... بس الرسائل الخاصه ماتفعلت لي..





تم تغيير العنوان ليتناسب مع المضمون

حبيبتي مافي رسائل خاصة في المنتدى..

عموما بالنسبة لجلستك عند أهلك مافيها شيء اجلسي عندهم بالعكس تنبسطي وتغيري جو وتشتاقو لبعض .. باقي الحياة قدامكم بطولها وعرضها بتتمشو اليت تطفشو.. المهم انكم ماتبيني لزوجك ابدا انك ماتبي تقعدي عند اهلك حتى لو كان قصدك تظلو مع بعض ..

__________________
اللهم أسألك أن تحقق لي ماأتمناه عاجلا غير آجل .. وأن تحقق لأختي "المنسية" راحة وسكينة وعافية ..

أولا حبيبتي
مبروك الزواج وأتمنى لك حياة سعيدة

ثانياُ .. رغبة زوجك في بقاءك عند أهلك انا متاكدة 100% انها ماتحمل مضمون سلبي تجاهك

الرجل كذا في بداية الزواج يحن لأيام العزوبية بشكل كبير
ولقاها فرصة أنه ينطلق بحرية زي ماكان

صار معي موقف مشابه لموقفك تماما بداية زواجي

واضح أن زوجك انسان محترم وهادي
ف سددي وقاربي
والحياة الزوجي كذا
مد و جزر

تمنياتي لك بالتوفيق ياغالية

وعليكم السلام ورحمة الله وبركاته
مشكلتك تحتاج الى قاضي محكمه ليتم حلها !!
مشكلتك تحتاج الى دراسه عميقة ليتم تجاوزها بسلام !!
مشكلتك تحتاج الى اجتماع مغلق مع جميع الاعضاء !!
اختي الكريمة انت مشكلة نفسك !!
لا تكوني سلبية في تفكيرك مع زوجك ( مال مني , يبي يصرفني !! ... الخ )
انت في بداية الزواج وهذه نصيحه من اخ الى اخته الزواج ليس كأيام الخطبه ووعودها وحلاوتها
لا تفسرين تصرفات وقرارات وردة فعل الرجل كما تريدين فهو مختلف عنك جذرياً , لا تفسرين تغيير رأيه لاتفاق معين بأنه مال منك !!
الرجل يحتاج الى جلسة مع نفسه يحتاج الى مساحه حرية اكبر وليس كالزوجه التي تحتاج الى زوجها ولا تريد مفارقته .
الرجل يحتاج الى فن بالتعامل , احيانا يكون الرجل القاسي وله تعامل خاص , واحياناً يكون الاب الحنون وله تعامل خاص , واحياناً يكون كالطفل وله تعامل خاص , وأحياناً يكون على خطأ وله تعامل خاص .
اذهبي لاهلك وايام سعيده بجوار والدتك .
اخيراً ربما اطلت بالكلام في موضوعك وهو لا يستحق ولكن رأيتك حديثة زواج فأردت اضافة بعض مالدي وعلى السريع لعلها تنفعك بشيء .
رزقكم الله ذريه صالحه .

قولي له مشتاقة لأهلي
بس بقعد عندهم يومين فقط
مو مناسبة لي كعروس جديدة اجلس اسبوعين.

شوفي إِيش يقول؟

ولا تأخذين أعشاب و أدوية منه.

__________________

حبوب اللقاح تقوي الخصوبة، غالبا تخلط مع عسل ..
ونصيحة حاحبة بالاستلقاء نص ساعة ووضع وسادة صحيحة وحتى الأطباء ينصحون فيها لمن ترغب في الحمل ..


قوليله كيف تبيني أحمل وإنت بتتركني اسبوعين ؟؟

بما انك عروس لسى و لا انتي قادره تعرفي هل زوجك عنده مشاكل من ناحية العلاقة او الانجاب
استغرب يعني لسى على الاعشاب و التحري و البحث
لا يكون بس خويه اعطاه عشبه ياكلها و انت بعيده عشان تقويه
>> هذا تخمين من عندي و هو اللي جا على بالي


اذا انت سكنت بمنطقه بعيده عن اهلك
عادي و الله هالمده تكون للزيارة
و لا يجي ببالك انه مل منك ي عسل
لانه لو مل بتكتشفين هالشيء من بدري
انت بس لا تخنقينه خليه طالما هذا طلبه
بعدين لا .. حطي لك مده معينه و لا تطول
ما يصلح زوجك يتعود على بعدك

الله يوفقك حبيبتي .. دائما البنات كيوووت و حساسات كم احبنا 😀

__________________
ي رب رضاك و الجنة

زوجك كان متزوج من قبل ؟!

ونصيحة لا تعودينه تجلسين عند اهلك فترة طويله بعد المرة هذي الا لو كنتي بمنطقة ثانيه
خصوصا ان منزل اهلك فيه اخوانك وزوجاتهم حاليا تشوفين مافي مشكلة لكن لما يجيك اطفال ان شاء الله بتعرفين قصدي