السلام عليكم و رحمة الله و بركاته

عندي أسئلة و استفسارات كثيرة بخصوص تربية ابنائي ..
فأنا ماشية عالبركة الصراحة

و ماهي عاجبتني طريقة تربية اهلي للاولاد الذكور ..
لانهم بيطلعوا مرة ( يااااي .. و إتيكيت و قرف .. و نفسي نفسي ..
و بيتوتيين بزيادة ) يعني اولادنا يطلعوا مدلعين ..

و لا عاجبتني طريقة تربية اهل زوجي .. لانهم يقسوا عليهم و يتحكموا فيهم بزيادة
لدرجة ينحرموا من أشياء كثيرة .. و لما يبدأوا ينطلقوا للعالم الخارجي؛ يكذبوا على
اهلهم و يصيعوا و يعملوا اي شي انحرموا منه

.
.

انا كنت بنت وسط ولدين .. عشت عصامية الحمدلله و افهم شخصية و تفكير الاولاد تقريبا
لاني كنت قريبة من اخواني كثير .. ايام زمان ..
و تفرقة امي سابقا لنا بسبب اني بنت و ترتيبي الوسط و كنت مميزة بدراستي
و هما اولاد و كانوا فاشلين بدراستهم .. خلتني الحمدلله اصعد الدرجات و اثبت وجودي

القصد :
عشت حياة الكفاح الحمدلله و مازلت أكافح ..

لكن ( كيف اربي اولادي !؟ تمر عليا مواقف و مادري انا صح او غلط !؟ )

لكن تربيتي لأولادي تختلف عن طريقة اهلي و اهله
و الاحظ من تعليقاتهم .. اهلي يشوفوني شديدة و اهله يشوفوني ادلعهم بزيادة


و انا ابغاهم يكونوا - رجال ناجحين بحياتهم من كل النواحي و ما يعانوا من عقد -

.
.

ابغى مساعدتكم لي ..
ام الدان .. ماشاءالله حبيت قربك لأولادك و حريمهم و اطفالهم ..
و صداقتك لهم .. و هذا الي اطمح له و أسعى له ..

صاحبة السعادة .. ماشاءالله ايضا قدرتك على تربية الاولاد بغياب الأب ..
و ايضا قربك لأولادك و فهمك لهم

.
.

ساعدوني ..
و انا زوجي بيتعلم مني في طريقة تربية الاولاد

لاني لو تركت له التربية على كيفه .. عنده مبدأ التربية و التعليم بالضرب
و كسر كرامة و شخصية الطفل

لكن بيتاثر بيا كثير و يسمع كلامي و يحسّن تعامله مع الاولاد

ابغى مساعدتكم في اكثر من سوْال و موقف اكون محتارة مع نفسي
ايش التصرف الافضل و خاصة مع ولدي الكبير

الكبير 8 سنوات
و الوسط 4
الصعنطوط 2